Pengajar 11:1-10
11 Tibarka* roti nuan ngagai ai, laban nuan deka tetemuka iya baru dudi hari.
2 Bagi utai ke dikemisi nuan ngagai tujuh tauka lapan iku orang, laban nuan enda nemu nama penusah ke deka nyadi ba dunya.
3 Lebuh mua hari penuh laban ai, ujan deka nurun ke dunya. Lebuh sepun kayu tumbang ke selatan tauka ke utara, dia meh alai pun kayu nya.
4 Orang ke udu beratika ribut enda ulih nabur benih, lalu orang ke udu beratika mua hari enda ulih ngetau nama-nama utai.
5 Baka nuan ke enda nemu baka ni seput pengidup* bekereja ba dalam tulang anak mit ke ba dalam sarang anak indai iya, nuan mega enda nemu utai ke digaga Petara ti bendar, ke udah ngaga semua utai.
6 Taburka benih nuan lebuh pagi hari lalu anang ngetu nyentukka lemai hari, laban nuan enda nemu benih sigi ni ke deka tumbuh, engka benih tu tauka benih nya, tauka kedua-dua iya deka tumbuh galak.
7 Penampak ulih ngelantangka ati. Manah amat enti mata ulih meda panchar mata panas!
8 Enti orang ulih idup lama, awakka iya ngelantangka diri. Tang iya patut ingat, hari ti petang deka datai lalu semua utai ke deka nyadi nya nadai guna.
9 Kita ke biak, gaga ati meh kala kita agi biak. Awakka ati kita gaga kala lebuh kita agi biak. Titihka meh pengingin ati enggau utai ke dipeda kita. Tang kita patut nemu, Petara ti bendar deka kita betanggungjawapka semua utai ke dikereja kita.
10 Nya alai, buai pengirau ari ati nuan sereta seliahka nama-nama utai ke ngemediska tubuh nuan, laban umur ti biak enggau maya ti pemadu manah dalam pengidup nuan nya mina enda lama aja.*
Nota Kaki
^ Tauka “Anjung.”
^ Mega ulih merujuk ngagai kuasa kudus Petara.
^ Tauka “nya nadai guna.”
