Pemungkal 40:1-23
40 Enda lama udah nya, ketuai ke nyaga ai irup raja Ejip enggau ketuai ke ngaga roti ngereja utai ti ngemediska ati tuan sida, raja Ejip.
2 Nya alai, Firaun balat ringat ngagai dua iku pegawai iya nya.
3 Iya pan ngurung seduai iya dalam jil ba rumah ketuai soldadu ke nyaga Firaun, alai Josep dijil.
4 Ketuai soldadu ke nyaga Firaun ngasuh Josep nyaga sereta ngintu dua iku pegawai nya. Seduai iya lama dikurung ba rumah jil nya.
5 Nyadi sekali, lebuh malam hari, ketuai ke nyaga ai irup raja enggau ketuai ke ngaga roti bisi mimpi. Tang reti mimpi seduai iya enda sebaka.
6 Pagi hari siti, lebuh Josep datai ngagai seduai iya, seduai iya berupai tusah ati.
7 Nya alai, Josep nanya seduai iya: “Nama kebuah seduai baka ke tusah ati seharitu?”
8 Disaut seduai iya: “Kami duai sama bisi mimpi, tang nadai orang ulih nerangka reti mimpi nya.” Ku Josep: “Semina Petara ulih nerangka reti mimpi. Padahka meh mimpi seduai ngagai aku.”
9 Ketuai ke nyaga ai irup Firaun madahka mimpi iya ngagai Josep. Ku iya: “Dalam mimpi aku, aku tepedaka siti pun anggur di depan aku.
10 Pun anggur nya bisi tiga iti dan. Lebuh dan anggur nya mansutka daun, iya bebungai, lalu buah anggur nya mansau.
11 Maya nya, aku benung megai cawan Firaun. Aku lalu ngambi buah anggur, lalu merah buah nya ke dalam cawan. Udah nya, aku nyuaka cawan nya ngagai Firaun.”
12 Ku Josep bejaku enggau iya: “Tu reti mimpi nuan: Tiga iti dan nya mai reti tiga hari.
13 Tiga hari da agi, Firaun deka ngelepaska nuan, lalu mulaika baru kereja nuan. Nuan deka nyadi ketuai ke nyaga ai irup iya baru, lalu nyadung ai ngagai iya.
14 Tang pengudah nuan dilepaska ila, anang enda ingatka aku. Kasihka meh aku,* lalu padahka Firaun pasal aku ngambika aku ulih dilepaska ari rumah jil tu.
15 Kebendar iya, aku udah ditaban ari menua orang Hebrew, lalu lebuh aku ba ditu, aku pan nadai ngereja nama-nama utai ke tau ngasuh aku dijil.”
16 Lebuh ketuai ke ngaga roti nya ninga reti mimpi ke diterangka Josep nya manah, ku iya bejaku enggau Josep: “Aku pan bisi mimpi. Ba pala aku bisi tiga iti bakul ke bisi roti.
17 Ba bakul ke pemadu atas, bisi mayuh macham roti ke Firaun, lalu bala burung makai roti ba bakul nya.”
18 Disaut Josep: “Tu reti mimpi nuan: Tiga iti bakul nya mai reti tiga hari.
19 Tiga hari da agi, Firaun deka mumpung pala nuan. Udah nya, bangkai nuan deka digantung ba tiang, lalu bala burung deka makai isi nuan.”
20 Tiga hari pengudah nya, Firaun ngintu hari pengada iya. Iya ngatur siti pengerami makai besai ke semua bala pegawai iya. Maya nya mega, iya ngasuh ketuai ke nyaga ai irup iya enggau ketuai ke ngaga roti dibai ngagai iya.
21 Firaun mulaika baru pengawa ketuai ke nyaga ai irup iya, lalu ketuai nya neruska pengawa iya nyadung ai ngagai Firaun baru.
22 Tang ketuai ke ngaga roti digantung* ba tiang. Semua utai nya nyadi baka ke dipadah Josep.
23 Tang ketuai ke nyaga ai irup Firaun nyau enda ingatka Josep agi.
Nota Kaki
^ Tauka “Ayanka pengerindu ti setia ngagai aku.”
^ Iya nya, pengudah pala iya dipumpung tauka dipancung.
