Pemansut 15:1-27
15 Maya nya, Moses enggau orang Israel belaguka lagu tu ke Jehovah:
“Aku deka belagu ke Jehovah, laban Iya udah nerima mulia ti besai.
Kuda enggau orang ke nepan kuda nya udah ditikauka Iya ngagai tasik.
2 Jah* meh kuasa enggau pengering aku, laban Iya udah nyelamatka aku.
Iya meh Petara aku, lalu aku deka muji Iya; Iya Petara apai aku, lalu aku deka ngemuliaka Iya.
3 Jehovah nya Petara ti kering belaban. Jehovah meh nama Iya.
4 Semua kerita kuda enggau bala soldadu Firaun udah ditikauka Iya ngagai tasik;Bala soldadu Firaun ti pemadu kering pan udah tengelam ba Tasik Mirah.
5 Umbak tasik ti besai ninggang sida. Baka batu, sida tengelam jauh ke dalam tasik.
6 O Jehovah, jari kanan Nuan amat bekuasa;O Jehovah, jari kanan Nuan ulih nganchurka munsuh.
7 Ngena kuasa Nuan ti besai, Nuan ulih ngalahka orang ke angkat ngelaban Nuan;Pengeringat Nuan mau baka api, lalu nya nunu sida baka rumput ti rangkai.
8 Semina sekali aja Nuan ngesuhka seput Nuan, ai tasik lalu betugung;Ai nya bediri tegap baka dinding;Ba tengah tasik, ai nya lalu meku.
9 Munsuh madahka: ‘Aku deka ngagai sida! Aku deka nangkap sida!
Aku deka bebagika reta sida sampai aku puas!
Aku deka nyintak pedang aku! Jari aku empu deka munuh sida!’
10 Tang Nuan ngesuhka seput Nuan, lalu tasik ninggang sida;Baka besi ti berat, sida tengelam ke dalam tasik ti besai.
11 O Jehovah, ni bagi petara ke baka Nuan?
Sapa ke baka Nuan, Petara ti Pemadu Kudus?
Nuan endang Petara ke patut dibasa ngena lagu puji, Petara ke ngereja utai ti luar biasa.
12 Nuan ngunjurka jari kanan Nuan, lalu dunya pan nelan sida.
13 Nuan setia ngayanka pengerindu Nuan, lebuh Nuan ngiring nembiak Nuan ke udah ditebus Nuan;Ngena pengering Nuan, Nuan deka ngiring sida ngagai endur Nuan ti kudus.
14 Orang tentu bisi ninga pasal nya; sida deka gegetar takut;Orang ke diau ba Pilistia deka balat merinsa.
15 Maya nya, bala tuai Edom deka berasai takut,Pemerintah Moap ti kering deka gegetar takut.
Semua orang ke diau ba Kanaan deka lemi semengat.
16 Sida deka berasai takut.
Ketegal lengan Nuan ti bekuasa, sida enda engkebut baka batu,Sampai nembiak Nuan mansa kawasan sida, O Jehovah,Sampai nembiak ke dipilih Nuan mansa kawasan sida.
17 O Jehovah, iring meh sida ngambika sida ulih diau ba gunung ke diempu Nuan,Nya meh endur ke udah disediaka Nuan nyadi endur Nuan diau, O Jehovah,Nya meh endur ti kudus ke udah digaga Nuan ngena jari Nuan Empu.
18 Jehovah deka merintah nyadi raja nyentukka belama iya.
19 Lebuh kuda Firaun, kerita kuda iya, enggau bala soldadu iya ke nepan kuda mansang ke tasik,Jehovah lalu ngasuh umbak ti besai ninggang sida,Tang orang Israel bejalai ba tanah ti rangkai meraka tasik.”
20 Udah nya, menyadi indu Aron, iya nya Miriam, ke mega siku nabi, pan ngambi tamborin iya. Semua indu ke bukai sama nitihka iya nebah tamborin sida lalu betanda.
21 Miriam lalu nimbal lagu sida ke lelaki. Ku iya belagu:
“Belagu ke Jehovah, laban Iya udah nerima mulia ti besai.
Kuda enggau orang ke nepan kuda nya udah ditikauka Iya ngagai tasik.”
22 Udah nya, Moses ngiring orang Israel ari Tasik Mirah ngagai menua puang Sur. Sida bejalai ba menua puang pengelama tiga hari. Tang sida nadai tetemuka ai.
23 Sida lalu datai ba Marah.* Tang, sida enda ulih ngirup ai ba dia laban ai ba dia pait. Nya alai, endur nya dikumbai Marah.
24 Nyadi, orang Israel pan berengkah mutap ngagai Moses, lalu ku sida madah: “Nama utai diirup kami deh?”
25 Moses lalu ngangauka Jehovah minta tulung. Jehovah lalu nunjukka iya pun kayu ti mit. Lebuh Moses nikauka pun kayu nya ngagai ai, ai nya pan nyadi manis.
Petara ngena utai ke nyadi tu nyadika chunto ke orang Israel, ngambika sida nemu utai ke dikedekaka Petara ari sida. Petara deka nguji sida, kena nemu sekalika sida deka ngasika Iya tauka enda.
26 Ku Petara bejaku: “Aku tu meh Jehovah, Petara kita. Enti kita enggau bebendar ngasika Aku, ngereja utai ti betul ba mata Aku, ngasika pesan Aku enggau semua atur Aku, Aku enda ngukum kita ngena bemacham penyakit, baka Aku ke udah ngukum orang Ejip. Aku tu meh Jehovah ke ngeraika kita.”
27 Udah nya, sida datai ba Elim. Ba dia, bisi 12 iti pun penatai ai enggau 70 iti pun kayu engkerema. Nyadi, sida nirika kem ba dia enda jauh ari ai.
