Pemandang 16:1-21
-
Tujuh iti mangkuk pengeringat Petara (1-21)
16 Aku ninga nyawa ti inggar ari Rumah Sembiang* bejaku ngagai tujuh iku melikat nya: “Mupuk lalu tuangka tujuh iti mangkuk pengeringat Petara ke dunya.”
2 Melikat ti keterubah mupuk lalu nuangka mangkuk iya ke dunya. Orang ke bisi tanda jelu siga nya sereta orang ke nyembah patung iya pan kena empa pisa ti balat sereta ngemediska.
3 Melikat ti kedua nuangka mangkuk iya ke dalam tasik. Tasik nya pan nyadi baka darah orang mati, lalu semua utai ti idup ba dalam tasik mati magang.
4 Melikat ti ketiga nuangka mangkuk iya ngagai sungai enggau ngagai pun penatai ai,* lalu ai pan nyadi darah.
5 Aku ninga melikat ti bekuasa atas ai madahka: “Nuan ke bisi diatu enggau ke bisi suba sereta ti setia, Nuan lurus laban Nuan udah meri ukum tu.
6 Sida nuangka darah nembiak Nuan ti kudus sereta darah bala nabi. Nya alai, Nuan udah ngasuh sida ngirup darah. Sida endang patut diukum baka nya.”
7 Udah nya, aku ninga alta bejaku: “Petara Jehovah ti Pemadu Bekuasa, ukum Nuan endang lurus sereta ngena.”
8 Melikat ti keempat nuangka mangkuk iya ngagai mata panas, lalu mata panas dikemendarka nganguska mensia ngena api.
9 Mensia pan angus ketegal pengangat ti balat amat. Sida enda nesal ati lalu enda meri mulia ngagai Petara, tang sida bejaku ngelaban nama Petara ti bekuasa atas semua bencana tu.
10 Melikat ti kelima nuangka mangkuk iya ngagai kerusi diraja jelu ti siga nya. Perintah jelu ti siga nya pan nyadi petang, lalu mensia ngigit dilah diri ketegal pemedis ke diasaika sida.
11 Sida agi enda nesal ati ari pengawa sida, tang sida bejaku ngelaban Petara ke bisi ba serega ketegal pisa enggau pemedis ke diasaika sida.
12 Melikat ti keenam nuangka mangkuk iya ngagai Sungai Eupratis ti besai. Sungai nya pan nyadi rangkai, ngambika ulih ditengah bala raja ke datai ari endur mata panas tumbuh.*
13 Udah nya aku meda tiga iti pesan* ti kamah ke baka gamal katak pansut ari mulut naga, mulut jelu ti siga, sereta ari mulut nabi ti pelesu.
14 Kebendar iya, pesan nya datai ari bala melikat ti jai lalu pesan nya ngaga tanda ti besai. Pesan nya mupuk ngagai bala raja ba serata dunya, lalu ngempuruka sida ngagai perang ke nyadi maya hari besai Petara ti Pemadu Bekuasa.
15 “Peda! Aku deka datai baka penchuri. Gaga ati meh orang ke seruran bejaga ngambika gari luar iya enda diambi orang. Enggau nya, iya enda bejalai telanjai lalu orang enda meda utai ti ngemaluka ba iya.”
16 Udah nya, pesan nya ngempuruka bala raja nya ngagai endur ke dikumbai Armagedon* dalam jaku Hebrew.
17 Melikat ti ketujuh nuangka mangkuk iya ngagai udara. Maya nya, nyawa ti inggar ari kerusi diraja ba Rumah Sembiang* bejaku: “Udah tembu!”
18 Udah nya, bisi bunyi guntur enggau bunyi nyawa, kilat nyelar, lalu gempa bumi ti balat nyadi. Kenyau ari mensia bisi ba dunya, nadai kala gempa bumi udah nyadi ngemalat nya.
19 Nengeri ti besai nya tebelah nyadi tiga, lalu semua nengeri orang bansa bukai pan anchur. Petara ingatka Babilon ti Besai, lalu Iya meri Babilon ti Besai mangkuk wain pengeringat Iya ti besai.
20 Semua pulau ngerarika diri magang, lalu semua bukit pan enda ulih ditemu.
21 Udah nya, ujan batu ti balat nurun ari langit ninggang mensia. Pemerat sigi batu nya kira-kira 20 kilogram.* Ketegal bencana ujan batu nya, mensia bejaku ngelaban Petara laban bencana nya amat balat.
Nota Kaki
^ Iya nya, Endur ti Pemadu Kudus ba dalam Rumah Sembiang.
^ Tauka “mata ai.”
^ Tauka “ari timur.”
^ Jaku Gerika, “pneu′ma.” Peda Penerang Leka Jaku, “Pneu′ma.”
^ Jaku Gerika, “Har Ma·ge·donʹ,” ari leka jaku Hebrew ke mai reti “Bukit Megido.”
^ Iya nya, Endur ti Pemadu Kudus ba dalam Rumah Sembiang.
^ Jaku Asal, “satu talenta.” Satu talenta Gerika berat iya 20.4 kg.
