Matthew 9:1-38
9 Jesus nepan perau, ngelayang danau nya ke seberai, lalu datai ba nengeri iya empu.
2 Orang ba dia mai siku lelaki ke sakit bajung ngagai iya. Lelaki nya gali ba peninduk,* laban iya enda ulih engkebut. Lebuh Jesus meda pengarap sida, iya lalu bejaku ngagai orang ke sakit nya: “Anang takut, anak! Dosa nuan udah diampun.”
3 Sekeda penulis Adat lalu bejaku enggau pangan diri: “Orang tu bejaku ngelaban Petara!”
4 Jesus nemu utai ke diperunding sida. Iya lalu madahka: “Nama kebuah kita berundingka utai ti jai baka nya?
5 Ni nyamai agi disebut: ‘Dosa nuan udah diampun,’ tauka ‘Angkat lalu bejalai’?
6 Tang ngambika kita nemu, Anak Mensia bisi kuasa ngampunka dosa ba dunya tu—” lalu ku iya bejaku ngagai orang ke sakit nya: “Angkat! Bai peninduk nuan, lalu pulai ke rumah.”
7 Lelaki nya angkat, lalu pulai ke rumah.
8 Lebuh orang mayuh meda utai ke nyadi nya, sida balat alit ati.* Sida ngemuliaka Petara laban udah meri kuasa ke baka nya ngagai mensia.
9 Pengudah Jesus mupuk ari endur nya, iya tepedaka siku pengumpul chukai ke benama Matthew. Matthew benung duduk ba opis endur ngumpul chukai. Ku Jesus bejaku ngagai iya: “Aram nyadi murid aku.” Matthew angkat, lalu nitihka iya.
10 Udah nya, lebuh Jesus benung makai ba rumah Matthew, mayuh pengumpul chukai enggau orang ke bedosa* datai lalu makai* enggau Jesus sereta bala murid iya.
11 Tang lebuh orang Parisi meda nya, sida bejaku enggau murid Jesus: “Nama kebuah pengajar kita begulai makai enggau pengumpul chukai sereta enggau orang ke bedosa?”
12 Lebuh Jesus ninga nya, iya lalu bejaku: “Orang ke gerai enda begunaka lutur, tang semina orang ke sakit begunaka lutur.
13 Mupuk kita lalu giga reti jaku tu: ‘Aku deka kita kasihka orang, ari ke meri pemeri ngagai Aku.’ Aku datai ukai ketegal orang ke lurus,* tang ketegal orang ke bedosa.”
14 Udah nya, bala murid John Pemaptisa datai nanya Jesus: “Nama kebuah kami enggau orang Parisi selalu bepasa, tang bala murid nuan enda?”
15 Ku Jesus nyaut: “Seagi-agi pengantin lelaki agi begulai enggau bala sida ke datai ngagai pengerami tikah* iya, kati sida deka tusah ati? Tentu enda. Tang maya deka datai alai pengantin lelaki nya deka diambi ari sida, nya baru sida deka bepasa.
16 Nadai orang nampal baju ti lama ngena chebik kain ti baru, laban chebik kain ti baru deka nyadi mit,* lalu ngasuh baju nya balat agi charik.
17 Pia mega, nadai orang nyimpan wain ti baru dalam kambut kulit wain ti lama, laban tu deka ngasuh kambut nya pechah lalu jai, lalu wain nya deka naya. Tang orang deka nyimpan wain ti baru dalam kambut kulit wain ti baru. Nya baru wain enggau kambut nya enda jai.”
18 Lebuh Jesus bejaku ngagai sida, siku pemesai datai, besugang ba mua iya lalu bejaku: “Maya tu, anak indu aku tentu udah mati. Tang aku minta nuan datai lalu ngengkahka jari nuan ba atas iya, ngambika iya idup baru.”
19 Udah nya, Jesus enggau bala murid iya nitihka pemesai nya.
20 Siku indu ke balat datai kain* pengelama 12 taun datai ari belakang, lalu negu buchai* gari luar Jesus.
21 Indu nya majak bejaku dalam ati diri: “Enti aku semina negu gari luar iya, aku tentu deka gerai.”
22 Jesus malik ke belakang lalu tepedaka indu nya, lalu bejaku: “Anak, anang takut! Pengarap nuan udah ngeraika nuan.” Indu nya lalu gerai tekala nya.
23 Lebuh Jesus tama ngagai rumah pemesai nya, iya tepedaka orang ke besepuka kesuling enggau orang ke bendar amat nyabak.
24 Jesus lalu bejaku: “Pansut kita ari tu. Anak mit tu enda mati tang iya semina tinduk.” Sida lalu ketawa ngeleseka iya.
25 Tang lebuh semua orang udah pansut, Jesus tama, lalu megai jari anak mit nya. Anak mit nya lalu angkat.
26 Berita pasal utai ke udah nyadi nya ngelekai ngagai serata menua nya.
27 Pengudah Jesus mupuk ari endur nya, dua iku lelaki ke buta nitihka iya lalu ngangau: “Anak David, kasih meh ke kami!”
28 Lebuh Jesus tama ngagai sebuah rumah, dua iku orang buta nya datai ngagai iya. Jesus nanya seduai iya: “Kati seduai arapka aku ulih ngeraika seduai?” Ku seduai iya nyaut: “Au, Tuan! Kami arap.”
29 Jesus negu mata seduai iya, lalu bejaku: “Ketegal seduai arap, utai nya deka nyadi.”
30 Mata seduai iya pan ulih meda. Udah nya, Jesus bendar amat nangkan seduai iya: “Anang madahka utai tu ngagai orang.”
31 Tang pengudah seduai iya pansut ari rumah nya, seduai iya nusui pasal Jesus ba serata menua nya.
32 Lebuh seduai iya mupuk ari endur nya, siku lelaki ke bisu laban dirasuk melikat ti jai dibai ngagai Jesus.
33 Pengudah melikat ti jai nya diburu, orang nya pan ulih bejaku. Semua orang balat alit ati. Ku sida: “Kami nadai kala meda utai ke baka tu nyadi ba Israel.”
34 Tang ku orang Parisi bejaku: “Iya muru melikat ti jai ketegal iya bisi kuasa ari ketuai melikat ti jai.”
35 Jesus bejalai ngagai semua nengeri enggau genturung pendiau. Iya ngajar dalam balai gempuru sereta nusui Berita Manah pasal Perintah Petara. Iya mega ngeraika orang ari semua macham pemedis enggau penyakit.
36 Lebuh iya meda orang mayuh, iya kasihka sida laban sida baka bedus ti nadai orang ngibun. Sida ditekan sereta enda dikeibuhka orang.
37 Iya bejaku ngagai bala murid iya: “Utai ti diketau endang mayuh, tang orang ke ngetau mimit.
38 Nya alai, minta ngagai Orang ke bempu ladang ngambika ngirum mayuh agi orang ngetau.”
Nota Kaki
^ Iya nya, peninduk mit kena ngangkat orang ke sakit.
^ Tauka “balat takut.”
^ Tauka “ke suah ngereja dosa.”
^ Kelia menya, lebuh orang makai, orang suah gali singit ba semak mija.
^ Iya nya, orang ke ngumbai diri lurus agi ari orang bukai.
^ Tauka “bala pangan.”
^ Tauka “deka kesat.”
^ Tauka “sakit begetah.”
^ Tauka “burai; puting.”
