Matthew 8:1-34
8 Pengudah Jesus nurun ari bukit nya, mayuh amat orang nitihka iya.
2 Siku lelaki ke sakit lan* datai lalu besugang di mua iya. Ku lelaki nya: “Tuan, enti nuan deka, nuan ulih ngeraika aku.”*
3 Jesus ngunjurka jari iya, negu orang nya, lalu bejaku: “Aku deka! Gerai* meh nuan.” Tekala nya, orang ke sakit lan nya lalu gerai.
4 Lalu ku Jesus bejaku ngagai iya: “Anang madahka tu ngagai orang, tang mansang nuan ngagai imam. Udah nya, beri pemeri baka ke diasuh ba Adat Moses kena mandangka ngagai bala imam, nuan udah gerai.”
5 Lebuh Jesus tama ngagai nengeri Kapernaum, siku pemesai soldadu betemu enggau iya lalu minta saup iya:
6 “Tuan, ulun aku balat amat sakit. Iya gali ba rumah lalu enda ulih engkebut.”
7 Ku Jesus nyaut: “Lebuh aku datai din, aku deka ngeraika iya.”
8 Tang ku pemesai soldadu nya bejaku: “Tuan, aku enda chukup badas nyambut nuan datai ba rumah aku. Sebut aja, lalu ulun aku tentu deka gerai.
9 Laban aku empu pan bekereja di baruh orang, lalu aku mega bisi bala soldadu dipegai aku. Lebuh aku ngasuh siku soldadu: ‘Mupuk nuan!’ iya lalu mupuk. Lebuh aku ngasuh siku agi soldadu: ‘Datai kitu!’ iya lalu datai. Lebuh aku ngasuh ulun aku: ‘Kereja tu!’ iya lalu ngereja nya.”
10 Lebuh Jesus ninga nya, iya balat alit ati, lalu bejaku ngagai orang ke nitihka iya: “Enggau bendar aku madah ngagai kita: Aku bedau kala tetemuka pengarap orang ti ngemesai nya ba menua Israel.
11 Aku madah ngagai kita, mayuh orang ari timur enggau ari barat deka datai, lalu sida deka duduk begulai makai enggau Abraham, Isak, enggau Jakop, ba Perintah serega.
12 Tang orang ke patut bempu Perintah nya deka dibuai ngagai endur ti petang, dia meh alai sida deka nyabak sereta begerit ngeli.”
13 Udah nya, Jesus lalu bejaku ngagai pemesai soldadu nya: “Mupuk meh nuan. Ketegal nuan arap, utai nya deka nyadi.” Ulun pemesai nya lalu gerai tekala nya.
14 Lebuh Jesus tama ngagai rumah Peter, iya meda mentua indu Peter gali ba peninduk iya, sakit chelap angat.
15 Jesus negu jari iya, lalu iya gerai. Iya angkat lalu nyediaka pemakai ke Jesus.
16 Lebuh hari nyau lemai, mayuh orang ke dirasuk melikat ti jai dibai ngagai Jesus, lalu iya muru melikat ti jai nya ngena seleka jaku aja. Iya mega ngeraika semua sida ke sakit.
17 Tu ngamatka jaku ti udah disebut Nabi Isaiah: “Iya muai pemedis enggau penyakit kitai.”
18 Lebuh Jesus meda pemayuh orang begelumu ngelingi iya, iya lalu ngasuh sida murid iya ngelayang ke seberai danau.
19 Siku penulis Adat datai ngagai iya, lalu bejaku: “Pengajar, aku deka nitihka nuan enda ngira kini penunga nuan.”
20 Ku Jesus bejaku ngagai iya: “Munsang* bisi lubang, lalu burung bisi tansang, tang Anak Mensia nadai endur alai ngalika diri.”
21 Udah nya, siku ari murid iya bejaku ngagai iya: “Tuan, awakka aku pulai lalu nguburka apai aku dulu.”
22 Tang ku Jesus nyaut: “Anang ngetu nitihka aku. Awakka orang mati nguburka orang mati.”
23 Lebuh Jesus nepan perau, sida murid iya lalu mupuk enggau iya.
24 Tang enda mukai-mukai, kabut ti besai ngenyit mangka ba danau nya. Perau sida nyau deka karam laban gelumbang. Tang Jesus agi tinduk.
25 Sida ngerak iya lalu bejaku: “Tuan, selamatka kami! Parai kitai tu legi!”
26 Ku iya bejaku ngagai sida: “Nama kebuah kita balat takut? Mit amat pengarap kita.” Iya angkat lalu ngerara ribut enggau danau nya. Udah nya, semua utai lalu teduh magang.
27 Sida balat alit ati, lalu ku sida: “Sapa iya tu? Indah ribut enggau danau pan ngasika iya.”
28 Lebuh Jesus datai ba menua Gadara, ba seberai danau nya, dua iku lelaki ke dirasuk melikat ti jai datai ari pendam, lalu mansang ngagai iya. Seduai iya mangah amat. Nya alai, nadai orang berani nengah jalai nya.
29 Seduai iya lalu merakka nyawa bejaku: “Anak Petara, nama kebuah nuan kitu? Kati nuan datai deka merinsaka kami sebedau maya ti patut?”
30 Ba endur ke jauh ari nya, bisi raban babi ke benung makai.
31 Bala melikat ti jai nya minta kasih ari Jesus. Ku sida: “Enti nuan deka muru kami, awakka kami tama ngagai raban babi nya.”
32 Ku Jesus nyaut: “Alai kita mupuk!” Sida pansut lalu tama ngagai raban babi nya. Semua babi nya lalu belanda nurun tingkah, terejun ngagai danau, lalu mati lemas.
33 Bala sida ke ngibun raban babi nya lalu rari. Sida tama ngagai nengeri lalu nusui semua utai ke udah nyadi, nyengkaum utai ke nyadi ngagai orang ke dirasuk melikat ti jai nya.
34 Udah nya, semua orang ari nengeri nya pansut betemu enggau Jesus. Lebuh sida meda iya, sida lalu ngansak iya mupuk ari menua sida.
Nota Kaki
^ Peda Penerang Leka Jaku.
^ Tauka “ulih ngasuh aku tuchi.”
^ Tauka “Tuchi.”
^ Sebengkah jelu ke baka ukui ba menua Israel enggau menua ke semak iya.
