Matthew 3:1-17
3 Lebuh maya nya, John Pemaptisa nusui pesan ba menua puang Judea.
2 Ku iya: “Kita patut nesal ati laban Perintah serega nyau semak.”
3 Iya meh ke disebut Nabi Isaiah: “Siku orang ngangau enggau nyawa ti inggar ba menua puang: ‘Sediaka jalai ke Jehovah! Gaga jalai Iya rurus.’”
4 Gari John digaga ari bulu unta. Belulang iya digaga ari kulit jelu. Pemakai iya buntak enggau ai manyi.
5 Orang ari Jerusalem, ari serata Judea enggau semua endur ke semak Sungai Jordan datai ngagai iya.
6 Sida ngaku dosa diri ba mua orang mayuh, lalu John maptisa* sida ba Sungai Jordan.
7 Lebuh John meda mayuh orang Parisi enggau Saduki datai ngagai endur orang dibaptisa* nya, ku iya madah ngagai sida: “Kita tu anak ular ti bisa! Sapa nangkan kita ngerarika diri ari pengeringat Petara ti deka datai?
8 Nya alai, ayanka ulah ke nunjukka kita amat nesal ati.
9 Anang ngumbaka diri madah: ‘Abraham nya apai kami.’ Laban Petara ulih meri Abraham peturun ari batu tu.
10 Kapak udah diengkah ba urat kayu. Tiap iti kayu ke enda mansutka buah ti manah deka ditebang lalu dibuai ngagai api.
11 Aku maptisa kita ngena ai laban kita udah nesal ati. Tang iya ke datai dudi ari aku, bekuasa agi ari aku. Indah muka kasut* iya deh, aku enda layak. Iya deka maptisa kita ngena kuasa kudus enggau api.
12 Jari iya megai sekup kena nampi. Iya deka meresi endur ngindik gandum lalu nyimpan gandum nya dalam setor. Lalu iya deka nunu ampa dalam api ke enda ulih dipadam.”
13 Udah nya, Jesus datai ari Galili ngagai Sungai Jordan ngambika John ulih maptisa iya.
14 Tang John enggai ngereja utai ke dipinta iya, lalu madahka: “Nuan ke patut maptisa aku. Nama kebuah nuan datai ngagai aku?”
15 Tang ku Jesus nyaut: “Diatu, awakka baka nya dulu. Laban ngena chara nya, kitai deka ngamatka semua utai ti dikedekaka Petara.” John pan badu agi mantah jaku iya.
16 Sepengudah dibaptisa, Jesus pansut ari ai. Tekala nya, langit lalu tebuka. John meda kuasa kudus Petara ke baka burung achang nurun ngagai Jesus.
17 Udah nya, nyawa ari serega bejaku: “Tu Anak ke dikesayauka Aku. Aku gaga ati ke iya.”
