Matthew 2:1-23
2 Maya Raja Herod* merintah, Jesus ada ba Betlehem ba menua Judea. Udah nya, beberapa iku orang ke nemu nujum nengah bintang, datai ari Timur ngagai Jerusalem.
2 Ku sida nanya: “Dini alai anak ke deka nyadi raja orang Judah ada? Lebuh ba Timur, kami bisi meda bintang iya lalu kami datai deka meri basa ngagai iya.”
3 Lebuh ninga pekara tu, Raja Herod enggau semua orang ba Jerusalem lalu tusah ati sereta takut.
4 Herod ngempuruka semua tuai imam enggau bala penulis Adat. Iya nanya sida dini Kristus* deka ada.
5 Ku sida nyaut: “Ba Betlehem, menua Judea. Laban siku nabi bisi nulis:
6 ‘Betlehem ba menua Judah, bala gabenor Judah enda patut ngumbai nuan nengeri ti pemadu mit. Laban ari nuan, deka ada siku pemerintah ke deka ngibun nembiak Aku, Israel.’”
7 Udah nya, Herod belalai betemu enggau bala sida ke nemu nujum nengah bintang. Pengudah nanya sida enggau silik, Herod pan nemu kemaya bintang nya ayan.
8 Iya ngasuh sida ke Betlehem, lalu ku iya madah: “Giga meh anak mit nya enggau bebendar. Pengudah kita tetemuka iya, padah ngagai aku ngambika aku mega ulih datai meri basa ngagai iya.”
9 Pengudah ninga pesan raja nya, sida pan mupuk. Lebuh mansang kin, sida meda bintang ke sama, ke dipeda sida ba Timur. Bintang nya mupuk dulu ari sida, lalu ngetu ba endur alai anak mit nya.
10 Lebuh meda bintang nya, sida gaga amat ati.
11 Sida tama ngagai rumah nya, lalu meda anak mit nya enggau indai iya Maria. Sida besugang lalu meri basa ngagai iya. Sida mega mantaika utai ke dibai sida, lalu meri iya emas, menyan burak, enggau mur.
12 Ketegal Petara udah nangkan sida nengah mimpi, enda ngasuh sida pulai ngagai Herod, nya alai sida pulai ngagai menua diri nengah jalai bukai.
13 Pengudah sida mupuk, melikat Jehovah ayan dalam mimpi Josep lalu madahka: “Angkat, lalu bai anak mit nya enggau indai iya ngagai Ejip. Diau din dulu nyentukka aku meri pesan baru ngagai nuan, laban Herod deka ngiga anak mit nya lalu munuh iya.”
14 Nya alai Josep lalu angkat malam nya, mai anak mit nya enggau indai iya ngagai Ejip.
15 Iya diau din nyentukka Herod mati. Tu ngamatka jaku ke dipadah Jehovah nengah siku nabi: “Aku ngangauka anak Aku pansut ari Ejip.”
16 Lebuh nemu diri udah ditipu orang ke nemu nujum nengah bintang, Herod balat amat pedis ati. Nya alai iya ngasuh orang munuh semua anak lelaki ke beumur dua taun ke baruh, ba Betlehem enggau ba endur ke semak enggau Betlehem. Iya nentuka umur bala anak mit nya nitihka utai ke ditemu iya ari orang ke nemu nujum nengah bintang.
17 Tu ngamatka jaku ke disebut nengah Nabi Jeremiah:
18 “Bisi nyawa orang bekeduie nyabak didinga ba Ramah. Nya nyawa Rachel ke nyabakka bala anak iya. Iya enggai diperindang laban sida udah nadai agi.”
19 Pengudah Herod mati, melikat Jehovah ayan dalam mimpi Josep. Maya nya Josep agi ba Ejip.
20 Ku melikat nya madahka, “Angkat, lalu bai anak mit nya enggau indai iya ngagai menua Israel. Laban orang ke deka munuh anak mit nya udah mati.”
21 Nya alai Josep angkat, lalu mai anak mit nya enggau indai iya ngagai menua Israel.
22 Tang Josep takut mansang ngagai Judea pengudah ninga Arkelaus nganti apai iya Herod nyadi raja Judea. Nambahka nya, ketegal udah nerima jaku tangkan ari Petara dalam mimpi, iya mupuk ngagai Galili
23 lalu diau ba nengeri Nasaret. Tu ngamatka jaku ke dipadah nengah bala nabi: “Iya deka dikumbai orang Nasaret.”*
Nota Kaki
^ Peda Penerang Leka Jaku.
^ Tauka “Messiah; Iya ke Ditata; Iya ke Dipilih Petara.”
^ Engka diambi ari leka jaku Hebrew “sumbuk.”
