Matthew 15:1-39
15 Orang Parisi enggau bala penulis Adat datai ari Jerusalem ngagai Jesus. Ku sida:
2 “Nama kebuah bala murid nuan ngelanggar adat asal aki ini kitai? Sida enda masu jari* sebedau makai.”
3 Ku Jesus nyaut sida: “Nama kebuah kita ngelanggar pesan Petara ketegal adat asal kita?
4 Ambika chunto, Petara madahka, ‘Bebasaka apai enggau indai nuan,’ lalu ‘Orang ke bejai apai indai diri, patut diukum bunuh.’
5 Tang ku kita, ‘Enti orang madah ngagai apai tauka indai iya: “Utai ti dikemisi aku, ke beguna ba kita, nyadika pemeri ke Petara,”
6 iya tau enda ibuh bebasaka apai indai iya agi.’ Nya alai, kita ngasuh jaku Petara nadai agi reti ketegal adat asal kita.
7 Kita tu orang ke pura-pura ngapa. Amat jaku Isaiah lebuh iya benabika pasal kita:
8 ‘Sida bebasaka Aku ngena mulut aja, tang ati sida jauh ari Aku.
9 Nadai reti sida majak nyembah Aku, laban utai ke diajar sida semina adat mensia.’”
10 Udah nya, Jesus ngangauka orang mayuh ngagai iya. Ku iya bejaku: “Pendingka meh ngambika kita mereti:
11 Utai ti tama ngagai nyawa orang, nadai ngasuh iya enda tuchi. Tang utai ti pansut ari nyawa iya, nya meh utai ti ngasuh iya enda tuchi.”
12 Udah nya, bala murid iya datai lalu bejaku enggau iya: “Kati nuan nemu orang Parisi pedis ati* ninga utai ti disebut nuan?”
13 Disaut Jesus: “Semua utai ti tumbuh, ti ukai ditanam Apai aku ti ba serega, deka dichabut magang.
14 Anang ibuhka sida. Sida nya malin* ke buta. Enti malin ke buta ngiring orang ke buta, seduai iya deka sama labuh ngagai lubang.”
15 Tang ku Peter bejaku: “Terangka reti jaku sempama nya ngagai kami.”
16 Ku Jesus bejaku: “Kati kita mega agi enda mereti?
17 Kati kita enda nemu? Utai ti tama ngagai nyawa, tama ngagai perut, lalu udah nya pansut ari tubuh.
18 Tang utai ti pansut ari nyawa, datai ari ati. Nya meh utai ti ngamahka mensia.
19 Laban ari ati pansut runding ti jai, ke ngasuh orang deka bebunuh, butang,* ngereja ulah seks ti kamah,* ngenchuri, besaksi bula, enggau bejaku ngelaban utai ti tuchi.
20 Nya meh utai ti ngamahka mensia. Tang makai ngena jari ti enda dibasu,* enda ngamahka mensia.”
21 Jesus angkat ari endur nya lalu mupuk ngagai endur semak nengeri Tirus enggau Sidon.
22 Siku indu orang Finisia* ari endur nya, mansang ngagai Jesus lalu ngangau: “Kasihka aku, Tuan, Anak David. Anak indu aku balat merinsa ketegal dirasuk melikat ti jai.”
23 Tang Jesus enda nyaut iya seleka. Bala murid Jesus datai lalu bejaku enggau Jesus: “Asuh indu nya pulai, laban iya rauh-rauh betitihka kitai.”
24 Jesus lalu nyaut: “Aku udah diasuh datai semina ngagai orang Israel, ke baka bedus ti tesat.”
25 Tang indu nya datai lalu besugang di mua Jesus lalu bejaku: “Tuan, tulung meh aku!”
26 Ku Jesus nyaut: “Aku enda patut ngambi pemakai ari anak mit, lalu nikauka iya ngagai anak ukui.”
27 Indu nya lalu nyaut: “Nya endang amat, Tuan, tang indah anak ukui deh makai teda pemakai ti labuh ari mija tuan iya.”
28 Jesus lalu nyaut iya: “Endu, besai amat pengarap nuan. Utai ti dikedekaka nuan, deka nyadi.” Anak indu iya lalu gerai tekala nya.
29 Jesus mupuk ari endur nya, lalu bejalai ngagai endur ke semak Danau Galili. Iya niki ngagai bukit, lalu duduk ba dia.
30 Udah nya, mayuh amat orang datai ngagai iya, mai orang ke pinchat, tachat, buta, bisu, enggau mayuh orang sakit ke bukai. Sida ngengkahka semua orang nya semak kaki Jesus, lalu iya ngeraika sida.
31 Orang mayuh balat alit ati meda orang ke bisu ulih bejaku, orang ke pinchat ulih bejalai, orang ke tachat ulih digeraika, lalu orang ke buta ulih meda. Sida lalu ngemuliaka Petara orang Israel.
32 Jesus ngangauka bala murid iya lalu bejaku: “Kasih aku meda sida. Sida udah tiga hari enggau aku, lalu nadai utai diempa. Aku enggai ngasuh sida pulai enggau perut lapar, enggaika sida luput ba rantau jalai.”
33 Tang ku bala murid iya bejaku: “Endur tu jauh, dini alai kami ulih ngiga roti ti chukup ke orang mayuh tu?”
34 Jesus lalu nanya sida: “Kita bisi berapa iti tuku roti?” Ku sida nyaut: “Tujuh iti, enggau beberapa iku ikan ti mit.”
35 Pengudah ngasuh orang mayuh duduk ba tanah,
36 Jesus ngambi tujuh iti tuku roti enggau ikan nya. Pengudah iya besampi meri terima kasih, iya mechahka roti nya, lalu meri iya ngagai bala murid iya. Sida lalu nyadung pemakai nya ngagai bala mayuh.
37 Semua sida bela makai magang lalu kenyang. Udah nya, bala murid iya ngumpul tujuh bakul besai ti penuh laban teda pemakai nya.
38 Pemayuh orang ke makai nya 4,000 iku lelaki. Tu enda nyengkaum pemayuh bala sida ke indu enggau bala anak mit.
39 Pengudah Jesus ngasuh orang mayuh pulai, iya nepan perau ngagai menua Magadan.
Nota Kaki
^ Iya nya, enda dibasu nitihka adat orang bansa Judah.
^ Jaku Asal, “labuh.”
^ Iya nya, orang ke ngiring.
^ Orang ti udah kawin ngereja ulah seks enggau orang ke ukai kaling pengidup iya.
^ Jaku Gerika, “por·nei′a.” Peda Penerang Leka Jaku.
^ Iya nya, enda dibasu nitihka adat orang bansa Judah.
^ Tauka “Kanaan.”
