Mark 6:1-56
6 Jesus mupuk ari endur nya lalu pulai ngagai menua asal iya. Bala murid iya mega nitihka iya.
2 Maya Hari Sabat, iya ngajar ba balai gempuru. Mayuh ari sida ke ninga iya balat alit ati, lalu ku sida bejaku: “Ari ni iya belajarka semua utai tu? Nama kebuah iya amat bepenemu-dalam? Lalu baka ni iya bulih kuasa kena ngereja pengawa ajih baka tu?
3 Endaka iya tu tukang kayu, anak Maria sereta menyadi sida James, Josep, Judas, enggau Simon? Ukai enda bala menyadi indu iya diau ditu sama enggau kitai?” Nya alai, sida enggai arapka iya.*
4 Tang ku Jesus bejaku ngagai sida: “Nabi endang dibasa orang ba dini-dini endur, tang ukai ba menua enggau ba ruang bilik iya empu.”
5 Nya alai, iya enda ngereja mayuh pengawa ajih ba dia. Tang iya semina ngengkahka jari iya ba atas sekeda orang ke sakit, lalu ngeraika sida.
6 Iya balat alit ati laban sida enda arap. Udah nya, iya ngagai semua genturung pendiau ba serata endur nya, lalu ngajar orang ba dia.
7 Iya ngangauka 12 iku rasul iya, meri sida kuasa atas bala melikat ti jai, lalu ngasuh sida bejalai dua iku dua iku.
8 Iya enda ngasuh sida mai nama-nama utai baka roti, kantung pemakai, tauka duit temaga dalam kambut duit sida. Sida semina tau mai siti tungkat
9 sereta ngena sepasang kasut, tang enda ibuh mai baju kena besilih.*
10 Udah nya, iya madah ngagai sida: “Lebuh kita datai ba siti-siti nengeri, diau ba rumah orang siku, nyentuk ke kita mupuk ari nengeri nya.
11 Lalu enti bisi orang ba siti-siti endur enggai nerima kita tauka enggai mendingka kita, tesai debu ari kaki kita lebuh kita angkat ari endur nya, nyadika tangkan ke sida.”
12 Udah nya, sida mupuk lalu nusui berita madahka orang patut nesal ati ke dosa diri.
13 Lalu sida muru mayuh melikat ti jai sereta ngunsut mayuh orang ke sakit ngena minyak, lalu ngeraika sida.
14 Maya nya, Raja Herod* bisi ninga pasal Jesus, laban nama Jesus udah ditemu mayuh orang. Bisi orang nyebut: “John Pemaptisa udah diangkatka ari mati. Nya kebuah iya bisi kuasa ngaga kereja ajih.”
15 Sekeda madahka: “Iya nya Elijah.” Lalu sekeda ke bukai madahka: “Iya nya nabi, baka siku ari bala nabi ke dulu kelia.”
16 Tang lebuh Herod ninga nya, iya lalu bejaku: “John Pemaptisa, ke udah dipumpung aku pala, udah diangkatka ari mati.”
17 Herod udah jadi enggau Herodias, bini menyadi lelaki iya Philip. Ketegal deka ngenyamaika ati Herodias, Herod udah ngasuh orang nangkap John, ngerantai iya, lalu nutup iya dalam rumah jil.
18 Laban John udah suah madah ngagai Herod: “Nuan salah jadi enggau bini menyadi lelaki nuan.”
19 Nya alai, Herodias bedendam ngagai John lalu deka munuh iya. Tang iya enda ulih ngereja nya,
20 laban Herod nyaga John. Herod takutka John, laban Herod nemu John orang ke kudus sereta lurus. Tiap kali Herod ningaka John, runding iya charut, lalu iya enda nemu nama patut digaga iya. Taja pia, Herod tetap rindu ninga utai ku John.
21 Peluang ke dianti Herodias pan datai maya hari pengada Herod. Herod nyediaka pengerami makai besai enggau bala pemesai, bala tuai soldadu, sereta orang ke besai pangkat ba menua Galili.
22 Anak indu Herodias datai lalu betanda ba mua bala temuai. Lebuh meda nya, Herod enggau bala temuai iya gaga ati. Nya alai, raja madah ngagai indu nya: “Pinta meh sebarang utai ti dikedekaka nuan ari aku, lalu aku deka meri utai nya ngagai nuan.”
23 Iya indah besumpah ngagai indu nya: “Aku deka meri ngagai nuan sebarang utai ti dipinta nuan. Indah setengah ari menua* ti dipegai aku deh, deka aku beri ngagai nuan.”
24 Nya alai, indu nya pansut, lalu nanya indai iya: “Nama utai ti patut dipinta aku?” Indai iya nyaut: “Pala John Pemaptisa.”
25 Indu nya lalu beguai-guai pansut betemu enggau raja nya. Ku indu nya: “Aku minta nuan meri ngagai aku diatu pala John Pemaptisa ba atas talam.”
26 Pekara nya ngasuh raja balat tusah ati. Tang ketegal iya udah besumpah ba mua bala temuai, iya enggai nulak peminta indu nya.
27 Nya alai, raja lalu tekala nya ngasuh siku jejaga mai pala John. Jejaga nya mupuk lalu mumpung pala John dalam rumah jil.
28 Jejaga nya mai pala John ngena talam, lalu meri pala nya ngagai indu nya. Indu nya lalu meri pala nya ngagai indai iya.
29 Lebuh bala murid John ninga pasal nya, sida datai ngambi bangkai John lalu nguburka iya.
30 Bala rasul begelumu ngelingi Jesus, lalu madah ngagai iya semua utai ti udah dikereja enggau diajar sida.
31 Jesus lalu bejaku ngagai sida: “Aram kitai mupuk ngagai endur ti sunyi, kediri kitai aja lalu belelak ba dia.” Iya nyebut munyi nya laban orang ke datai enggau ke pulai mayuh amat, nyentukka sida nyau nadai peluang alai makai.
32 Nya alai, sida mupuk kediri ngena perau ngagai endur ti sunyi.
33 Tang bisi orang meda sida bekejang, lalu mayuh orang nemu pasal nya. Nya alai, orang berumban-rumban datai ari semua nengeri, lalu datai ba endur nya dulu agi ari sida.
34 Lebuh Jesus pansut ari perau, iya meda mayuh amat orang ba dia. Iya berasai kasihka sida, laban sida baka bedus ti nadai orang ngibun. Nya alai, iya ngajar sida mayuh utai.
35 Maya nya, hari pan udah lemai. Bala murid iya datai lalu bejaku enggau iya: “Endur tu jauh lalu hari pan nyau udah laun.
36 Asuh sida mupuk, ngambika sida bejalai ngagai endur ke bisi genturung pendiau, lalu meli pemakai ke diri empu.”
37 Disaut Jesus: “Kita empu meri sida utai diempa.” Ku sida nanya: “Kati kami patut ngena 200 denari* meli roti ke diempa semua orang tu?”
38 Ku iya madah ngagai sida: “Uji peda dulu berapa iti tuku roti ke dikemisi kita.” Pengudah meresa, sida madah ngagai iya: “Lima iti tuku roti enggau dua iku ikan.”
39 Udah nya, iya ngasuh semua orang duduk dalam raban ba atas rumput.*
40 Semua orang pan duduk nitihka raban. Sekeda raban bisi 100 iku orang, lalu sekeda nya bisi 50 iku orang.
41 Iya ngambi lima iti tuku roti enggau dua iku ikan nya, engkadah ke langit, lalu besampi meri terima kasih.* Pengudah mechahka roti nya, iya nyuaka roti nya ngagai bala murid iya, lalu sida nyadung roti nya ngagai orang mayuh. Iya mega magi ikan dua iku nya ke semua orang.
42 Semua orang bela makai lalu kenyang magang.
43 Udah nya, bala murid iya ngumpul 12 bakul ti penuh laban teda roti. Lalu sida mega ngumpul teda ikan.
44 Pemayuh sida ke lelaki ke makai roti nya bisi 5,000 iku.
45 Sepengudah nya, Jesus ngasuh bala murid iya nepan perau lalu mupuk dulu ke seberai ngagai Betsaida. Lalu iya empu ngasuh orang mayuh pulai.
46 Pengudah orang mayuh mupuk, iya niki ngagai bukit, besampi.
47 Lebuh hari nyau malam, perau ke ditepan bala murid iya benung ba tengah danau. Tang Jesus agi kediri ba darat.
48 Maya tumu pagi,* Jesus meda sida bebendar amat bekayuh nanjak ribut. Nya alai, iya bejalai atas ai mansang ngagai sida, baka ke deka mansa sida.
49 Lebuh sida meda iya bejalai ba atas ai, sida lalu nyerauh: “Bisi ayas utai!”
50 Laban semua sida balat takut lebuh meda iya. Tang Jesus tekala nya bejaku ngagai sida: “Anang takut! Anang irau! Aku tu.”
51 Iya nepan perau enggau sida, lalu ribut pan teduh. Sida balat alit ati,
52 laban sida agi enda mereti pasal tuku roti ke disadung Jesus. Pekara nya agi bedau ulih diperagam ati sida.
53 Sida pan datai ba seberai, lalu sangkai ba Genesaret. Ba dia meh sida nanchangka perau.
54 Lebuh sida pansut ari perau, orang mayuh lalu tekala nya ngelala Jesus.
55 Nya alai, sida berumban nesau orang mayuh ba serata menua nya, ngambika sida ngangkatka orang ke sakit ngena peninduk mit ngagai Jesus.
56 Enda ngira dini endur Jesus, sekalika ba genturung pendiau tauka ba nengeri tauka ba ladang, orang ba dia mai orang ke sakit ke pasar, lalu sida minta kasih ari iya, ngambika iya nejuka sida negu ujung gari luar iya. Semua orang ke negu ujung gari iya, gerai magang.
Nota Kaki
^ Tauka “labuh ketegal iya.”
^ Jaku Asal, “enda ibuh ngena dua pasang gari.”
^ Iya nya, Herod Antipas. Peda Penerang Leka Jaku.
^ Jaku Asal, “perintah.”
^ Sesingkap denari sama penyampau enggau gaji sehari.
^ Jaku Asal, “rumput gadung.”
^ Tauka “besampi minta berekat.”
^ Jaku Asal, “gintir jaga keempat.” Iya nya, kira pukul tiga pagi nyentuk ngagai pukul enam pagi.
