Luke 4:1-44
4 Udah nya, Jesus ke penuh laban kuasa kudus Petara mupuk ari Sungai Jordan. Iya diiring kuasa kudus Petara ngagai menua puang,
2 lalu ba dia, Sitan* nguji iya. Iya nadai makai pengelama 40 hari. Nya alai, pengudah timpuh nya abis, iya berasai lapar.
3 Sitan lalu bejaku ngagai iya: “Enti nuan amat anak Petara, asuh batu tu nyadi roti.”
4 Tang ku Jesus nyaut: “Endang udah ditulis: ‘Mensia enda ulih beridup ba roti aja.’”
5 Udah nya, Sitan mai iya ngagai endur ti tinggi, lalu dalam sekejap mata, Sitan mandangka ngagai iya semua perintah ba dunya.
6 Udah nya, Sitan bejaku ngagai iya: “Aku deka meri nuan semua kuasa enggau mulia ari perintah tu, laban semua utai tu udah diberi ngagai aku, lalu aku ulih meri ngagai sapa-sapa ke dikedekaka aku.
7 Semua tu deka diempu nuan magang, enti nuan besugang lalu nyembah aku sekali aja.”
8 Ku Jesus nyaut iya: “Endang udah ditulis: ‘Nuan patut besugang ngagai Petara nuan, Jehovah, lalu patut nyembah Iya siku aja.’”
9 Udah nya, Sitan mai iya ngagai Jerusalem, lalu ngengkahka iya ba endur ti pemadu tinggi ba Rumah Sembiang. Lalu ku Sitan: “Enti nuan amat anak Petara, terejun nuan ari tu,
10 laban endang udah ditulis: ‘Petara deka meri pesan ngagai bala melikat Iya ngambika nyaga nuan,’
11 lalu ‘Sida deka nyambut nuan sebedau kaki nuan terengkah ba batu.’”
12 Ku Jesus nyaut Sitan: “Endang udah dipadah: ‘Nuan enda tau nguji Petara nuan, Jehovah.’”
13 Pengudah Sitan tembu nguji Jesus, iya ninggalka Jesus lalu nganti maya ti ngena alai nguji Jesus baru.
14 Udah nya, Jesus ke penuh laban kuasa kudus Petara pulai ngagai Galili. Berita pasal pengawa iya ti manah ngelekai ngagai serata endur ke ngelingi menua nya.
15 Iya mega belabuh ngajar ba balai gempuru, lalu semua orang muji iya.
16 Udah nya, iya ngagai Nasaret, endur iya dibesaika. Baka ke suah digaga iya maya Hari Sabat, iya ngagai balai gempuru. Lebuh iya bediri deka macha,
17 gulung surat Nabi Isaiah disuaka ngagai iya. Iya muka gulung surat nya lalu ngiga ayat ke madahka:
18 “Kuasa kudus Jehovah bisi ba aku, laban Iya udah milih* aku ngambika aku nusui Berita Manah ngagai orang ke seranta. Iya ngirumka aku madahka pengelepas ngagai orang ke kena tangkap sereta madahka orang ke buta deka meda. Iya mega ngirumka aku ngambika ngelepaska orang ke kena tekan,
19 lalu madahka pasal maya sida deka diberekat Jehovah baru.”*
20 Udah nya, Jesus ngulungka surat nya, nyuaka iya ngagai orang ke gawa ba dia, lalu duduk. Semua orang ba balai gempuru nya bela merening ngagai iya magang.
21 Iya lalu madah ngagai sida: “Seharitu, ayat ke baru didinga kita tadi udah dikeamatka.”
22 Semua sida bela bejaku muji Jesus sereta alit ati ninga jaku iya ti negu ati sida. Ku sida: “Endaka iya tu anak Josep?”
23 Iya lalu bejaku ngagai sida: “Kita tentu deka nyebut jaku tu ngagai aku, ‘Lutur, geraika diri empu. Kami udah ninga nuan ngereja mayuh utai ba Kapernaum. Kereja mega utai nya ba menua nuan empu ditu.’”
24 Ku iya agi: “Enggau bendar aku madah ngagai kita: Nadai nabi diterima orang ba menua iya empu.
25 Ambika chunto, maya jeman Elijah menya, hari enda ujan pengelama tiga taun setengah, lalu lapar pungkang ti balat, nyadi ba serata menua Israel. Taja pan bisi mayuh indu balu ba dia,
26 Elijah enda diasuh datai ngagai sida. Tang iya diasuh ngagai siku indu balu ke diau ba Sarepat, ba menua Sidon.
27 Pia mega, maya jeman Nabi Elisa menya, bisi mayuh orang ke sakit lan* ba menua Israel. Tang nadai siku sida digeraika, kelimpah ari siku orang Siria ke benama Naman.”
28 Pengudah ninga nya, semua orang ba balai gempuru nya balat pedis ati.
29 Sida angkat, lalu muru iya ari nengeri nya. Sida mai iya ngagai tebing bukit alai nengeri nya didirika, deka ngeju iya ari nya.
30 Tang iya enselit pansut nengah bala sida, lalu neruska pejalai iya.
31 Udah nya, iya mupuk ngagai nengeri Kapernaum ba Galili, lalu ngajar orang ba dia maya Hari Sabat.
32 Lalu orang ba dia alit bendar ati enggau chara iya ngajar, laban utai ke diajar iya datai ari Petara.*
33 Ba balai gempuru nya, bisi siku lelaki ke dirasuk melikat ti jai. Iya nyerauh inggar amat. Ku iya:
34 “Jesus orang Nasaret, nama kebuah nuan kitu? Kati nuan datai deka ngemunaska kami? Aku nemu sapa nuan ke bendar. Nuan nya Nembiak ti Kudus ke dianjung Petara!”
35 Jesus lalu ngerara melikat ti jai nya: “Anang bejaku. Pansut ari iya!” Pengudah ngempaska lelaki nya ba mua orang mayuh, melikat ti jai nya pansut tang enda ngemediska lelaki nya.
36 Semua orang ba dia balat alit ati lalu bejaku enggau pangan diri. Ku sida: “Dinga jaku iya ti bisi kuasa! Indah bala melikat ti jai ngasika iya, lalu sida pansut ari orang.”
37 Ketegal nya, berita pasal Jesus ngelekai ngagai tiap iti endur ba menua nya.
38 Pengudah ninggalka balai gempuru, Jesus tama ngagai rumah Simon. Nyadi mentua indu Simon merinsa ketegal sakit chelap angat. Nya alai, sida minta Jesus nulung iya.
39 Jesus bediri ngimbai iya lalu ngeraika iya. Tekala nya, iya angkat lalu nyediaka pemakai ke sida.
40 Lebuh mata panas padam, semua sida ke sakit laban mayuh macham pemedis dibai ngagai Jesus. Jesus ngengkahka jari iya ba atas tiap iku sida lalu ngeraika sida.
41 Bala melikat ti jai mega pansut ari mayuh orang. Sida nyerauh lalu bejaku: “Nuan tu Anak Petara.” Tang Jesus ngerara sida lalu enda ngasuh sida bejaku, laban sida nemu iya nya Kristus.
42 Lebuh mata panas tumbuh, iya angkat lalu mupuk ngagai siti endur ti sunyi. Tang orang mayuh begigaka iya. Lebuh sida udah tetemuka iya, sida nguji nagang iya ninggalka sida.
43 Tang ku Jesus bejaku ngagai sida: “Aku mega patut nusui Berita Manah pasal Perintah Petara ba endur bukai. Laban nya tuju aku dikirumka.”
44 Nya alai, iya mupuk nusui Berita Manah dalam balai gempuru ba serata menua Judea.
Nota Kaki
^ Jaku Gerika, “di·a′bo·los.” Leka jaku tu dikena ba orang ke ngenyaika nama manah orang bukai.
^ Jaku Asal, “nata.” Peda Penerang Leka Jaku, “Tata.”
^ Tauka “pasal taun ti diterima Jehovah.”
^ Peda Penerang Leka Jaku.
^ Jaku Asal, “laban iya ngajar baka orang ke bekuasa.”
