Luke 20:1-47
20 Nyadi sekali, lebuh Jesus benung ngajar ba Rumah Sembiang sereta nusui Berita Manah, bala tuai imam, bala penulis Adat, enggau bala tuai bansa orang Judah datai
2 lalu bejaku ngagai iya: “Padahka ngagai kami, ari ni nuan bulih kuasa? Sapa ke meri nuan kuasa ngereja utai tu?”
3 Disaut Jesus: “Aku mega bisi siti tanya ke kita. Padahka ngagai aku:
4 Sapa ke nganjung John maptisa orang? Petara ke ba serega tauka mensia?”
5 Sida lalu berandau enggau pangan diri. Ku sida: “Enti kitai nyebut, ‘Petara,’ iya deka nyebut ngagai kitai, ‘Enti pia, nama kebuah kita enda arapka iya deh?’
6 Tang enti kitai nyebut, ‘Mensia,’ orang mayuh deka nuku kitai ngena batu, laban sida pechaya John nya nabi.”
7 Nya alai, sida madahka sida enda nemu ari ni John bulih kuasa iya.
8 Jesus bejaku ngagai sida: “Enti pia, aku pan enggai madah ngagai kita sapa ke meri aku kuasa ngereja semua utai tu.”
9 Udah nya, iya madahka jaku sempama tu ngagai orang mayuh: “Siku orang nanam anggur, lalu iya nyua kebun anggur nya ngagai orang. Udah nya, iya lama amat bejalai ngagai menua bukai.
10 Lebuh musin ngumpul buah anggur datai, iya ngasuh siku ulun iya mansang ngagai bala orang ke nyua kebun anggur nya ngambi buah ke endang sigi ungkup iya. Tang sida malu ulun nya lalu ngasuh iya pulai nadai mai utai.
11 Udah nya, iya ngasuh siku agi ulun kin. Tang sida mega malu sereta ngeleseka* iya, lalu ngasuh iya pulai nadai mai utai.
12 Udah nya, iya ngasuh ulun ketiga kin. Tang sida mega nyamah iya lalu muai iya ari kebun anggur nya.
13 Nya alai, orang ke bempu kebun anggur nya berunding, ‘Nama agi patut digaga aku? Aku deka ngasuh anak ke dikesayauka aku kin. Sida tentu deka bebasaka iya.’
14 Tang lebuh bala orang ke nyua kebun anggur nya meda iya, sida lalu bejaku enggau pangan diri, ‘Tu orang ke deka bempu kebun anggur tu. Aram kitai munuh iya ngambika semua reta pesaka iya diempu kitai.’
15 Nya alai, sida muai iya ari kebun anggur nya lalu munuh iya. Nama deka dikereja orang ke bempu kebun anggur nya ngagai sida?
16 Iya deka datai lalu munuh bala orang ke nyua kebun anggur nya, lalu nyerahka kebun nya ngagai orang bukai.”
Lebuh orang mayuh ninga nya, sida lalu bejaku: “Arapka utai nya enda nyadi!”
17 Tang Jesus malik ngagai sida lalu bejaku: “Enti pia, nama reti ayat tu: ‘Batu ti dibuai tukang rumah udah nyadi batu sukut ti pemadu beguna’?
18 Tiap iku orang ke labuh ninggang batu nya deka redak, lalu barang sapa ke ditinggang batu nya deka anchur.”
19 Lebuh bala penulis Adat enggau bala tuai imam nemu Jesus bejaku pasal sida ngena jaku sempama nya, sida bebendar nguji deka nangkap iya tekala nya. Tang sida takutka orang mayuh.
20 Nya alai, sida bendar amat ngemataka iya. Udah nya, sida belalai ngupah orang ngambika ngaga diri nyadi orang ke lurus kena manjuk iya ngena jaku iya empu. Enggau nya, sida ulih nyerahka iya ngagai perintah enggau gabenor.
21 Orang ke diupah nya nanya Jesus: “Pengajar, kami nemu nuan nyebut sereta ngajar utai ti betul. Nuan enda bechiping, tang ngajar jalai Petara beduduk ba utai ti bendar.
22 Kati tau kitai mayar chukai ngagai raja Rome?”*
23 Tang Jesus nemu sida pura-pura ngapa. Nya alai, iya madah ngagai sida:
24 “Pandangka ngagai aku sesingkap duit seling denari.* Gambar sapa enggau gelar sapa ba duit tu?” Ku sida nyaut: “Raja Rome.”
25 Iya bejaku ngagai sida: “Enti pia, utai ke enggi raja Rome, beri ngagai raja Rome, tang utai ke enggi Petara, beri ngagai Petara.”
26 Nyadi, sida enda ulih manjuk Jesus ba mua orang mayuh. Sida balat alit ati ninga saut iya. Nya alai, sida enda bemunyi.
27 Tang sekeda orang Saduki ke enda arap pasal orang ti udah mati ulih angkat idup baru, datai lalu nanya Jesus:
28 “Pengajar, Moses bisi nulis, ‘Enti siku lelaki mati sebedau iya bisi anak, menyadi lelaki iya patut jadi enggau balu nya, ngambika lelaki ke udah mati nya bisi peturun.’
29 Nyadi sekali, bisi tujuh iku orang diri menyadi. Iya ke tuai bebini tang mati sebedau iya bisi anak.
30 Nya alai menyadi ke lumur dua,
31 lalu udah nya menyadi ke lumur tiga, jadi enggau indu nya. Lalu kesemua sida tujuh iku menyadi nya udah jadi enggau indu nya. Tang semua sida mati sebedau bisi anak.
32 Pengujung iya, indu nya mega mati.
33 Nyadi lebuh orang ke mati diangkatka idup baru ila, sapa ke bempu bini nya? Laban semua sida tujuh iku menyadi nya kala jadi enggau iya.”
34 Ku Jesus nyaut sida: “Orang ba dunya* tu nikah,
35 tang orang ke mati ti dikumbai layak diidupka baru ila lalu bulih pengidup ba dunya ti deka datai, enda nikah.
36 Kebendar iya, sida mega nyadi baka melikat lalu enda ulih mati. Ketegal sida diidupka baru, sida nyadi anak Petara.
37 Ba cherita pasal babas ti diempa api, Moses kala nyebut pasal orang ke mati ti diidupka baru. Maya nya, iya madahka Jehovah nya ‘Petara Abraham, Isak, enggau Jakop.’
38 Iya ukai Petara ke orang ti mati, tang Petara ke orang ti idup, laban ba mata Iya semua sida agi idup.”
39 Sekeda penulis Adat madah ngagai iya: “Pengajar, manah utai ku nuan nya.”
40 Laban sida enda berani agi nanya nama-nama utai ngagai iya.
41 Jesus lalu nanya sida: “Baka ni ku orang tau ngumbai Kristus nya anak David?
42 Laban David empu madah dalam bup Masmur, ‘Ku Jehovah bejaku enggau Tuan aku: “Duduk ba sepiak kanan Aku,
43 datai ke Aku udah ngaga munsuh nuan nyadika pelasar kaki nuan.”’
44 David empu ngumbai iya Tuan. Nya alai, baka ni ku iya tau nyadi anak David?”
45 Udah nya lebuh semua orang agi mendingka iya, iya bejaku ngagai bala murid iya:
46 “Bejimat kita ari bala penulis Adat, ke rindu bejalai ngena baju jubah sereta rindu dipebasa orang ba sebelah pasar. Sida rindu duduk ba endur ti pemadu mua* ba balai gempuru, enggau rinduka endur ti pemadu badas maya pengerami makai besai.
47 Sida ngerampas rumah* indu ke balu, lalu sida lama besampi ngambika dipeda orang. Sida deka diukum berat agi.”
Nota Kaki
^ Tauka “ngemaluka.”
^ Jaku Gerika, “Kaisar?”
^ Sesingkap denari sama penyampau enggau gaji sehari.
^ Tauka “jeman; sistem dunya.” Peda Penerang Leka Jaku, “Sistem dunya.”
^ Tauka “manah.”
^ Tauka “reta.”
