Josua 9:1-27
9 Semua raja ba sepiak barat Sungai Jordan ke bisi ba kawasan gunung, ba Shefilah, ba sepemanjai tebing Tasik Tengah,* sereta ba depan Lebanon udah ninga pasal utai ke nyadi. Sida nya bala raja orang Het, orang Amor, orang Kanaan, orang Peris, orang Ibi, enggau orang Jebus.
2 Nya alai, sida bepakat enggau pangan diri deka ngelaban Josua enggau orang Israel.
3 Orang Gibeon mega bisi ninga pasal utai ke udah digaga Josua ngagai kuta Jeriko enggau kuta Eyai.
4 Nyadi, sida ngereja utai enggau pintar. Sida nyimpan pemakai ba dalam kain guni ke udah lama, lalu sida mega mai kambut kulit wain ke udah lama sereta betampal. Semua nya diengkahka sida ba atas keledai sida.
5 Sida mega ngena selipar ke udah lama sereta betampal. Gari ke dikena sida mega udah lama. Semua roti ke dibai sida rangkai sereta anchur.
6 Udah nya, sida ngagai kem ba Gilgal lalu betemu enggau Josua. Ku sida madah ngagai iya enggau orang Israel: “Kami datai ari menua ti jauh. Gaga meh siti sempekat enggau kami.”
7 Tang ku orang Israel nyaut orang Ibi nya: “Nama kebuah kami patut ngaga sempekat enggau kita? Ni nemu kita engka diau enda jauh ari tu.”
8 Ku sida nyaut Josua: “Kami sanggup deka bekereja ke* nuan, tuan.”
Lalu ku Josua nanya sida: “Sapa kita tu? Lalu ari ni penatai kita?”
9 Ku sida nyaut iya: “Tuan, kami datai ari menua ti jauh ketegal kami bebasaka nama Jehovah, Petara nuan. Mayuh orang nemu pasal Iya, lalu kami udah ninga semua utai ke udah digaga Iya ba Ejip.
10 Kami mega bisi ninga pasal semua utai ke udah digaga Iya ngagai dua iku raja orang Amor ke ba sepiak timur Sungai Jordan, iya nya Raja Sihon ari Hesbon enggau Raja Og ari Basan ke diau ba Astarot.
11 Nya alai, bala tuai kami enggau rayat ba menua kami madahka kami: ‘Sediaka bekal lalu alai kita mansang betemu enggau sida. Padah ngagai sida: “Kami deka bekereja ke kita. Nyadi, gaga siti sempekat enggau kami.”’
12 Maya kami mupuk ari rumah, roti ke nyadi bekal kami tu agi angat. Tang diatu peda kita, roti tu nyau rangkai sereta anchur.
13 Lalu kambut kulit wain tu agi baru maya kami ngisi iya, tang diatu nyau udah charik. Gari kami enggau selipar kami pan nyau jai laban kami udah jauh amat bejalai.”
14 Orang Israel pan ngambi pemakai nya lalu meresa pemakai nya, tang sida enda minta iring ari Jehovah.
15 Udah nya, Josua ngaga siti sempekat enggau sida ngambika ulih bebaik enggau sida lalu enda munuh sida. Bala tuai orang Israel mega besumpah deka ngamatka sempekat nya.
16 Tiga hari pengudah sida ngaga sempekat nya, baru sida nemu orang Gibeon diau enda jauh ari sida.
17 Ba hari ti ketiga, orang Israel mupuk ngagai kuta orang Gibeon. Tu meh kuta orang Gibeon: Kuta Gibeon, kuta Kefirah, kuta Berot, enggau kuta Kiriat-jearim.
18 Tang orang Israel enda nyerang sida laban bala tuai orang Israel udah besumpah dalam nama Jehovah, Petara orang Israel. Nya alai, semua orang Israel berengkah mutap ngelaban bala tuai sida.
19 Lalu ku semua bala tuai orang Israel madahka sida: “Ketegal kami udah besumpah enggau sida dalam nama Jehovah, Petara orang Israel, kitai enda tau ngemediska sida.
20 Kitai mesti nejuka sida idup kena ngamatka semaya kitai enggau sida, enggaika Petara ringat ngagai kitai.”
21 Ku bala tuai orang Israel nampung baru: “Tejuka sida idup, tang sida mesti ngumpul kayu enggau nyauk ai ke orang Israel.” Nya meh utai ke udah disemayaka bala tuai orang Israel enggau orang Gibeon.
22 Josua ngangauka orang Gibeon lalu madah ngagai sida: “Nama kebuah kita nipu kami? Kebendar iya, kita diau enda jauh ari kami. Tang nama kebuah kita madah kita datai ari menua ti jauh?
23 Berengkah ari diatu, kita deka ditinggang sumpah. Kita deka seruran nyadi ulun ke ngumpul kayu enggau nyauk ai ke rumah Petara aku.”
24 Ku sida nyaut Josua: “Tuan, kami udah ninga pasal Petara nuan, Jehovah, udah madah ngagai nembiak Iya, Moses, ngambika meri semua menua tu ngagai kita, lalu munaska semua orang ke bisi ba menua tu. Kami amat takut enggaika kita munuh kami. Nya kebuah kami ngereja tu.
25 Diatu kami di baruh kuasa nuan, tuan. Nya alai, kami deka setuju enggau sebarang utai ke diasaika nuan betul sereta manah.”
26 Nyadi, Josua pan ngelindung sida lalu enda ngemendarka orang Israel munuh sida.
27 Ba hari nya, Josua ngasuh orang Gibeon ngumpul kayu enggau nyauk ai ke orang Israel, enggau ke alta Jehovah ba endur ke dipilih Iya. Nya meh pengawa sida nyentukka seharitu.
