John 9:1-41
9 Lebuh Jesus benung bejalai, iya meda siku lelaki ke buta kenyau ari ada.
2 Bala murid iya nanya iya: “Rabbi,* sapa ke bedosa nyentukka lelaki tu diadaka buta? Iya tauka apai indai iya?”
3 Disaut Jesus: “Lelaki tu buta ukai ketegal dosa iya empu tauka dosa apai indai iya. Utai tu nyadi ngambika orang ulih meda utai ke ulih digaga Petara.
4 Lebuh hari agi siang, kitai patut ngereja pengawa ke diberi Iya ke ngirumka aku. Laban lebuh hari nyau malam, nadai orang ulih gawa.
5 Seagi-agi aku ba dunya tu, aku meh penampak dunya.”
6 Pengudah iya nyebut nya, iya ngeludah ngagai tanah lalu nyampurka tanah nya enggau liur iya. Udah nya, iya ngunsutka tanah nya ba mata lelaki nya.
7 Jesus lalu bejaku ngagai iya: “Alai, basu mata nuan ba kulam Siloam” (enti disalin, Siloam reti iya “Dikirumka”). Nya alai, lelaki nya mupuk lalu masu mata iya. Lebuh iya pulai baru, iya ulih meda.
8 Nya alai, orang ke diau semak enggau iya sereta orang ke suah meda iya minta sedekah lalu bejaku: “Endaka iya tu lelaki ke selalu duduk minta sedekah?”
9 Bisi orang madahka: “Au. Iya meh nya.” Bisi mega orang madahka: “Ukai. Orang tu semina baka gamal iya.” Tang lelaki nya majak madahka: “Aku meh iya.”
10 Nya alai, sida nanya iya: “Baka ni ku mata nuan tau ulih meda?”
11 Ku iya nyaut: “Siku lelaki ke benama Jesus nyampurka utai lalu ngunsut utai nya ba mata aku. Udah nya, iya bejaku ngagai aku, ‘Alai, basu mata nuan ba kulam Siloam.’ Nya alai, aku pan mupuk. Pengudah masu mata aku, aku lalu ulih meda.”
12 Sida pan nanya iya: “Dini alai lelaki nya?” Ku iya madah: “Aku enda nemu.”
13 Sida mai lelaki ke kala buta nya ngagai orang Parisi.
14 Betul-betul ga maya Jesus nyampurka tanah ngena liur iya sereta ngeraika lelaki ke buta nya, tekenaka hari ti sama enggau Hari Sabat.
15 Nya alai, orang Parisi mega nanya lelaki nya baka ni ku iya tau ulih meda. Ku iya nyaut: “Iya ngunsutka tanah ba mata aku. Aku masu mata aku lalu aku ulih meda.”
16 Sekeda orang Parisi lalu bejaku: “Iya ukai datai ari Petara laban iya enda nitihka adat Sabat.” Sida ke bukai madahka: “Baka ni ku orang ke bedosa tau ulih ngereja pengawa ajih ke baka tu?” Nya alai, penemu sida enggau pangan diri enda sebaka.
17 Ku sida bejaku baru ngagai lelaki ke buta nya: “Ketegal iya udah ngeraika mata nuan, nama runding nuan pasal iya?” Disaut lelaki nya: “Iya siku nabi.”
18 Tang orang Judah enda pechaya lelaki nya kala buta lalu diatu iya ulih meda. Nya alai, sida ngangauka apai indai iya.
19 Ku sida nanya apai indai iya: “Kati iya tu anak seduai? Kati iya buta kenyau ari ada? Baka ni ku iya tau ulih meda diatu?”
20 Disaut apai indai iya: “Au. Iya endang anak kami ke buta kenyau ari ada.
21 Tang kami enda nemu baka ni ku iya tau ulih meda diatu tauka sapa ke udah ngeraika mata iya. Tanya meh iya. Iya udah besai lalu patut nyaut kita kediri empu.”
22 Apai indai iya bejaku munyi nya laban sida takutka orang Judah. Orang Judah udah besetuju, sapa-sapa ke madahka Jesus nya Kristus patut dibuai ari balai gempuru.
23 Nya meh kebuah apai indai iya bejaku: “Iya udah besai. Tanya meh iya.”
24 Sekali agi, sida ngangauka lelaki ke kala buta nya lalu bejaku ngagai iya: “Sebut utai ti amat kena ngemuliaka Petara. Kami nemu lelaki nya orang ke bedosa.”
25 Ku iya nyaut: “Aku enda nemu sekalika lelaki nya orang ke bedosa tauka enda. Tang tu utai ke ditemu aku: Suba aku buta, tang diatu aku ulih meda.”
26 Sida pan nanya iya: “Nama utai ke udah dikereja iya ngagai nuan? Baka ni ku iya ngeraika mata nuan?”
27 Ku iya nyaut: “Aku udah madah ngagai kita. Tang kita enggai mending. Nama kebuah kita deka ninga baru? Kati kita pan deka nyadi murid iya?”
28 Sida lalu nyindir iya: “Nuan murid lelaki nya, tang kami murid Moses.
29 Kami nemu Petara udah bejaku ngagai Moses. Tang kami enda nemu ari ni penatai lelaki nya.”
30 Ku iya nyaut sida: “Amat nyelai tu. Kita enda nemu ari ni penatai iya. Taja pia, iya udah ngeraika mata aku.
31 Kitai nemu Petara enda mendingka sampi orang ke bedosa. Tang Iya mendingka sampi orang ke nangika Iya sereta ngereja peneka Iya.
32 Kenyau ari kelia, nadai kala kitai ninga pasal orang ke ulih ngeraika mata orang ke buta kenyau ari ada.
33 Enti iya ukai datai ari Petara, iya tentu enda ulih ngereja nama-nama utai.”
34 Ku sida bejaku: “Nuan penuh laban dosa kenyau ari ada. Tang diatu, nuan deka ngajar kami?” Sida lalu muru iya pansut.
35 Jesus ninga pasal sida ke udah muru iya. Lalu lebuh Jesus betemu enggau iya, ku Jesus nanya: “Kati nuan arapka Anak Mensia?”
36 Ku iya nyaut: “Sapa orang nya Tuan, ngambika aku ulih arapka iya?”
37 Jesus madahka: “Nuan udah meda iya. Kebendar nya, iya meh ke bejaku enggau nuan diatu.”
38 Lelaki nya bejaku: “Aku arapka iya, Tuan.” Iya lalu besugang ngagai Jesus.
39 Jesus lalu bejaku: “Aku datai ke dunya tu ngambika orang ulih diakim. Enggau nya, orang ke buta ulih meda, lalu orang ke ulih meda nyadi buta.”
40 Maya nya, sekeda orang Parisi bisi ba dia. Lebuh sida ninga nya, ku sida bejaku: “Kati kami mega dikumbai nuan buta?”
41 Ku Jesus nyaut sida: “Enti kita buta, tentu kita enda bedosa. Tang diatu kita madahka, ‘Kami ulih meda.’ Nya alai, dosa kita enda diampun.”
Nota Kaki
^ Tauka “Pengajar.”
