John 16:1-33
16 “Aku madah ngagai kita semua pekara tu, ngambika kita enda lenyau pengarap.*
2 Kita deka diburu ari balai gempuru. Kebendar iya, maya deka datai alai tiap iku orang ke munuh kita deka ngumbai diri bejalaika pengawa ti tuchi ngagai Petara.
3 Tang sida deka ngereja semua nya laban sida bedau ngelala Apai tauka aku.
4 Taja pia, aku madah ngagai kita semua pekara tu, ngambika lebuh maya nya datai alai semua utai tu nyadi, kita deka ingat aku kala madah ngagai kita pasal nya.
“Sebedau tu, aku enda madah ngagai kita pasal semua pekara tu laban aku agi enggau kita.
5 Diatu aku deka mupuk ngagai Iya ke ngirumka aku. Taja pia, nadai siku pan ari kita nanya aku, ‘Kini ke penunga nuan?’
6 Diatu, kita tusah ati laban aku udah madah ngagai kita pasal semua utai nya.
7 Taja pia, utai ke dipadah aku nya amat. Aku mupuk ke penguntung kita. Enti aku enda mupuk, penulung nya enda datai ngagai kita. Tang enti aku mupuk, aku deka ngirumka penulung nya ngagai kita.
8 Lebuh iya datai, iya deka nunjukka bukti ti terang ngagai dunya pasal dosa dunya. Iya mega deka meri bukti ti terang pasal sapa ke ngereja utai ti lurus sereta sapa ke deka diakim Petara.
9 Keterubah, iya deka nunjukka sapa ke bedosa laban sida enda arapka aku.
10 Udah nya, iya deka nunjukka sapa ke ngereja utai ti lurus, laban aku deka mupuk ngagai Apai lalu kita enda meda aku agi.
11 Lalu iya mega deka nunjukka sapa ke diakim, laban pemerintah dunya tu udah diakim.
12 “Mayuh agi utai ke deka dipadah aku ngagai kita. Tang kita enda ulih meretika nya diatu.
13 Tang lebuh penulung nya, iya nya kuasa kudus Petara ke mandangka pemendar datai, iya* deka ngiring kita ngambika meretika semua pemendar. Utai ke disebut iya ukai datai ari iya empu. Tang iya nyebut utai ke didinga iya, lalu iya deka madahka kita pasal utai ke deka nyadi.
14 Iya deka ngemuliaka aku, laban utai ke dipadahka iya ngagai kita datai ari aku.
15 Semua ke enggi Apai, enggi aku mega. Nya kebuah aku nyebut, utai ke dipadah penulung nya datai ari aku.
16 Enda lama agi, kita enda ulih meda aku. Tang enda lama udah nya, kita deka meda aku.”
17 Maya nya, beberapa iku murid iya bejaku enggau pangan diri: “Nama reti ku iya, lebuh iya nyebut, ‘Enda lama agi, kita enda ulih meda aku. Tang enda lama udah nya, kita deka meda aku’ enggau ‘laban aku deka mupuk ngagai Apai’?”
18 Ku sida madahka: “Nama reti ku iya, lebuh iya madahka, ‘enda lama agi’? Kitai enda nemu utai ku iya.
19 Jesus nemu sida bisi utai ke deka ditanya. Nya alai, ku iya bejaku ngagai sida: “Kati kita nanya pangan diri ketegal aku madahka, ‘Enda lama agi, kita enda ulih meda aku. Tang enda lama udah nya, kita deka meda aku’?
20 Enggau bendar aku madah ngagai kita: Kita deka bekeduie sereta rauh-rauh nyabak, tang dunya deka gaga ati. Kita deka tusah ati, tang penusah ati nya deka berubah nyadi pengaga ati.
21 Siku indu ke deka ngadaka anak ngasaika pemedis, laban maya iya deka beranak udah datai. Tang pengudah ngadaka anak iya, indu nya enda agi ingatka pemedis iya. Iya gaga ati laban siku da agi mensia udah ada ke dunya.
22 Pia mega enggau kita. Diatu kita tusah ati, tang aku deka betemu enggau kita baru. Ati kita deka penuh enggau pengaga, lalu nadai orang ulih ngerampas pengaga nya ari kita.
23 Ba hari nya, kita enda nanya nama-nama utai agi ngagai aku. Enggau bendar aku madah ngagai kita: Apai deka meri kita nama-nama utai ke dipinta kita, enti kita minta nya dalam nama aku.
24 Nyentuk ke seharitu, kita bedau agi minta nama-nama utai dalam nama aku. Pinta meh, lalu kita deka nerima iya, ngambika kita penuh enggau pengaga ati.
25 “Aku udah ngena jaku sempama kena madah ngagai kita pasal semua utai tu. Tang maya deka datai alai aku enda agi ngena jaku sempama bejaku enggau kita. Tang aku deka beterus-terang madah ngagai kita pasal Apai.
26 Ba hari nya, kita deka minta ngagai Apai dalam nama aku. Tang tu ukai reti nya aku deka minta nya ngagai Iya ngarika kita.
27 Apai Empu rinduka kita, laban kita rinduka aku sereta pechaya aku datai nyadi pengari Petara.
28 Aku datai nyadi pengari Apai, lalu aku udah datai ke dunya. Diatu aku deka ninggalka dunya lalu mupuk ngagai Apai.”
29 Bala murid iya madahka: “Diatu nuan bejaku terus terang, nadai ngena jaku sempama.
30 Diatu kami nemu, nuan nemu semua utai. Lalu nadai orang patut nanya nuan nama-nama utai. Enggau tu, kami pechaya nuan endang datai ari Petara.”
31 Ku Jesus nyaut sida: “Kati kita pechaya diatu?
32 Maya nya deka datai, indah maya nya udah datai, lebuh kita deka pambar lalu pulai ngagai rumah diri empu. Kita deka ninggalka aku kediri. Tang aku enda kediri, laban Apai bisi enggau aku.
33 Aku madah ngagai kita pasal semua utai tu, ngambika kita bulih pengelantang nengah aku. Kita deka napi penusah ti balat ba dunya tu, tang anang takut! Aku udah ngalahka dunya.”
Nota Kaki
^ Jaku Asal, “enda labuh.”
^ Leka jaku “iya” ba ayat 13 enggau 14 ditujuka ngagai “penulung” ke disebut ba ayat 7. Jesus ngena leka jaku “penulung” kena nyemaka kuasa kudus Petara baka siku orang.
