James 5:1-20
5 Orang kaya, dinga kita! Bekeduie sereta rauh-rauh meh nyabak ketegal pemerinsa ke deka ninggang kita.
2 Pengaya kita udah reput* lalu gari kita udah diempa indu gegat.
3 Emas enggau pirak kita udah betegar, lalu tegar nya deka mandangka penyalah kita sereta makai isi kita. Utai ke disimpan kita deka nyadi baka api ba hari ti penudi.
4 Kita enda mayar gaji ngagai orang ke ngetau ba ladang kita. Dinga kita! Gaji nya majak ngangau enggau inggar, lalu munyi nyawa sida ke ngetau ke rauh-rauh minta tulung udah didinga Jehovah, ketuai soldadu serega.
5 Kita udah idup kaya-raja lalu ngemenuhka pengingin diri ba dunya. Kita ngasuh ati kita nyadi gemu, baka jelu ke nganti hari deka disayat.
6 Kita udah ngumbai orang ke lurus besalah lalu udah munuh iya. Endaka ketegal nya iya* ngelaban kita?
7 Nya alai, bala menyadi, sabar meh nyentuk ngagai maya Tuan pulai baru.* Peda kita! Orang ke betanam terus nganti maya tanah mansutka asil ti berega. Iya sabar nganti ujan ke nurun maya musin ruruh enggau musin bungai.
8 Kita mega patut sabar, keringka ati kita laban maya Tuan pulai baru* nyau semak.
9 Bala menyadi, anang mut-mut* pasal pangan diri ngambika kita enda diakim. Peda kita! Hakim udah bediri ba mua pintu.
10 Bala menyadi, teladan meh bala nabi ke bejaku dalam nama Jehovah. Sida sabar sereta tan natka pemerinsa.
11 Peda kita! Ba kitai, orang ke tan natka pemerinsa nya orang ke gaga ati.* Kita udah ninga pasal Jop ke tan ngenatka diri sereta meda baka ni Jehovah merekatka iya pengudah nya. Nya nunjukka Jehovah bisi pengasih sereta penyayau* ti besai.
12 Bala menyadi aku, iya ke pemadu penting nya, badu agi besumpah atas nama serega, dunya, tauka nama-nama utai. Enti au, sebut aja “Au,” lalu enti enggai, sebut aja “Enggai,” ngambika kita enda diakim.
13 Kati bisi sapa-sapa entara kita ke napi penusah? Awakka iya seruran besampi. Kati bisi sapa-sapa ke senang ati? Awakka iya belagu meri puji.
14 Kati bisi sapa-sapa entara kita ke sakit? Awakka iya ngangauka bala tuai gempuru ba raban gempuru,* ngambika sida besampika iya lalu ngunsut minyak ba iya dalam nama Jehovah.
15 Sampi ke disebut enggau ati ti arap deka ngasuh orang ke sakit* gerai, lalu Jehovah deka ngasuh iya gerai baru. Enti iya udah bedosa, iya deka diampunka.
16 Nya alai, kita patut ngaku dosa kita ngagai pangan diri, lalu besampika pangan diri ngambika kita ulih digeraika. Sampi ke disebut orang ke lurus enggau bebendar, bisi kesan ti besai.*
17 Elijah orang ke bisi asai ati baka kitai. Lebuh iya bebendar besampi ngambika ujan enda nurun, ujan enda nurun ngagai tanah pengelama tiga taun enam bulan.
18 Udah nya, iya besampi baru. Ujan pan nurun ari langit lalu tanah mansutka asil.
19 Bala menyadi aku, enti bisi sapa-sapa ari bala kita ke limpang ari pemendar lalu bisi orang nulung iya nikal baru,
20 orang ke nulung orang ke bedosa nya nikal baru ari jalai iya ti salah deka nyelamatka iya ari pemati, lalu dosa iya ti mayuh deka diampunka.
Nota Kaki
^ Tauka “luluh.”
^ Tauka engka, “Petara.”
^ Tauka “bisi enggau kitai.” Jaku Gerika, “parousia.” Peda Penerang Leka Jaku, “Parousia.”
^ Tauka “bisi enggau kitai.” Jaku Gerika, “parousia.” Peda Penerang Leka Jaku, “Parousia.”
^ Tauka “besebana; kompelin.”
^ Tauka “diberekat.”
^ Tauka “penyiru.”
^ Tauka “sidang.”
^ Tauka engka, “lelak.”
^ Jaku Asal, “bisi kuasa ti besai lebuh sampi nya benung gawa.”
