Jaku-Dalam 28:1-28
28 Orang ke jai rari taja pan orang nadai begagaika sida,Tang orang ke lurus berani baka singa.*
2 Lebuh rayat ba sesiti menua ngelaban, orang ke merintah ba menua nya deka seruran betukar,Tang iya deka lama merintah enti bisi ditulung orang ke bepenemu sereta ngembuan runding ti dalam.
3 Orang miskin ke nipu orang ke baruh pendiauBaka ujan ke nganyutka semua pemakai.
4 Orang ke enda pedulika adat muji orang ke jai,Tang orang ke ngasika adat ringat ngagai orang ke enda pedulika adat.
5 Orang ke jai enda ulih meretika utai ti adil,Tang orang ke ngiga Jehovah ulih meretika semua utai.
6 Orang miskin ke nengah jalai ti bendar* manah agiAri orang kaya ke nengah jalai ti enda lurus.
7 Anak ke meretika utai nitihka adat,Tang anak ke bekaban enggau orang ke bam ngemaluka apai diri empu.
8 Orang ke nambahka pengaya ngena chara nipu sereta minta bungai duit,Reta iya deka diempu orang ke kasihka orang ke miskin.
9 Orang ke enggai mendingka adat,Indah sampi iya pan dipegedika Petara.
10 Barang sapa ke mai orang ke lurus ngereja utai ti jai deka labuh ke dalam panjuk iya empu,Tang orang ke nadai bepenyalah deka diberi upah.
11 Orang kaya ngumbai diri pintar,Tang orang miskin ke bisi runding ti dalam ulih meda sapa orang kaya nya kebendar iya.
12 Lebuh orang ke lurus mujur, semua orang deka gaga ati,Tang lebuh orang ke jai bekuasa, semua orang deka belalai.
13 Orang ke ngelalaika dosa diri enda ulih mujur,Tang barang sapa ke ngaku sereta ninggalka dosa diri deka bulih pengasih.
14 Orang ke seruran bejimat* deka gaga ati,Tang orang ke degil deka ditinggang penusah.
15 Penguasa ti jai ke merintah rayat ke nadai dayaBaka singa ti negung sereta beruang ti nyerang mansa iya.
16 Ketuai ke nadai runding ti dalam deka salah guna kuasa iya,Tang orang ke begedika untung ke diulih enggau chara ti enda lurus deka panjai umur.
17 Orang ke munuh orang bukai deka berutang darah lalu deka ngerarika diri sampai ngagai lubang kubur.
Anang nulung orang ke baka nya.
18 Orang ke nadai bepenyalah deka diselamatka,Tang orang ke enda jujur deka ngenyit labuh.
19 Orang ke ngintu tanah diri deka bisi mayuh pemakai,Tang orang ke begagaika utai ti nadai guna deka seruran miskin.
20 Orang ti setia deka nerima mayuh berekat,Tang orang ke deka jampat kaya tentu deka ngereja penyalah.
21 Enda manah enti bepilih mata,Tang orang engka ngereja utai ti salah ketegal deka ngulihka sekeping roti.
22 Orang ke amu* inginka pengaya,Tang iya enda sedar iya deka nyadi miskin.
23 Orang ke meri jaku rara deka lebih agi dikerindukaAri orang ke meri jaku puji ti enda ikhlas.
24 Orang ke ngenchuri utai ari apai indai diri lalu madah: “Nya enda salah,”Iya kaban orang ke mai penusah.
25 Orang ke amu* ngasuh laya nyadi,Tang orang ke bepanggai ba Jehovah deka lantang.
26 Orang ke beli pechayaka ati iya empu,Tang orang ke ngereja utai ngena penemu-dalam deka selamat.
27 Orang ke meri utai ngagai orang ke miskin enda nemu suntuk,Tang orang ke ngaga diri enda meda orang ke miskin, deka diberi mayuh jaku sumpah,
28 Lebuh orang ke jai bekuasa, orang deka belalai,Tang lebuh orang ke jai dipunaska, orang ke manah deka nambah.
Nota Kaki
^ Tauka “singa ti biak.”
^ Tauka “ke setia.”
^ Tauka “ke enda ngetu nangika Petara.”
^ Tauka “dengki.”
^ Tauka engka, “sumbung.”
