Jaku-Dalam 21:1-31
21 Ati raja baka ai sungai ti mengalir;Jehovah nentuka kini ke penunga ai nya mengalir nitihka peneka Iya.
2 Orang engka ngumbai jalai diri betul magang,Tang Jehovah meresa ati* iya.
3 Ngereja utai ti lurus sereta adilLebih agi ngelantangka ati Jehovah ari ke nyerahka pemeri.
4 Mata enggau ati ti sumbung nya dosa;Nya meh lampu kelita ke nenggau jalai orang ke jai.
5 Pelan ke digaga orang ke rajin tentu deka mujur,Tang orang ke beguai-guai ngereja utai deka nyadi miskin.
6 Reta ke diulih ngena dilah ti nipuBaka kabus ke jampat lenyau, baka panjuk ke ulih munuh.*
7 Orang ke jai deka disapu beresi penyai sida empu,Laban sida enggai ngereja utai enggau adil.
8 Orang ke ngereja penyalah nujah jalai ti bingkuk,Tang orang ke nadai bepenyalah ngereja utai ti lurus.
9 Manah agi diau ba perabung rumah,Ari ke diau serumah enggau bini ke udu kutap-kutap.*
10 Orang ke jai ingin deka ngereja utai ti jai;Iya nadai kasihka orang bukai.
11 Lebuh orang ke rindu ngelese diukum, orang ke nadai pengalaman deka belajar ari nya,Lalu lebuh orang ke bepenemu-dalam ulih meretika utai enggau dalam, iya deka bulih penemu.*
12 Iya ti Lurus beratika ruang bilik orang ke jai;Iya deka nganchurka semua orang ke jai.
13 Barang sapa ke nejal pending diri lebuh orang ke baruh pendiau minta tulung,Iya mega enda dikeibuhka lebuh iya minta tulung.
14 Hadiah ke diberi belalai ulih ngasuh orang badu ringat,Lalu hadiah ke diberi belalai ulih ngasuh ati orang ke ringat chelap.
15 Orang ke lurus deka gaga ati laban ngereja utai enggau adil,Tang orang ke jai kejika pengawa ti lurus.
16 Orang ke badu agi meretika utai enggau dalamPengujung iya deka begulai enggau orang ke nadai daya ketegal pemati.
17 Orang ke rindu ngelantangka diri deka nyadi miskin;Orang ke rinduka wain enggau minyak enda ulih nyadi kaya.
18 Orang ke jai nyadi tebus ke orang ti lurus;Orang ke enda setia nyadi tebus ke orang ti jujur.
19 Manah agi diau ba menua puang,Ari ke diau begulai enggau bini ke udu kutap-kutap* sereta jampat ringat.
20 Orang ke bepenemu-dalam bisi minyak enggau reta ti berega ba rumah iya,Tang orang ke beli ngerua utai ti dikemisi iya.
21 Orang ke ngulihka pengelurus enggau pengerindu ti setiaDeka tetemuka pengidup, pengelurus, enggau mulia.
22 Orang ke bepenemu-dalam ulih ngalahka kuta ke dijaga bala soldadu ti keringLalu ngeruntuhka dinding kuta ti teguh ke dikeandalka sida.
23 Orang ke nyaga mulut enggau dilah diriNgenyauhka diri empu ari penusah.
24 Orang ke ngenemuka diri sereta enda berunding ngereja utaiDeka dikumbai orang ke rindu bejaku begah sereta ngisinka diri.
25 Utai ke dikinginka orang ke ngelusu deka munuh orang nya,Laban jari iya enggai ngereja pengawa.
26 Sepemanjai hari, iya semina berundingka utai ti dikinginka iya,Tang orang ke lurus rindu meri sereta gerah jari.
27 Petara begedika pemeri ke diserahka orang ke jai,Kelebih agi enti iya nyerahka pemeri nya enggau niat ti jai!*
28 Saksi ke bula deka dipunaska,Tang orang ke mending dulu sebedau meri saksi deka mujur.
29 Orang ke jai pura-pura yakin ba depan orang,Tang orang ke lurus amat yakin enggau jalai iya ti bendar.*
30 Nadai penemu-dalam tauka runding ti dalam tauka jaku lalau ulih dikena ngelaban Jehovah.
31 Kuda disediaka kena beperang,Tang Jehovah meh ke mai penyelamat.
Nota Kaki
^ Tauka “niat ati.”
^ Tauka engka, “Baka kabus ke jampat lenyau ba orang ke ngiga pemati.”
^ Tauka “ke rindu belaya.”
^ Tauka “deka nemu utai ke patut digaga iya.”
^ Tauka “ke rindu belaya.”
^ Tauka “enggau ulah ti ngemaluka!”
^ Tauka “orang ke lurus berusaha nentuka jalai iya bendar.”
