Galatia 6:1-18
6 Bala menyadi, enti bisi orang enda nemu diri udah salah singkang, kita ke diiring kuasa kudus patut ngemetulka iya enggau nelap. Tang bejimat meh, enggaika kita empu ke kena penguji.
2 Terus meh nulung pangan diri mai ma ti berat. Enggau nya, kita nitihka adat Kristus.
3 Enti orang ke enda penting ngumbai diri penting, iya benung nipu diri empu.
4 Tiap iku orang patut meresa pengawa diri, lalu iya deka gaga ati ketegal pengawa iya empu, ukai ketegal mandingka diri enggau orang bukai.
5 Tiap iku orang patut mai ma* diri empu.
6 Kelimpah ari nya, awakka orang ke diajar pasal jaku Petara bekunsika semua utai ti manah enggau orang ke ngajar iya.
7 Anang nejuka diri ditipu: Petara enda ulih dikemelika. Nama-nama utai ke ditanam orang, nya meh utai ke diketau orang nya.
8 Orang ke nanam nitihka pengingin ti bedosa, deka ngetau utai ti jai* ari pengingin ti bedosa nya. Tang orang ke nanam nitihka iring kuasa kudus, deka ngetau pengidup ti meruan belama iya ari kuasa kudus nya.
9 Nya alai, anang ngetu ngereja utai ti manah. Enti kitai enda putus pengarap,* kitai deka ngetau ba maya ti ngena.
10 Nyadi, seagi-agi kitai bisi peluang, aram meh kitai ngereja utai ti manah ngagai semua orang, kelebih agi ngagai bala menyadi kitai ke sama pengarap.
11 Peda pemesai urup ke ditulis aku empu ngagai kita.
12 Semua sida ke mejal kita ngambika disunat* nya orang ke deka ngenyenangka ati orang bukai,* ngambika sida enda diperinsa ketegal tiang perinsa* Kristus.
13 Indah sida ke udah disunat nya empu enda nitihka Adat. Tang sida deka ngasuh kita disunat, ngambika sida ulih bejaku begah ketegal sida udah mujur ngasuh kita disunat.
14 Ngarapka aku enda temegahka nama-nama utai kelimpah ari tiang perinsa* Tuan kitai, Jesus Kristus. Ba aku, dunya udah mati* ketegal iya, tang ba mata dunya, aku udah mati ketegal iya.
15 Disunat tauka enda, nya enda penting. Tang iya ke penting nya, utai idup ti baru ke ditempa* Petara.
16 Ngarapka semua orang ke idup sejalai enggau atur nya, iya nya orang Israel ke enggi Petara, bulih pengelantang enggau pengasih ari Petara.
17 Kenyau ari diatu, ngarapka nadai orang ngenusahka aku, laban ba tubuh aku bisi abi ke nunjukka aku tu ulun Jesus.
18 Bala menyadi, ngarapka pemanah ati ti besai ari Tuan kitai, Jesus Kristus, bisi enggau runding sereta ulah* ti manah ke diayanka kita. Amin.
Nota Kaki
^ Tauka “bejalaika tanggung pengawa.”
^ Tauka “ti nemu reput.”
^ Tauka “putus asa.”
^ Tauka “ditutus.”
^ Tauka “deka dipeda manah.”
^ Peda Penerang Leka Jaku.
^ Peda Penerang Leka Jaku.
^ Tauka “udah diukum bunuh ba tiang.”
^ Tauka “digaga.”
^ Jaku Gerika, “pneu′ma.” Peda Penerang Leka Jaku, “Pneu′ma.”
