Adat Lewi 25:1-55
25 Ku Jehovah nampung jaku Iya enggau Moses ba Gunung Sinai:
2 “Padah ngagai orang Israel: ‘Lebuh kita tama ngagai menua ke deka diberi Aku ngagai kita, kita patut nitihka adat ke diberi Aku, Jehovah, ngagai kita bekaul enggau Taun Sabat. Kita enda tau betanamka utai ba menua nya.
3 Kita tau nanam utai ba tanah kita, nyarau anggur ba kebun kita, lalu ngetau utai ti ditanam kita dalam timpuh enam taun.
4 Tang ba taun ti ketujuh, kita enda tau nanam utai ba tanah kita tauka nyarau anggur ba kebun kita. Ba taun nya, kita enda tau ngereja nama-nama utai ba tanah nya laban nya Taun Sabat ke Aku, Jehovah.
5 Anang ngetau gandum* ke tumbuh kediri empu pengudah musin ngetau, lalu anang ngumpul buah anggur ari pun anggur ke enda dijarau kita. Ba taun nya, kita enda tau ngereja nama-nama utai ba tanah nya.
6 Taja pia, asil tanah ke tumbuh kediri empu maya Taun Sabat tau diempa kita. Kita, ulun lelaki kita, ulun indu kita, orang gaji kita, orang asing ke diau enggau kita,
7 nyengkaum jelu tupi kita enggau jelu liar ke ba menua kita, tau makai asil tanah nya. Semua asil ari tanah kita tau diempa magang.
8 “‘Itung tujuh kali Taun Sabat, iya nya tujuh kali tujuh taun, lalu penyampau iya 49 taun.
9 Pengudah nya,* ba bulan ti ketujuh kena hari ti ke-10, iya nya ba Hari Pengampun Dosa, kita patut nyepu terumpit lalu bunyi terumpit nya ulih didinga semua orang ba menua kita.
10 Taun ke-50 nya taun ti kudus, lalu kita patut ngelepaska semua orang ke ba menua kita. Taun nya Taun Pengelepas ke kita. Utai ke udah dijual deka dipulaika baru ngagai orang ke bempu utai nya. Orang ke udah dijual nyadi ulun deka pulai baru ngagai ruang bilik sida empu.
11 Taun ke-50 taun nya Taun Pengelepas ke kita. Kita enda tau nanam utai ba tanah kita, ngetau gandum ke tumbuh kediri empu pengudah musin ngetau, tauka ngumpul buah anggur ari pun anggur ke enda dijarau kita.
12 Nya Taun Pengelepas, lalu nya taun ti kudus ke kita. Kita semina tau makai asil tanah ke tumbuh kediri empu.
13 “‘Ba Taun Pengelepas, utai ke udah dijual deka dipulaika baru ngagai orang ke bempu utai nya.
14 Enti kita nyual tauka meli utai, anang ngambi ulih ari pangan diri.
15 Lebuh kita meli tanah, rega tanah nya patut diitung nitihka penyampau taun alai tanah nya mansutka asil nyentuk ngagai Taun Pengelepas ti deka datai.
16 Enti Taun Pengelepas nya agi jauh, rega tanah nya mar. Tang enti taun nya nyau semak, rega tanah nya murah, laban utai ti dijual nya asil ari tanah nya.
17 Nadai siku ari bala kita tau ngambi ulih ari pangan diri. Kita patut nangika Aku, laban Aku tu Jehovah, Petara kita.
18 Enti kita ngasika adat enggau atur ke udah ditetapka Aku, kita deka diau likun ba menua nya.
19 Menua nya deka mansutka asil, lalu kita deka makai asil iya enggau ati ti puas sereta diau likun ba menua nya.
20 “‘Tang kita engka nanya: “Nama utai ti deka diempa kitai ba taun ti ketujuh, enti kitai nadai nanam tauka ngetau utai?”
21 Anang irau. Aku deka merekatka kita ba taun ti keenam. Tanah kita deka mansutka asil ti chukup ke diguna kita pengelama tiga taun.
22 Ba taun ti kelapan, kita deka betanam baru. Kita deka terus makai utai ti diketau kita ba taun ti keenam, nyentuk ngagai taun ti kesemilan. Kita deka makai utai ke ditanam kita nya nyentuk ngagai maya kita ngetau ba taun ti kesemilan.
23 “‘Lebuh kita nyual tanah kita ngagai orang bukai, sida enda tau ngempu tanah nya belama iya laban tanah nya enggi Aku. Ba mata Aku, kita orang asing, lalu diau enda lama ba menua nya.
24 Ba menua ke deka diempu kita, orang ke bempu tanah bisi hak meli pulai baru tanah ke udah dijual iya.
25 “‘Enti siku ari bala kita nyadi miskin lalu iya patut nyual tanah iya, siku ari kaban belayan iya ke pemadu semak enggau iya patut nulung iya meli tanah nya pulai baru.
26 Enti iya nadai kaban belayan ke ulih nulung iya meli tanah nya pulai baru, tang udah nya iya nyadi kaya lalu iya ulih meli tanah nya pulai baru,
27 iya patut ngitung berapa taun tanah nya udah dijual, kenyau ari taun iya nyual tanah nya. Udah nya, iya patut mayar orang ke meli tanah nya, nitihka penyampau taun ke agi tinggal sebedau Taun Pengelepas datai. Nya baru iya tau bempu tanah iya baru.
28 “‘Tang enti iya nadai chukup duit kena meli tanah nya pulai baru, tanah nya mengkang diempu orang ke udah meli tanah nya nyentuk ngagai Taun Pengelepas. Ba Taun Pengelepas, nya baru tanah nya deka dipulaika baru ngagai iya.
29 “‘Enti siku ari kita nyual rumah dalam nengeri ti bekuta, iya bisi hak meli rumah nya pulai baru dalam timpuh setaun, berengkah ari maya rumah nya dijual.
30 Tang enti iya enda meli rumah nya pulai baru dalam setaun nya, rumah nya deka terus diempu orang ke meli rumah nya enggau bala peturun iya. Rumah nya enda dipulaika baru ba Taun Pengelepas.
31 Tang rumah ba kawasan ke nadai dinding kuta, deka dikumbai sebagi ari ladang ba menua pesisir. Nya alai, orang ke bempu rumah nya bisi hak meli rumah nya pulai baru, lalu rumah nya deka dipulaika baru ngagai iya ba Taun Pengelepas.
32 “‘Enti orang Lewi nyual rumah sida ke ba kuta, sida seruran bisi hak meli rumah nya pulai baru.
33 Tang enti sida enda meli pulai baru rumah nya, rumah nya deka dipulaika ngagai sida ba Taun Pengelepas, laban rumah nya endang utai ke patut diempu sida ba menua Israel.
34 Padang rumput ke ngelingi kuta orang Lewi mega enda tau dijual, laban nya endang utai ke patut diempu sida belama iya.
35 “‘Enti siku ari kita nyadi miskin lalu iya enda ulih nyediaka utai ke dikena iya beridup, kita patut nulung iya baka kita ke nulung orang ari bansa bukai ke diau begulai enggau kita. Enggau nya, iya ulih terus diau enggau kita.
36 Lebuh iya nginjau duit ari kita, anang minta bungai duit ari iya ketegal deka bulih untung. Enggau nya, iya ulih terus diau enggau kita. Kita patut nangika Aku, Petara kita.
37 Anang ngiga untung ari pemakai ke dijual ngagai iya. Lebuh iya nginjau duit ari kita, anang minta bungai duit ari iya.
38 Aku tu Jehovah, Petara kita, ke mai kita pansut ari menua Ejip, lalu meri kita menua Kanaan, kena nunjukka Aku tu Petara kita.
39 “‘Enti siku ari kita nyadi miskin lalu iya ngasuh nuan meli iya nyadi ulun, anang ngasuh iya ngereja pengawa ke biasa dikereja ulun.
40 Nuan patut ngelayan iya baka pekereja ke dibayar gaji tauka baka orang ke diau enda lama enggau nuan. Iya patut bekereja enggau nuan nyentuk ngagai Taun Pengelepas.
41 Udah nya, iya enggau bala anak iya deka ninggalka nuan lalu pulai ngagai ruang bilik sida empu. Sida patut pulai ngagai menua aki ini sida empu.
42 Orang Israel nya ulun Aku, ke udah dibai Aku pansut ari menua Ejip. Nya kebuah sida enda tau dijual nyadi ulun.
43 Nuan enda tau kejam enggau iya. Nangi meh ke Aku, Petara kita.
44 Enti kita begunaka ulun lelaki tauka ulun indu, kita tau meli sida ari orang bansa bukai ke diau ngelingi kita.
45 Kita mega tau meli orang bansa bukai ke diau begulai enggau kita sereta anak sida ke ada ba menua kita nyadika ulun. Sida deka nyadi enggi kita.
46 Sida deka nyadi ulun kita belama iya. Pengudah kita mati, bala anak kita deka bempu sida lalu sida deka terus nyadi ulun bala anak kita. Tang ngagai orang Israel ke sama bansa enggau kita, kita enda tau kejam enggau sida.
47 “‘Enti orang bansa bukai ke diau ba menua kita nyadi kaya, tang siku ari kita nyadi miskin, nyentukka iya minta diri dibeli orang ari bansa bukai nya, tauka siku ari kaban belayan orang nya,
48 iya bisi hak dibeli pulai baru. Siku ari menyadi lelaki iya tau meli iya pulai baru.
49 Aya iya, petunggal lelaki iya, tauka kaban belayan ke semak enggau iya, tau meli iya pulai baru.
“‘Enti sema iya udah nyadi kaya, iya tau nebus diri empu.
50 Iya patut ngitung ari maya alai iya minta diri dibeli nyentuk ngagai Taun Pengelepas. Rega kena nebus iya pulai baru deka ditentuka enggau berapa taun iya udah dibeli sereta nitihka penyampau upah pekereja ke digaji.
51 Enti taun ke agi tinggal nyentuk ngagai Taun Pengelepas nya agi jauh, rega tebus ke dibayar iya deka ditetapka nitihka penyampau taun ke agi tinggal.
52 Tang enti semina beberapa taun aja ke agi tinggal sebedau Taun Pengelepas, iya patut ngitung kediri empu lalu mayar rega tebus nitihka penyampau taun ke agi tinggal.
53 Seagi-agi iya bekereja ke tuan iya, iya patut dilayan baka pekereja ke digaji. Tuan iya enda tau kejam enggau iya.
54 Tang enti iya enda ulih nebus diri ngena semua chara nya, iya enggau bala anak iya deka dilepaska ba Taun Pengelepas.
55 “‘Laban orang Israel nya ulun Aku, ulun ke dibai Aku pansut ari menua Ejip. Aku tu Jehovah, Petara kita.
