Tiga John 1:1-14
1 Aku, ke udah tuai tu,* nulis surat tu ngagai Gaius ti dikesayau sereta ke amat-amat dikerinduka aku.
2 Kaban ke dikerinduka aku, aku besampi ngambika nuan seruran gerai sereta mujur dalam semua pengawa, baka ke diatu.
3 Aku balat amat gaga ati lebuh bala menyadi datai, lalu madah pasal nuan ke agi bepegai ba pemendar sereta terus bejalai dalam pemendar.
4 Nadai utai ke balat ngagaka ati aku* kelimpah ari ninga bala anak aku terus bejalai dalam pemendar.
5 Kaban ke dikerinduka aku, ari pengawa ke digaga nuan ke bala menyadi, nuan nunjukka diri setia taja pan nuan enda ngelala sida.
6 Ba mua raban gempuru,* sida empu nyadi saksi lalu madah pasal pengerindu nuan. Lebuh sida mupuk, tulung meh sida ngena chara ke ngelantangka ati Petara.
7 Nya ketegal sida mupuk nusui nama Petara, lalu sida enda ngarapka nama-nama utai ari bansa bukai.
8 Nya alai, kitai mesti rindu ngelaluka orang ke baka sida, ngambika kitai ulih sama bekereja dalam pemendar.
9 Aku udah nulis surat ngagai raban gempuru. Tang Diotrefes, ke ka amat nyadi lumur satu ba raban gempuru, enda bebasaka nama-nama utai ke disebut kami.
10 Nya alai, enti sema aku datai, aku deka berandau pasal pengawa iya. Iya nusui utai ti jai pasal kami ngagai orang. Ukai nya aja, iya mega enggai ngelaluka bala menyadi lelaki enggau basa. Enti bisi orang deka ngelaluka bala menyadi nya, iya indah bebendar nagang orang nya, lalu muru orang nya ari raban gempuru.
11 Kaban ke dikerinduka aku, anang nitihka utai ti jai, tang titihka meh utai ti manah. Orang ke ngereja utai ti manah, nitihka Petara. Tang orang ke ngereja utai ti jai, bedau agi ngelala Petara.
12 Demetrius dipuji semua bala menyadi, lalu iya idup sejalai enggau pemendar. Kebendar iya, kami mega meri saksi pasal iya, lalu nuan nemu saksi ke diberi kami nya amat.
13 Bisi mayuh utai ke deka dipadahka aku ngagai nuan, tang aku enggai madahka nya nengah surat.
14 Aku ngarapka diri ulih betemu enggau nuan enda lama da agi, lalu tua ulih berandau enggau pangan diri.
Ngarapka nuan bulih pengelantang.
Bala kaban ba ditu ngirumka salam ngagai nuan. Kirumka salam aku ngagai tiap iku kaban aku ba dia.
