Dua Timoti 3:1-17
3 Tang aku deka nuan nemu tu: Ba hari ti penudi, maya ti balat jai sereta balat tusah deka datai.
2 Orang deka rinduka diri empu, rinduka duit, bejaku begah, ngeninggika diri, bejaku ngelaban Petara sereta orang bukai, enda ngasika apai indai, enda nemu beterima kasih, enda tetap ati,
3 jai ati, enggai sepenemu enggau orang bukai, bejaika orang bukai, enda nemu nagang diri, mangah, enda rinduka utai ti manah,
4 nyadi munsuh kaban diri, kieh,* sumbung, rindu ngelantangka ati diri ari ke rinduka Petara,
5 sereta ngaga diri nyembah Petara, tang enda idup sejalai enggau pengarap sida. Anang semak enggau orang ke baka nya.
6 Bisi ari bala orang nya pintar nipu orang bukai ngambika ulih tama ngagai rumah sida, lalu narit ati bala indu ke lemi ketegal mayuh dosa sereta dikuasa mayuh macham pengingin.
7 Bala indu tu selalu belajar, tang enda kala bulih penemu ti betul pasal pemendar.
8 Baka Jannes enggau Jambres ke ngelaban Moses, bala sida nya mega majak ngelaban pemendar. Runding sida amat-amat udah ditesatka, lalu sida enda diterima Petara laban sida enda idup sejalai enggau pengarap orang Kristian.
9 Taja pia, sida enda ulih mujur laban pemeli sida deka nyata dipeda semua orang, sama baka dua iku orang nya.
10 Tang nuan enggau bejimat udah nitihka ajar aku, jalai pengidup aku, tuju aku, pengarap aku, penyabar aku, pengerindu aku, enggau pengeliat ati aku.
11 Nuan mega nemu pasal pemerinsa enggau penusah ke ditapi aku ba Antiok, ba Ikonium, enggau ba Listra. Aku betan napi pemerinsa nya, lalu Tuan udah nyelamatka aku ari semua nya.
12 Kebendar iya, semua murid Jesus Kristus ke ingin deka nyembah Petara enggau ati ti enda bebagi mega deka diperinsa.
13 Tang, orang ke jai enggau orang ke nyaru diri, deka majak jai-sejai. Sida deka nesatka orang, lalu sida empu mega deka ditesatka.
14 Nuan patut terus nitihka semua utai ke udah dipelajarka nuan, sereta ke ngasuh nuan andal lalu arap, laban nuan nemu sapa ke ngajar nuan.
15 Kenyau ari nuan agi mit,* nuan udah nemu pasal Bup Kudus, ke ulih ngasuh nuan bepenemu-dalam sereta diselamatka laban nuan arapka Jesus Kristus.
16 Semua ayat ba Bup Kudus datai ari Petara magang,* lalu beguna kena ngajar, ngerara, ngemetulka utai ti salah, sereta ngelatih* kitai ngambika ngereja utai ti lurus,
17 ngambika ulun Petara ulih amat-amat nyadi landik sereta besedia ngereja tiap iti pengawa ti manah.
Nota Kaki
^ Tauka “bingking; degil.”
^ Jaku Gerika ke dikena ba ditu, kesuah iya mai reti anak ke baru ada.
^ Tauka “diiring kuasa Petara.”
^ Tauka “disiplin.”
