Dua Korint 3:1-18
3 Patut kami madah pasal diri empu ngagai kita baru? Tauka baka ke digaga sekeda orang, patut kami meri ngagai kita surat ti nunjukka kami layak? Tauka patut kita ke meri kami surat ke baka nya?
2 Kita empu ke nyadi surat kami ke ditulis ba ati kami, lalu ditemu sereta dibacha semua orang.
3 Kebendar nya, kita surat ari Kristus ke ditulis kami ke nyadi ulun Petara. Kami enda nulis surat nya ngena dawat, tang ngena kuasa kudus Petara ti idup. Kami nulis nya ba ati orang, ukai ba lampang batu.
4 Nengah Kristus, kami ulih nyebut munyi nya enggau andal ba mua Petara.
5 Kami enda madahka diri layak ngereja pengawa tu ketegal diri empu, tang Petara meh ke ngasuh kami layak.
6 Iya meh ke ngasuh kami layak nyadi ulun sempekat ti baru. Nya alai, kami ukai ulun Adat ti betulis, tang ulun kuasa kudus Petara. Nya ketegal Adat ti betulis mai pemati, tang kuasa kudus Petara mai pengidup.
7 Adat ke mai pemati ke ditulis ba batu datai enggau mulia ti besai, nyentukka orang Israel enda ulih merening mua Moses, laban mulia ke manchar ari mua iya. Taja pia, mulia nya deka lenyau.
8 Enti pia, endaka kuasa kudus ke diberi deka mai mulia ti besai agi?
9 Enti Adat ke mai pemati bisi mulia, tentu pengawa ke ngasuh orang nyadi lurus bisi mulia ti jauh besai agi.
10 Kebendar iya, Adat ti bemulia nya suba udah lenyau mulia, laban bisi mulia ti besai agi ari nya.
11 Enti Adat ke deka lenyau nya bisi mulia, tentu sempekat baru ke meruan belama iya bisi mulia ti jauh besai agi.
12 Laban kitai andal nganti utai ke dikearapka kitai, kitai ulih bejaku enggau berani.*
13 Kitai enda baka Moses ke nutup mua iya ngena kain, ngambika orang Israel enda ulih meda nama pengujung Adat ke deka lenyau nya.
14 Tang runding sida udah ditutup. Nyentuk ke seharitu, runding sida agi ditutup kain ti sama, lebuh sempekat ti lama dibacha laban kain nya semina ulih dibuka nengah Kristus.
15 Kebendar nya, nyentuk ke seharitu ati sida agi ditutup kain tiap kali Adat Moses dibacha.
16 Tang, lebuh orang nguingka diri ngagai Jehovah,* kain nya deka dibuka.
17 Jehovah ke enda ulih dipeda, bisi ba serega.* Ba dini alai kuasa kudus Jehovah, ba dia meh bisi pengelepas.
18 Mua semua kitai ke enda ditutup ngena kain baka cheremin ti mandangka mulia Jehovah. Lebuh kitai ngereja nya, kitai diubah ngambika ngambarka Petara, lalu mandangka mulia ti majak besai, baka ke digaga Jehovah ke enda ulih dipeda ke bisi ba serega.*
Nota Kaki
^ Peda Penerang Leka Jaku, “Bejaku enggau berani.”
^ Peda nota kaki ba Matthew 1:20.
^ Tauka engka, “baka ke digaga kuasa kudus Jehovah.”
