Dua Korint 12:1-21
12 Aku patut bejaku begah taja pan nya nadai meri penguntung. Tang diatu, aku deka bejaku pasal genera enggau utai ke dipandangka Tuan.
2 Aku ngelala siku lelaki ke beserakup enggau Kristus. Empat belas taun ti udah, enda mukai-mukai, lelaki nya dibai ke serega ti ketiga. Aku enda nemu enti iya dibai enggau tubuh iya sekali tauka enda, tang Petara nemu.
3 Au, aku ngelala lelaki nya. Aku enda nemu enti iya dibai enggau tubuh iya sekali tauka enda, tang Petara nemu.
4 Enda mukai-mukai, iya dibai ngagai paradais,* lalu iya ninga jaku ke enda ulih sereta enda tau disebut mensia.
5 Aku deka bejaku begah pasal lelaki nya, tang ukai pasal aku. Aku semina deka temegahka pengelemi aku empu.
6 Taja pan aku deka bejaku begah, aku enggai bejaku baka orang ke enda nemu berunding, laban aku deka nyebut utai ti amat. Tang aku enggai bejaku begah, ngambika orang semina muji aku ketegal pengawa aku ke dipeda sida tauka jaku aku ke didinga sida,
7 ukai ketegal utai ke dipandangka Tuan ngagai aku.
Ngambika aku enda kelalu ngeninggika diri, aku diberi duri dalam isi, baka ke bisi melikat ari Sitan ke majak nampar* aku.
8 Udah tiga kali aku bebendar minta ngagai Tuan,* ngambika duri nya dibuai ari aku.
9 Tang Iya madah ngagai aku: “Pemanah ati Aku ti besai udah chukup ke nuan. Laban lebuh nuan lemi, kuasa Aku ulih dipeda enggau amat nyata.” Nya alai, enggau ati ti gaga, aku deka temegahka pengelemi aku, ngambika kuasa Kristus terus ngelindung aku baka langkau.
10 Nyadi, ketegal Kristus, aku gaga ati lebuh aku lemi, dikelese, suntuk, diperinsa, sereta napi penusah. Laban lebuh aku lemi, aku nyadi kering.
11 Aku nyadi orang ke enda nemu berunding. Kita meh ke ngasuh aku nyadi baka nya. Laban enti nunda, kita ke patut nyebut utai ti manah pasal aku. Taja pan aku enda beguna ba kita, tang nadai siti pan utai ke nunjukka aku kurang ari bala rasul kita ke balat “manah” nya.
12 Indah, kita udah meda bukti ke nunjukka aku tu rasul, laban aku majak ngayanka pengeliat ati, ngaga mayuh kereja ajih, tanda, sereta pengawa ti ngalitka ati.
13 Ba senentang ni kita kurang? Kita semina kurang ari raban gempuru ke bukai, laban aku enda nating kita. Aku minta ampun ke penyalah aku tu.
14 Kebendar iya, tu ketiga kali aku besedia deka datai ngagai kita. Baka ke udah, aku ukai deka nating kita, laban aku ukai inginka reta kita, tang deka betemu enggau kita. Anak enda patut besimpanka reta ke apai indai, tang apai indai meh ke patut besimpanka reta ke anak.
15 Aku sanggup ngena semua utai ke dikemisi aku sereta sanggup ngelengkaka semua utai ke kita. Enti aku balat rinduka kita, nama kebuah kita kurang rinduka aku?
16 Taja pia, aku enda nating kita. Tang kita ngumbai aku orang ke “pintar nipu,” lalu manjuk kita “ngena pemula.”
17 Aku enda kala ngambi ulih ba kita nengah orang ke dianjung aku ngagai kita, enda pia?
18 Aku ngasuh Titus datai ngagai kita, lalu aku nganjung siku menyadi sama enggau iya. Kati Titus ngambi ulih ba kita? Endaka runding kami sereta chara kami ngereja pengawa sama?
19 Kati kita ngelama tu ngumbai kami ngetanka diri ba mua kita? Kebendar iya, kami bejaku ba mua Petara nyadi orang ke beserakup enggau Kristus. Bala menyadi ke dikerinduka aku, semua utai ke dikereja kami nya kena negapka kita.
20 Aku nangi enggaika lebuh aku datai, kita enda sama baka ke dijangka aku, lalu aku enda sama baka ke dijangka kita. Aku nangi enggaika kita belaya, chemburu, balat ringat, bekelikuh, bejaika orang ari belakang, bejakuka orang,* sumbung, sereta charut.
21 Aku nangi enggaika lebuh aku datai baru, Petara aku deka ngemaluka aku ba mua kita. Aku engka deka nyabak, laban mayuh orang ke bedosa suba agi enda nesal ati ari ngereja pengawa ti kamah, ulah seks ti kamah,* sereta enda malu ngereja utai ti jai.*
Nota Kaki
^ Jaku Gerika, “pa·ra′dei·sos.” Reti iya, taman ti manah.
^ Tauka “malu.”
^ Ditujuka ngagai Petara.
^ Tauka “begosip.”
^ Jaku Gerika, “por·nei′a.” Peda Penerang Leka Jaku.
^ Jaku Gerika, “a·sel′gei·a.” Peda Penerang Leka Jaku, “A·sel′gei·a.”
