Bansa Israel ti Kedua 31:1-21
31 Pengudah pengerami nya tembu, semua orang Israel ke ba Jerusalem mupuk ngagai kuta-kuta ba Judah. Sida nganchurka tiang batu keramat, nebang tiang kayu keramat, ngerusakka endur alai orang nyembah petara pelesu,* sereta ngeruntuhka semua alta ba serata Judah enggau Benjamin, nyengkaum ba Efraim enggau Manasi. Pengudah sida nganchurka semua nya, sida pulai ngagai kuta sida. Tiap iku sida pulai ngagai rumah diri empu.
2 Hesekiah magi bala imam enggau orang Lewi nitihka raban, ngambika sida ulih bejalaika pengawa ke udah ditetapka ke sida. Sida deka gawa ke Petara, lalu diasuh nyerahka pemeri tunu enggau pemeri bebaik. Sida mega patut meri terima kasih sereta muji Jehovah ba pintu-pintu laman Rumah Petara.
3 Raja meri sekeda ari utai ke enggi iya nyadika pemeri tunu ke diserahka ninting pagi enggau lemai, maya Hari Sabat, maya pengerami bulan baru, sereta maya pengerami bukai, nitihka utai ke udah ditulis ba Adat Jehovah.
4 Hesekiah mega ngasuh sida ke diau ba Jerusalem meri pemeri ngagai bala imam enggau orang Lewi. Pemeri nya endang begian ke udah diungkup ke sida. Enggau nya, sida nunjukka diri amat-amat nitihka* Adat Jehovah.
5 Lebuh atur nya dipadah, orang Israel mai mayuh amat utai, iya nya asil ti keterubah ari bijirin, wain ti baru, minyak, madu, enggau semua asil utai ke ditanam sida. Sida mai 10 peratus ari semua utai ke dikemisi sida.
6 Orang Israel enggau orang Judah ke diau ba kuta-kuta Judah mega mai 10 peratus ari sapi enggau bedus, sereta 10 peratus ari utai ti kudus ke udah diserahka* ngagai Petara sida, Jehovah. Mayuh amat pemeri ke dibai sida nyentukka nyau betugung.
7 Ba bulan ti ketiga, sida nugungka semua pemeri nya sampai pengawa nya tembu ba bulan ti ketujuh.
8 Lebuh Hesekiah enggau bala pegawai iya meda tugung pemeri nya, sida muji Jehovah lalu merekatka semua orang Israel.
9 Hesekiah nanya bala imam enggau orang Lewi pasal pemeri nya,
10 lalu Asariah, iya nya tuai imam ari ruang bilik Sadok, nyaut iya: “Sekumbang sida mai pemeri ngagai Rumah Jehovah, mayuh orang makai sampai sida berasai puas. Tang agi bisi mayuh laluh pemakai, laban Jehovah udah merekatka nembiak Iya. Peda tuan, agi mayuh amat utai tu belaluh!”
11 Lebuh ninga nya, Hesekiah ngasuh orang nyediaka bilik setor* ba Rumah Jehovah. Sida pan lalu ngereja nya.
12 Sida setia mai pemeri, pemeri 10 peratus, enggau utai ti kudus. Konaniah, iya nya siku orang Lewi, diasuh ngemataka semua pemeri nya, lalu menyadi iya empu, iya nya Shimei, nyadi penulung iya.
13 Raja Hesekiah ngasuh Jehiel, Asasiah, Nahat, Asahel, Jerimot, Josabat, Eliel, Ismakiah, Mahat, enggau Benayah nulung Konaniah enggau Shimei. Asariah nya orang ke ngemataka Rumah Petara ti bendar.
14 Kore anak Imnah, iya nya orang Lewi ke nyaga pintu tunga ke timur, ngemataka pemeri sukarela ke Petara ti bendar. Iya mega diasuh magi pemeri ke deka diserahka ngagai Jehovah sereta pemeri ti pemadu kudus ke deka diberi ngagai bala imam.
15 Iya ngemataka Eden, Miniamin, Jesua, Semayah, Amariah, enggau Sekaniah. Ketegal sida ulih dikearapka, sida diasuh gawa ba kuta-kuta imam lalu magi pemeri ngagai bala sida nitihka raban. Enda ngira tuai tauka biak, semua sida diberi sama rata.
16 Pemeri nya mega diberi ngagai semua lelaki ke beumur tiga taun ke atas, ke udah direjista dalam lis tusut peturun. Sida gawa ba Rumah Jehovah sereta bejalaika pengawa sida nitihka raban sida ninting hari.
17 Bala imam enggau orang Lewi ke beumur 20 taun ke atas direjista dalam lis tusut peturun, nitihka suku enggau pengawa ke dikereja raban sida.
18 Bala anak bini sida sereta semua ruang bilik sida ke bukai, direjista dalam lis tusut peturun nya. (Sida patut nentuka diri mengkang kudus, laban sida diungkupka ngereja pengawa ti kudus.)
19 Peturun Aron, iya nya bala imam ke diau ba padang rumput ke ngelingi kuta-kuta sida, mega direjista dalam lis tusut peturun nya. Ba semua kuta nya, sekeda bala lelaki udah dipilih lalu diberi tanggung pengawa magi pemakai ngagai bala imam enggau semua sida ke udah direjista dalam lis tusut peturun orang Lewi.
20 Nya meh utai ke dikereja Hesekiah ba serata menua Judah. Iya setia ngagai Jehovah lalu mengkang ngereja utai ti betul sereta manah ba mata Petara iya.
21 Semua pengawa iya ke begigaka Petara dikereja iya enggau pengabis ati, enda ngira utai nya bekaul enggau pengawa ba Rumah Petara ti bendar tauka pengawa ke bekaul enggau Adat sereta pesan Petara. Nya alai, iya mujur dalam semua pengawa ke dikereja iya.
Nota Kaki
^ Jaku Asal, “endur ti tinggi.”
^ Tauka “nunjukka diri bepegai rat ba.”
^ Tauka “dikuduska.”
^ Tauka “bilik-bilik makai.”
