Bansa Israel ti Kedua 15:1-19
-
Ubah ke digaga Assa (1-19)
15 Petara nurunka kuasa kudus* Iya ngagai Asariah anak Odet.
2 Nya alai, Asariah pan betemu enggau Assa lalu madah: “Pendingka aku, O Assa enggau semua orang Judah, sereta orang Benjamin! Jehovah deka enggau kita seagi-agi kita nitihka Iya. Enti kita ngiga Iya, Iya deka ngelakka Diri ditemu kita. Tang enti kita ninggalka Iya, Iya mega deka ninggalka kita.
3 Udah lama orang Israel nadai Petara ti bendar, nadai imam ke ngajar, sereta nadai adat.
4 Tang lebuh dituntung penusah, sida nguingka diri ngagai Jehovah, Petara ke disembah orang Israel. Sida ngiga Iya, lalu Iya ngelakka Diri ditemu sida.
5 Maya nya, nadai sapa-sapa ke ulih mindah ngagai endur bukai enggau selamat, laban serata menua tu balat charut.
6 Bansa siti nganchurka bansa siti, lalu kuta siti nganchurka kuta siti, laban Petara ngasuh sida charut sereta napi mayuh macham penusah.
7 Tang, kita mesti berani lalu anang lemi semengat, laban kita deka bulih upah ke semua utai ke dikereja kita.”
8 Lebuh Assa ninga jaku nya sereta jaku benabi ari Nabi Odet, Assa nyadi berani lalu nganchurka semua patung ti kamah ba mata Petara di serata menua Judah enggau Benjamin. Iya mega nganchurka patung ba kuta-kuta ke dirampas iya ba kawasan begunung Efraim, lalu ngaduka baru alta Jehovah ke ba depan Rumah Jehovah.
9 Iya ngempuruka semua orang Judah enggau Benjamin, nyengkaum mayuh orang asing ari Efraim, Manasi, enggau Simion. Bala orang asing nya orang ke ninggalka Israel, lalu nitihka Assa pengudah sida meda Jehovah bisi enggau Assa.
10 Semua sida begempuru ba Jerusalem ba bulan ti ketiga, kena taun ti ke-15 Assa merintah.
11 Ba hari nya, sida nyerahka jelu ke dirampas sida ngagai Jehovah nyadika pemeri, iya nya 700 iku sapi enggau 7,000 iku bedus.
12 Kelimpah ari nya, sida mega ngaga sempekat deka nyembah Jehovah, Petara aki ini sida, enggau pengabis ati sereta enggau pengabis pengidup.
13 Barang sapa ke enggai nyembah Jehovah, Petara orang Israel, deka dibunuh, enda ngira tuai tauka biak, lelaki tauka indu.
14 Sida besumpah ngagai Jehovah enggau nyawa ti inggar sereta rami gaga ati. Sida mega nyepu tanduk enggau terumpit.
15 Serata menua Judah rami gaga ati, laban sida udah ngaga sumpah nya enggau pengabis ati. Sida beamat-amat ngiga Jehovah, lalu Iya ngelakka Diri ditemu sida. Iya mega enda ngetu nyaga sida ari munsuh ke ngelingi sida.
16 Raja Assa mega muai ini iya, Maakah, ari penuduk iya ti nyadi kuin, laban Maakah ngaga patung ti enda senunuh kena nyembah tiang kayu keramat. Assa ngeruntuhka patung nya, nganchurka patung nya, lalu nunu iya ba Lebak Kidron.
17 Tang, endur alai orang nyembah petara pelesu* ba Israel enda dianchurka. Taja pia, Assa nyembah Petara enggau pengabis ati sepemanjai pengidup iya.
18 Iya ngengkahka semua pirak, emas, enggau mayuh macham pekekas ke udah dikuduska iya enggau apai iya, ke dalam Rumah Petara ti bendar.
19 Nadai perang nyadi sampai ngagai taun ke-35 Assa merintah.
