1 Samuel 9:1-27
-
Samuel betemu enggau Saul (1-27)
9 Bisi siku lelaki ti amat kaya ari raban bansa Benjamin ke benama Kish. Iya datai ari peturun Abiel. Abiel nya anak Seror, lalu Seror nya anak Bekorat. Bekorat datai ari peturun Apiah.
2 Kish bisi siku anak lelaki ke benama Saul. Saul agi biak sereta sigat gamal. Nadai siku pan bala lelaki ba Israel ke sigat sereta tinggi agi ari iya. Semua sida semina ngeninggi bau iya.
3 Bisi sekali, keledai ke diempu Kish, iya nya apai Saul, udah lenyau. Ku Kish bejaku enggau Saul: “Bai siku ulun enggau nuan ngiga keledai nya.”
4 Seduai iya mansa kawasan ke begunung ba Efraim enggau kawasan Salisah, tang nadai tetemuka keledai nya. Udah nya, seduai iya neruska pejalai nengah kawasan Saalim, tang keledai nya pan nadai ba dia. Seduai iya bejalai nengah serata menua orang Benjamin, tang bedau ga tetemuka keledai nya.
5 Lebuh seduai iya datai ba kawasan Zup, Saul bejaku enggau ulun ke enggau iya: “Aram tua pulai, enggaika apai aku nyau irauka tua ari ke irauka keledai nya.”
6 Tang ku ulun nya: “Ba kuta ke semak endur tu, bisi siku nembiak Petara ke balat dipebasa. Semua utai ke disebut iya dikeamatka magang. Aram tua mupuk kin diatu. Engka iya ulih madahka endur alai tua tau tetemuka keledai nya.”
7 Saul lalu nanya iya: “Enti tua kin, nama utai ke ulih diberi tua ngagai iya? Nama utai ti dikemisi tua? Nadai roti dalam kantung tua. Nadai siti utai pan ke ulih diberi tua ngagai nembiak Petara ti bendar nya nyadika hadiah.”
8 Ku ulun nya nyaut: “Aku bisi sesingkap* duit pirak. Aku deka meri nya ngagai nembiak Petara ti bendar nya, ngambika iya ulih madahka endur alai tua tau tetemuka keledai nya.”
9 (Maya jeman kelia, nabi dikumbai orang penasihat.* Nya alai ba Israel, enti orang deka minta iring ari Petara, orang nya deka nyebut: “Aram kitai betemu enggau penasihat nya.”)
10 Udah nya, Saul bejaku enggau ulun iya: “Manah utai ku nuan nya. Aram tua mupuk kin.” Nya alai, seduai iya pan mupuk ngagai kuta endur alai nembiak Petara ti bendar nya.
11 Lebuh seduai iya niki lereng bukit ke nuju ngagai kuta nya, seduai iya betemu enggau bala indu ke mansang nyauk ai. Nya alai, seduai iya nanya: “Kati penasihat nya bisi ditu?”
12 Bala indu nya nyaut: “Au, nyin iya bejalai dulu ari seduai. Jampat agi ke seduai. Seharitu, iya datai ba kuta laban orang ditu deka nyerahka pemeri ba endur ti tinggi.
13 Lebuh seduai tama ngagai kuta nya, seduai ulih tetemuka iya sebedau iya niki ngagai endur ti tinggi lalu makai. Bala orang ba dia enda ulih makai enti iya bedau datai, laban iya meh ke deka merekatka pemeri. Alai seduai jampat mupuk ngambika ulih betemu enggau iya.”
14 Nya alai, seduai iya pan mupuk ngagai kuta nya. Lebuh seduai iya nyauka datai ba tengah-tengah kuta nya, Samuel datai betemu enggau seduai iya, lalu sida sama mupuk ngagai endur ti tinggi nya.
15 Sehari sebedau Saul datai, Jehovah udah madah ngagai Samuel.
16 Ku Iya: “Pagila, kira-kira maya tu, Aku deka nganjung siku lelaki ari raban bansa Benjamin ngagai nuan. Nuan mesti nata iya nyadi tuai ke bala nembiak Aku, orang Israel, lalu iya deka nyelamatka sida ari jari orang Pilistin. Aku udah meda pemerinsa bala nembiak Aku, lalu Aku udah ninga sebana sida.”
17 Lebuh Samuel meda Saul, Jehovah madah ngagai Samuel: “Nya meh lelaki ke dipadahka Aku ngagai nuan. Iya meh ke deka merintah bala nembiak Aku.”
18 Udah nya, Saul mansang ngagai Samuel ba pintu penama kuta, lalu ku iya nanya: “Padah ngagai aku, dini alai rumah penasihat nya?”
19 Ku Samuel nyaut: “Aku meh iya. Alai mupuk dulu ngagai endur ke tinggi nya, lalu seduai deka makai enggau aku seharitu. Pagi pagila, nuan tau mupuk, lalu aku deka nyaut semua tanya nuan.
20 Anang irau pasal keledai ke udah lenyau tiga hari nya, laban keledai nya udah temu. Endaka semua reta ba Israel enggi nuan sereta enggi semua ruang bilik apai nuan?”
21 Ku Saul nyaut: “Aku ari raban bansa Benjamin, iya nya raban bansa ke pemadu mit ari semua raban bansa Israel ke bukai, lalu ruang bilik aku meh ke pemadu enda penting dalam raban bansa Benjamin. Nyadi, nama kebuah nuan bejaku munyi nya ngagai aku?”
22 Udah nya, Samuel mai Saul enggau ulun iya ngagai bilik endur makai, lalu meri seduai iya endur ti pemadu badas. Maya nya, bisi kira-kira 30 iku temuai.
23 Samuel bejaku ngagai tukang masak: “Bai meh begian dagin ke udah diberi aku ngagai nuan, iya nya dagin ke diasuh aku simpan nuan.”
24 Nya alai, tukang masak nya ngambi dagin ba begian kaki lalu ngenahka nya ngagai Saul. Samuel lalu bejaku: “Empa meh. Tu endang digalau ke nuan. Aku udah madah ngagai sida aku bisi mai temuai, lalu aku ngasuh sida nyimpan dagin nya ke nuan laban seharitu hari ti penting.” Nya alai, sehari nya, Saul pan makai begulai enggau Samuel.
25 Udah nya, sida nurun ari endur ti tinggi lalu mupuk ngagai kuta. Samuel enggau Saul niki ngagai perabung* rumah, lalu neruska randau seduai iya.
26 Seduai iya tumu dani. Lebuh hari nyau tawas, Samuel ngangauka Saul ke bisi ba atas perabung rumah. Ku iya: “Besedia dulu meh nuan. Legi aku deka bejalai enggau nuan enda lama lebuh nuan mupuk.” Nya alai, Saul besedia, lalu seduai iya pan mupuk.
27 Lebuh sida nurun ke luar kuta, Samuel bejaku ngagai Saul: “Asuh ulun nuan mupuk dulu.” Nya alai, ulun nya pan mupuk. Ku Samuel agi: “Tang nuan nganti dulu. Bisi pesan Petara ke deka dipadahka aku ngagai nuan.”
Nota Kaki
^ Jaku Asal, “satu perempat shekel.” Peda Rujukan B14.
^ Tauka “penyanding penemu.” Ba ditu, iya merujuk ngagai orang ke nemu meda utai ti dipandangka Petara dalam runding iya.
^ Maya nya, mayuh rumah orang bisi perabung ti rata. Ba dia, sida ulih ngereja mayuh macham pengawa.
