1 Samuel 31:1-13
-
Saul enggau tiga iku anak iya mati (1-13)
31 Orang Pilistin beperang ngelaban orang Israel, lalu orang Israel ngerarika diri ari orang Pilistin. Mayuh amat orang Israel mati ba Gunung Gilboa.
2 Orang Pilistin majak begagaika Saul enggau anak iya, lalu sida munuh anak Saul, iya nya Jonatan, Abinadap, enggau Malki-sua.
3 Perang nya majak tusah ba Saul. Pengujung iya, orang ke nimbakka anak panah tetemuka Saul, lalu iya balat amat bakal laban kena anak panah sida.
4 Nya alai, Saul bejaku ngagai soldadu ke mai senyata iya: “Sintak pedang nuan lalu rejang aku ngena pedang nya, ngambika aku enda direjang lalu diperinsa orang ke enda besunat nya.” Tang, soldadu nya enggai ngereja nya laban iya balat takut. Nya alai, Saul ngambi pedang nya lalu ngerejang diri empu.*
5 Lebuh soldadu nya meda Saul udah mati, iya mega ngerejang diri ngena* pedang iya empu, lalu mati sama enggau Saul.
6 Saul, tiga iku anak lelaki iya, soldadu ke mai senyata iya, enggau semua soldadu Saul, mati ba hari nya.
7 Lebuh orang Israel ke diau ba kawasan lebak enggau ba kawasan Sungai Jordan meda bala soldadu orang Israel udah ngerarika diri, lalu Saul enggau anak lelaki iya udah mati, sida pan ninggalka kuta sida lalu ngerarika diri. Udah nya, orang Pilistin datai lalu diau ba dia.
8 Hari siti, lebuh orang Pilistin datai ngambi utai ari bangkai orang ke udah mati, sida tetemuka bangkai Saul enggau tiga iku anak lelaki iya ba Gunung Gilboa.
9 Nya alai, sida mumpung pala Saul lalu muka baju perang* iya. Udah nya, sida nganjung orang ke mai pesan ngagai serata menua Pilistin kena madahka berita nya ba kuil-kuil patung sida. Sida mega madahka berita nya ngagai semua rayat.
10 Udah nya, sida ngengkahka baju perang Saul ba kuil Astoret lalu ngantung bangkai iya ba dinding kuta Bet-san.
11 Orang ba Jabes-gilead ninga utai ke udah digaga orang Pilistin ngagai Saul.
12 Nya alai, bala pahlawan sida bejalai semalam-malam nya ngagai Bet-san. Sida ngambi bangkai Saul enggau bangkai tiga iku anak lelaki iya ari dinding kuta Bet-san, lalu pulai ngagai Jabes. Sida nunu semua bangkai nya ba din.
13 Udah nya, sida ngambi tulang Saul enggau bala anak iya lalu nguburka tulang nya ba baruh pun kayu tamaris ba Jabes, lalu sida bepuasa pengelama tujuh hari.
Nota Kaki
^ Tauka “ngerebahka diri ba atas pedang nya.”
^ Tauka “ngerebahka diri ba atas.”
^ Tauka “ngambi senyata.”
