1 Samuel 26:1-25
26 Udah nya, sekeda orang Sip datai ngagai Saul ba Gibeah, lalu madahka: “David belalai ba Bukit Hakilah, ke betunga enggau Jesimon.”*
2 Nya alai, Saul mupuk ngagai menua puang Sip sama enggau 3,000 iku bala soldadu orang Israel ti kuat, begigaka David ba din.
3 Saul nirika kem ba tisi jalai ba Bukit Hakilah, ke betunga enggau Jesimon. Maya nya, David benung ba menua puang, lalu iya nemu pasal Saul ke udah datai ba menua puang nya begigaka iya.
4 Nya alai, David nganjung pengintip kena nentuka Saul amat bisi ba dia.
5 Udah nya, David mupuk ngagai endur alai Saul nirika kem. Iya meda Saul enggau ketuai soldadu iya, Abner anak Ner, benung tinduk. Saul tinduk dalam kem iya, lalu dikelingi kem-kem bala soldadu iya.
6 David lalu nanya Ahimelek orang Het nya enggau Abisai anak Seruyah, iya nya abang Joap: “Sapa ke deka enggau aku ngagai kem Saul?” Abisai nyaut: “Aku deka enggau nuan.”
7 Nya alai, malam nya David enggau Abisai mansang ngagai kem Saul, lalu nemu Saul benung tinduk dalam kem iya. Sangkuh iya diujakka ba tanah semak pala iya, lalu Abner enggau bala soldadu bukai tinduk ngelingi iya.
8 Ku Abisai bejaku enggau David: “Seharitu, Petara udah nyerahka munsuh nuan ngagai jari nuan. Diatu, awakka aku ngentumka tubuh iya ngagai tanah ngena sangkuh. Sekali aja, enda ibuh dua kali.”
9 Tang ku David: “Anang ngemediska iya. Sapa tau ngemediska orang ke ditata Jehovah lalu ngumbai nya ukai utai ti bedosa?”
10 Ku David agi: “Aku besumpah atas nama Jehovah, Petara ti idup, Jehovah Empu deka munuh iya, tauka maya deka datai alai iya deka mati baka orang bukai, tauka iya deka mati lebuh iya beperang.
11 Ba mata Jehovah, aku enda tau datai jari ba orang ke udah ditata Jehovah. Diatu, aram tua ngambi sangkuh semak pala iya enggau sarang ai iya. Udah nya, tua mupuk.”
12 Nya alai, David ngambi sangkuh enggau sarang ai semak pala Saul, lalu seduai iya pan mupuk. Nadai orang meda tauka nemu pasal seduai iya, tauka tedani maya nya, laban Jehovah udah ngasuh semua sida tinduk jenak magang.
13 Udah nya, David meraka ke seberai lalu bediri ba tuchung gunung, jauh ari endur Saul.
14 David ngangauka Abner anak Ner enggau bala soldadu Saul. Ku iya: “Abner, ulih nuan ninga aku?” Disaut Abner: “Sapa nuan nya ke ngachau raja benung tinduk?”
15 David madah ngagai Abner: “Endaka nuan pahlawan ti berani? Sapa ke bisi baka nuan ba serata menua Israel? Nama kebuah nuan enda nyaga raja nuan? Siku soldadu udah datai deka munuh raja nuan.
16 Kita enda ngereja pengawa kita enggau manah. Aku besumpah atas nama Jehovah, Petara ti idup, kita patut mati, laban kita enda nyaga tuan kita, orang ke ditata Jehovah. Uji peda, dini alai sangkuh raja enggau sarang ai semak pala iya?”
17 Saul ngelala munyi nyawa David, lalu iya nanya: “Anak ku, David, nuan ke bejaku nya?” Disaut David: “Au, tuan raja.”
18 Ku David agi: “Nama kebuah tuan begagaika aku? Nama utai ke udah dikereja aku? Nama penyalah aku?
19 Tuan raja, pendingka meh utai ke dipadahka aku. Enti Jehovah ke ngasuh tuan ngelaban aku, awakka aku nyerahka pemeri bijirin ngagai Iya. Tang enti mensia ke ngasut tuan, awakka Jehovah ngasuh sida ditinggang penulah, laban sida udah muru aku lalu aku enda ulih diau ba tanah pesaka ke diberi Jehovah. Sida baka ke madah: ‘Alai, sembah petara-petara bukai!’
20 Anang nejuka aku mati jauh ari Jehovah. Tuan baka ke begigaka siku kutu, baka ke benung begagaika burung liar ba gunung.”
21 Ku Saul: “Aku udah bedosa. Pulai meh anak ku, David. Enda ku ngemediska nuan agi, laban seharitu, nuan udah ngumbai nyawa aku berega. Aku udah ngereja utai ti beli, lalu aku udah ngereja penyalah ti amat besai.”
22 Disaut David: “Tu sangkuh tuan. Asuh siku ari soldadu tuan mansang kitu ngambi sangkuh tu.
23 Jehovah deka malas pemanah enggau penetap ati tiap iku orang. Seharitu, Jehovah udah nyerahka tuan ngagai jari aku, tang aku enda sanggup ngemediska orang ke udah ditata Jehovah.
24 Sama baka nyawa tuan ke berega ba aku seharitu, awakka nyawa aku berega ba Jehovah. Awakka Iya ngelepaska aku ari semua penusah.”
25 Ku Saul nyaut David: “Awakka nuan diberekat anak ku, David. Nuan tentu deka ngereja mayuh utai, lalu nuan tentu deka mujur.” Udah nya, David mupuk, lalu Saul pan pulai.
Nota Kaki
^ Tauka engka, “padang pasir; menua puang.”
