1 Samuel 20:1-42
-
Jonatan setia ngagai David (1-42)
20 Udah nya, David rari ari Nayot, ba Ramah. Iya mansang ngagai Jonatan lalu nanya: “Nama utai ke udah dikereja aku? Nama penyalah aku? Nama dosa ke udah dikereja aku ngagai apai nuan sampai iya deka munuh aku?”
2 Jonatan lalu nyaut: “Enda patut iya deka munuh nuan! Tentu apai aku deka madah ngagai aku sebedau iya ngereja utai, enda ngira utai nya besai tauka mit. Enda patut apai aku ka ngelalaika utai tu ari aku.”
3 Tang ku David nampung: “Apai nuan tentu nemu nuan rinduka aku. Iya tentu berunding: ‘Jonatan enda tau nemu pasal tu ngambika iya enda tusah ati.’ Aku besumpah atas nama Jehovah, Petara ti idup, sereta besumpah atas nama nuan,* aku deka mati enda lama da agi!”
4 Jonatan madah ngagai David: “Aku deka ngereja nama-nama utai ke diasuh nuan.”
5 David madah ngagai Jonatan: “Pagila pengerami bulan baru. Lalu enti nitihka, aku makai enggau raja. Tang, awakka aku enda ibuh datai. Aku deka belalai ba luar kuta nyentuk ngagai malam hari ti ketiga.
6 Enti apai nuan nanya pasal aku, padah ngagai iya: ‘David udah minta pemendar ari aku, deka mupuk ngagai kuta iya ba Betlehem. Iya berumban pulai kin laban deka enggau sida sebilik nyerahka pemeri ke patut diserahka ninting taun.’
7 Enti apai nuan nyebut: ‘Nadai ngawa,’ reti nya aku deka selamat. Tang enti iya ringat, nuan deka nemu iya sigi keran deka ngemediska aku.
8 Nya alai, ayanka meh pengerindu nuan ti setia ngagai aku laban nuan udah ngaga sempekat enggau aku ba depan Jehovah. Tang enti aku amat salah, alu bunuh nuan aja meh aku. Nadai guna ga nuan nyerahka aku ngagai apai nuan.”
9 Ku Jonatan madah: “Anang munyi nya! Enti aku nemu apai aku sigi amat deka ngemediska nuan, aku tentu deka madah ngagai nuan.”
10 David lalu nanya Jonatan: “Enti apai nuan ringat nyaut nuan, sapa ke deka madah ngagai aku deh?”
11 Ku Jonatan nyaut: “Aram tua ngagai luar kuta.” Nya alai, seduai iya pan mupuk.
12 Udah nya, ku Jonatan: “Awakka Jehovah, Petara orang Israel, nyadi saksi tua. Entara pagila tauka lusa, aku nguji nemu niat ati apai aku. Enti iya lantang ati enggau nuan, aku deka ngirumka pesan ngagai nuan.
13 Tang, enti apai aku bisi niat deka ngemediska nuan lalu aku enda madahka nya ngagai nuan, sereta enda nentuka nuan mupuk enggau selamat, awakka Jehovah ngukum aku enggau balat. Awakka Jehovah bisi enggau nuan, baka Iya ke udah enggau apai aku suba.
14 Enda ngira aku agi idup tauka mati, awakka nuan ngayanka pengerindu ti setia ngagai aku, baka Jehovah.
15 Anang badu ngayanka pengerindu ti setia ngagai ruang bilik aku, taja pan Jehovah ngemunaska semua munsuh nuan ari dunya tu.”
16 Nya alai, Jonatan ngaga sempekat enggau ruang bilik David. Ku iya: “Jehovah deka ngukum semua munsuh David.”
17 Jonatan lalu minta David besumpah baru madahka diri rinduka iya, laban Jonatan rinduka David baka iya rinduka diri empu.
18 Udah nya, Jonatan bejaku enggau David: “Pagila pengerami bulan baru. Orang tentu ngiga nuan laban tempat duduk nuan kusung.
19 Ba hari ti ketiga, sida tentu mega deka nanyaka nuan. Nya alai, nuan mesti mupuk ngagai endur nuan belalai sehari nya lalu nganti semak batu tu.
20 Aku deka nimbakka tiga iti anak panah ba sepiak batu nya, ngaga diri baka ke deka nimbak utai.
21 Lebuh aku nganjung ulun aku, aku deka bejaku ngagai iya: ‘Alai, giga anak panah nya.’ Enti aku madah ngagai iya: ‘Anak panah nya ba sepiak nuan. Ambi anak panah nya,’ nya baru nuan ulih pulai. Aku besumpah atas nama Jehovah, Petara ti idup, enti aku nyebut munyi nya, reti nya nuan selamat lalu nadai utai ti bahaya deka nyadi ba nuan.
22 Tang, enti aku madah ngagai ulun nya: ‘Nyin! Ba din anak panah nya,’ nya alai nuan mesti mupuk, laban Jehovah ngasuh nuan mupuk.
23 Pasal semaya ke udah digaga tua, awakka Jehovah nyadi saksi entara tua belama iya.”
24 Nya alai, David pan belalai ba luar kuta. Maya pengerami bulan baru, Saul datai makai.
25 Raja duduk semak dinding baka selama. Jonatan duduk betunga mua enggau iya, lalu Abner duduk sepiak Saul. Tang tempat duduk David kusung.
26 Saul nadai nyebut nama-nama utai ba hari nya, laban iya berunding: ‘Engka bisi utai udah nyadi ba David ke ngasuh iya enda tuchi. Tentu iya enda tuchi.’
27 Ba hari ti kedua, iya nya sehari pengudah pengerami bulan baru, tempat duduk David agi kusung. Saul pan nanya anak iya, Jonatan: “Nama kebuah anak Jesi nya alu enda datai makai kenyau ari kemari?”
28 Disaut Jonatan: “David minta pemendar ari aku deka ngagai Betlehem.
29 Ku iya: ‘Awakka aku mupuk enggau kami sebilik nyerahka pemeri ba kuta nya. Abang aku ngasuh aku datai. Nya alai, enti nuan setuju, awakka aku betemu enggau bala menyadi aku.’ Nya kebuah iya nadai datai makai enggau raja.”
30 Saul lalu balat amat ringat ngagai Jonatan. Ku iya madah: “Nuan tu anak ke beli! Nuan ngumbai aku enda nemu nuan nyukung anak Jesi nya? Nuan ngemaluka diri empu sereta ngemaluka indai nuan!
31 Seagi-agi anak Jesi nya idup ba dunya tu, nuan enggau perintah nuan enda ulih tan lama. Asuh orang mai iya ngagai aku kitu. Iya mesti dibunuh!”
32 Tang ku Jonatan nyaut: “Nama kebuah iya mesti dibunuh? Nama utai ke udah dikereja iya?”
33 Saul lalu nikauka sangkuh iya ngagai Jonatan, deka munuh iya. Nya baru Jonatan nemu, apai iya sigi amat deka munuh David.
34 Jonatan balat amat ringat, lalu tekala nya mupuk ari endur nya. Ba hari nya, iya nadai makai laban iya tusah ati ke David sereta laban apai iya udah ngemaluka iya.
35 Pagi hari siti, Jonatan pansut ke luar kuta baka ke udah disemaya iya enggau David. Iya mai ulun iya ke agi biak enggau iya.
36 Iya madah ngagai ulun iya: “Alai nuan belanda, lalu giga anak panah ke deka ditimbakka aku.” Ulun iya pan belanda lalu Jonatan nimbakka anak panah ngelui ari ulun nya.
37 Lebuh ulun nya datai ba endur alai anak panah nya labuh, Jonatan lalu madah ngagai ulun iya: “Nyin! Ba din anak panah nya.”
38 Ku Jonatan agi: “Jampat agi! Anang ngelubahka diri.” Ulun Jonatan ngambi anak panah nya lalu pulai baru ngagai Jonatan.
39 Ulun nya enda nemu utai ke nyadi. Semina Jonatan enggau David aja nemu.
40 Udah nya, Jonatan meri senyata iya ngagai ulun iya, lalu madah: “Alai mupuk, lalu bai pulai senyata tu ngagai kuta.”
41 Pengudah ulun nya mupuk, David pan pansut ari endur iya belalai ke enda jauh ari endur nya, ke ba selatan. Udah nya, David besugang tiga kali. Seduai iya sama nyabak lalu nyium pangan diri. Tang David balat agi nyabak.
42 Jonatan madah ngagai David: “Alai meh mupuk enggau selamat, laban tua udah besemaya dalam nama Jehovah. Tua madah: ‘Awakka Jehovah nyadi saksi entara nuan enggau aku, sereta entara peturun nuan enggau peturun aku belama iya.’”
Udah nya, David mupuk, lalu Jonatan pulai baru ngagai kuta.
Nota Kaki
^ Tauka “atas nama nuan ti idup sereta ke enseput.”
