Satu Peter 4:1-19
4 Ketegal Kristus merinsa lebuh iya nyadi mensia, kita mega patut nyediaka diri empu ngambika kita berunding baka Kristus, laban barang sapa udah merinsa lebuh nyadi mensia udah badu ngereja dosa.
2 Enggau nya, iya ulih ngena pengidup iya ke pengudah nya ngereja peneka Petara, ukai agi nitihka pengingin mensia.
3 Suba, kita udah lama ngereja utai nitihka pengingin orang ba dunya. Kita enda malu ngereja mayuh utai ti jai,* enda tetagangka pengingin ke deka ngereja utai ti salah, kuat ngirup, berami nyentukka enda tetagangka ulah diri, enggai alah ngirup, sereta nyembah engkeramba ti keji.
4 Sida tekenyit laban kita enda agi belanda enggau sida ba jalai pengidup ti enda menuku. Nya kebuah, sida kasar jaku pasal kita.
5 Tang sida deka betanggungjawap ngagai iya ke sedia deka ngakim orang ke idup enggau orang ke mati.
6 Kebendar iya, nya meh kebuah Berita Manah ditusui mega ngagai orang ke mati.* Enggau nya, taja pan sida diakim nitihka utai ke dipeda orang ba sida, tang ba runding Petara, sida ulih idup nitihka iring kuasa kudus.
7 Tang pengujung semua utai nyau semak. Nya alai, kita patut nemu berunding enggau manah sereta seruran besedia* besampi.
8 Tang ke pemadu penting nya, rindu meh ke pangan diri enggau pengabis ati laban pengerindu ulih nutup mayuh dosa.
9 Rindu meh ngelaluka pangan diri lalu enda mut-mut lebuh ngereja nya.
10 Tiap iku kita udah nerima pemeri. Nya alai, kena meh pemeri nya nulung pangan diri, baka siku pengurus ti manah ke nerima pemanah ati Petara ti besai ke diayanka ngena bemacham chara.
11 Enti orang bejaku, awakka iya nusui pesan ari Petara. Enti orang nulung orang bukai, awakka iya bepanggai ba pengering ke diberi Petara lebuh ngereja nya. Enggau nya, Petara ulih dimuliaka ba semua pekara nengah Jesus Kristus. Ngarapka mulia enggau kuasa Petara meruan belama iya. Amin.
12 Bala menyadi ke dikerindu, lebuh kita napi penguji ke baka api, anang meh kita tekenyit baka ke napi utai ke nyelai.
13 Tang awakka kita terus gaga ati, laban baka Kristus, kita mega merinsa ketegal kebuah ti sama. Enggau nya, lebuh mulia iya dipandangka, kita ulih balat gaga sereta lantang ati.
14 Enti kita dikelese* ketegal nama Kristus, kita gaga ati laban kuasa kudus Petara ti bemulia bisi ba dalam kita.
15 Tang, awakka nadai siku ari bala kita merinsa ketegal munuh orang, tauka ngenchuri, tauka ngereja penyalah, tauka sibuk deka masuk champur enggau pengawa orang.
16 Enti orang merinsa ketegal iya nyadi orang Kristian, iya enda patut malu, tang iya patut terus ngemuliaka Petara lebuh iya idup nyadi orang Kristian.
17 Maya ke ditetapka kena ngakim udah datai lalu nya deka berengkah ari rumah Petara. Enti pengawa nya berengkah ari kitai, nama deka nyadi ngagai orang ke enda ngasika Berita Manah ari Petara?
18 “Enti orang ke lurus patut bebendar ngambika diselamatka, nama deka nyadi ngagai orang ke enda bebasaka Petara enggau orang ke bedosa?”
19 Nya alai, awakka sida ke merinsa ketegal ngereja peneka Petara, terus nyerahka pengidup diri ngagai Iya ke setia sereta ke ngaga semua utai lebuh sida ngereja utai ti manah.
Nota Kaki
^ Jaku Gerika, “a·sel′gei·a.” Peda Penerang Leka Jaku, “A·sel′gei·a.”
^ Tu ditujuka ngagai sida ke dikumbai udah mati ketegal dosa sida. Peda Epesus 2:1.
^ Tauka “bejaga ngambika.”
^ Tauka “dipejaika orang.”
