Satu Korint 13:1-13
-
Pengerindu jauh agi beguna (1-13)
13 Taja pan aku ulih bejaku ngena jaku mensia enggau jaku melikat, tang enti aku nadai pengerindu, aku semina baka gong ke dipangkung tauka simbal* ti inggar.
2 Taja pan aku bulih pemeri benabi, ulih meretika semua resia ti kudus, bisi semua penemu, sereta bisi pengarap ti tegap nyentukka ulih mindahka bukit, tang enti aku nadai pengerindu, aku nadai guna.
3 Taja pan aku ngena semua reta aku kena ngintu orang bukai, lalu taja pan aku sanggup nyerahka pengidup aku ngambika aku ulih berasai temegah, tang enti aku nadai pengerindu, aku nadai bulih nama-nama penguntung.
4 Orang ke bisi pengerindu nya orang ti sabar sereta manah ati. Iya enda chemburu, enda bejaku begah, enda sumbung,
5 enda jai adat, enda ngenuluka diri empu, sereta enda jampat ringat. Iya mega enda bedendam lebuh orang ngemediska ati iya.
6 Iya enda gaga ati enggau utai ti enda lurus, tang iya gaga ati enggau utai ti bendar.
7 Iya ngenatka semua utai, pechayaka semua utai, seruran andal nganti utai ke dikearapka, sereta tan napi semua utai.
8 Pengerindu enda nemu abis.* Tang pemeri ke ngasuh orang ulih benabi, ulih bejaku ngena bansa jaku bukai, sereta pemeri ke ngasuh orang bulih penemu, deka abis.
9 Nya ketegal penemu enggau jaku benabi kitai bedau chukup.
10 Tang lebuh utai ke chukup datai, utai ke enda chukup nya deka nadai agi.
11 Lebuh aku agi mit, aku bejaku baka anak mit, berunding baka anak mit, sereta mansik reti utai baka anak mit. Tang diatu aku udah besai tuai. Aku enda baka anak mit agi.
12 Diatu, kitai semina meda ayas ba cheremin besi. Tang ila, kitai deka meda utai enggau terang agi, baka ke betunga mua. Diatu, penemu aku enda chukup. Tang ila, aku deka ngembuan penemu ti chukup* pasal Petara, sama baka Iya ke nemu pasal aku enggau betul.
13 Taja pia, tiga iti pekara tu tetap meruan bisi: Pengarap, pengandal kitai nganti utai ke dikearapka, enggau pengerindu. Tang pengerindu meh ke pemadu besai entara tiga iti nya.
Nota Kaki
^ Iya nya, sebengkah perengka musik.
^ Tauka “Pengerindu seruran mujur.”
^ Tauka “ti betul.”
