Satu John 1:1-10
1 Kami nulis ngagai kita pasal iya ke endang udah bisi kenyau ari pun, ke udah didinga kami, ke udah dipeda mata kami empu, ke udah diperatika kami, sereta ke udah ditegu jari kami empu, iya nya jaku ke meri pengidup.
2 (Au, pengidup ti meruan belama iya udah dipandangka ngagai kami, lalu kami udah meda pengidup nya. Diatu, kami meri saksi sereta madah ngagai kita pasal pengidup nya, ti datai ari Apai sereta ke udah dipandangka ngagai kami.)
3 Utai ke udah dipeda sereta didinga kami dipadahka kami ngagai kita, ngambika kita mega ulih begulai enggau kami, lalu nya mega nunjukka kita begulai enggau Apai sereta enggau Anak Iya, Jesus Kristus.
4 Kami nulis pasal semua nya ngambika kitai penuh laban pengaga ati.
5 Tu meh pesan ke didinga kami ari Jesus, lalu kami madahka iya ngagai kita: Petara nya penampak, lalu mimit pan nadai pemetang ba Iya.
6 Enti kitai madahka, “Kitai begulai enggau Petara,” tang kitai agi idup dalam pemetang, reti nya kitai bula lalu enda ngereja utai ti bendar.
7 Tang enti kitai bejalai ba dalam penampak, baka Iya Empu ke bisi ba dalam penampak, reti nya kitai begulai enggau semua bala menyadi, lalu darah Anak Iya, iya nya Jesus, ngasuh kitai nyadi tuchi ari semua dosa.
8 Enti kitai madahka, “Kitai nadai dosa,” reti nya kitai nipu diri empu lalu pemendar nadai ba dalam kitai.
9 Enti kitai ngaku dosa kitai, Iya deka ngampunka dosa kitai lalu ngasuh kitai tuchi ari semua utai ti enda lurus, laban Iya setia enggau lurus.
10 Tang enti kitai madahka, “Kitai enda kala bedosa,” reti nya kitai ngumbai Petara bula lalu jaku Iya nadai ba dalam kitai.
