Baka gempuru ba eklisia, gempuru ke pengawa nginjil mega siti atur ari Jehovah kena kitai meransang pangan diri sereta ngereja pengawa ti badas. (Heb. 10:24, 25) Gempuru tu patut dipejalaika pengelama lima ngagai tujuh minit, nyengkaum ngatur raban, ngatur endur nginjil, sereta sampi penutup. (Enti gempuru ke pengawa nginjil dipejalaika pengudah gempuru eklisia, awak gempuru nya ulih dipandakka agi.) Pengiring patut nyediaka utai ti mai penguntung ngagai bala menyadi ke nginjil maya nya. Ambika chunto, mayuh bala menyadi ke nginjil ba Hari Enam, enda nurun nginjil ba tengan minggu. Ketegal nya, sida engka enda ingatka chara berandau enggau orang. Nya alai, pengiring ulih madahka pasal chara berandau enggau orang. Nama sekeda topik bukai ke ulih dikerandauka ba gempuru tu?

• Chara ke ulih dikena berandau ari Pengidup enggau Pengawa Kristian Kitai—Bup Kereja Kena Gempuru

• Chara ngepunka randau ngena berita ti pemadu baru tauka utai ke benung nyadi

• Chara mutarka jaku sakal ke suah didinga

• Chara berandau enggau orang ke enda pechayaka Petara nya bisi, orang ke pechayaka evolusi, orang ke ngena bansa jaku bukai, tauka orang ke ngembuan pengarap ti jarang ditemu ba kandang endur nuan nginjil

• Chara ngena laman web jw.org, aplikasi JW Library^®, tauka Bup Kudus

• Chara ngena siti ari litaricha ba Perengka Kena Ngajar

• Chara nginjil ke bukai, baka nginjil ngena talipun, nulis surat, nginjil ba endur orang mayuh, datai ngabas, tauka belajarka Bup Kudus

• Pengingat pasal pengelikun, chara ngubah randau, nyaga ulah diri maya nginjil, ngembuan runding ti positif, tauka utai bukai ke bekaul enggau tu

• Berandauka siti pelajar tauka video ari brosur Ngemanahka Agi Chara Macha enggau Ngajar

• Chara meransang sereta nulung kaling nginjil

• Kerandauka siti ayat Bup Kudus ke bisi kaul enggau pengawa nginjil tauka peneleba ti meransang ba pengawa nginjil