Orang suah agi deka ninga enti pesan ke dibai kitai ngena bansa jaku sida empu. Nya alai, ba Pentikos taun 33 M., Jehovah ngatur ‘orang Judah ke angkunka Petara, ke datai ari semua menua di dunya tu’ ulih ninga berita manah ‘ngena jaku sida empu,’ taja pan sida engka teleba ngena bansa jaku menua nya, baka Hebrew tauka Gerika. (SKR. 2:5, 8) Ba endur ke ngembuan bemacham bansa jaku, eklisia ke ngena jaku ti bebida engka bekunsi nginjil ba endur ti sama. Ketegal tu, bala penginjil ari eklisia ti bebida nya engka suah betemu enggau orang ti sama, lalu tu ulih ngasuh orang nya ringat. Nya alai, baka ni bala penginjil ulih besaup ngambika ulih nyeliahka penanggul tu?

• Baum (J-lam. 15:22): Bala tuai pengawa nginjil ari tiap iti eklisia patut baum enggau pangan diri sereta ngaga atur ti ulih dikena bekaul enggau pengawa nginjil. Enti kandang endur nginjil sida enda mayuh, eklisia ke ngena jaku ti bebida engka minta eklisia kita enda nginjil ngagai rumah ke ngena jaku eklisia sida. Taja pia, enti kandang endur nginjil sida mayuh lalu sida enda ulih nembuka endur nya, sida engka minta eklisia kita nginjil ngagai semua rumah lalu madahka enti bisi orang ke ngena jaku eklisia sida nunjukka minat. (od-IN 93 ¶37) Tauka sida engka minta eklisia kita nulung ngiga orang ke ngena jaku eklisia sida lalu meri alamat rumah orang nya ngagai sida. (km-ML 7/12 5, kutak) Kingatka, lebih ari siti bansa jaku dikena ba rumah ti sama. Atur nginjil ke digaga patut nitihka undang-undang menua nya. Kitai enda ngambi penerang pasal seiku-seiku orang enti utai nya enda dikemendarka.

• Besaup (Eps. 4:16): Titihka atur ke diberi tuai pengawa nginjil enggau manah. Kati nuan benung ngajar orang ke rindu agi belajar ngena bansa jaku ti ukai dikena ba eklisia nuan? Pemelajar Bup Kudus nya engka ulih mansang enggau jampat enti nuan ngasuh menyadi ari eklisia tauka raban ti ngena jaku pemelajar nya empu belajar enggau iya.

• Besedia (J-lam. 15:28; 16:1): Enti orang ke bempu rumah ngena jaku bukai ba kandang nginjil nuan, enggau naka ulih meh bekunsika berita manah ngagai iya. Nuan ulih nyediaka diri enggau berundingka bansa jaku ke dikena orang ba kandang nginjil nuan lalu download salin Bup Kudus enggau video dalam jaku nya ke perengka elektronik nuan. Nuan mega ulih ngena aplikasi JW Language kena belajar chara meri jaku tabi dalam sekeda bansa jaku.