Semina sida ke nitihka standard moral Jehovah aja ke ulih ngembuan kaul ti rapat enggau Jehovah. (1Pe 1:14-16) Enti pemelajar Bup Kudus udah muai ulah ti enda manah, sida engka deka bulih pengelantang ba ruang bilik, pengerai ti manah, sereta kurang penanggul ba duit.

Terangka ngagai pemelajar Bup Kudus nuan pasal standard moral Jehovah, kebuah Jehovah meri standard nya, sereta penguntung ke deka diulih enti kitai ngasika standard Iya. Tulung meh pemelajar Bup Kudus nuan ngubah chara sida berunding, ngambika sida ngereja utai ti dikedekaka Jehovah. (Eps 4:22-24) Tulung sida andal, Jehovah ulih nulung sida muai semua ulah ti enda manah nyengkaum tebiat ti tusah dibuai sida. (Plp 4:13) Ajar sida bebendar minta tulung ari Jehovah lebuh sida bisi pengingin deka ngereja dosa. Tulung sida nemu utai ke ulih manjuk sida, ngambika sida ulih nyeliahka nya. Peransang sida ngereja aktiviti ke ulih nagang pengingin sida ngereja tebiat ti enda manah. Nuan deka gaga ati maya meda sida mujur nyeliahka ulah ti enda manah ketegal tulung ari Jehovah.

PEDA VIDEO NULUNG PEMELAJAR BUP KUDUS NYELIAHKA ULAH TI ENDA MANAH, LALU SAUT TANYA TU:

• Nama reaksi Neeta enggau bala tuai gempuru lebuh nemu Bungai bisi tebiat ti enda manah?

• Baka ni Neeta nulung Bungai?

• Baka ni Bungai minta tulung ari Jehovah?