Nitihka ajar Bup Kudus, enda salah rinduka diri empu. Tu nyengkaum, kitai patut nyaga utai guna ba diri empu, bebasaka diri empu, sereta nyaga pemanah nama diri. (Matthew 10:31) Ari ke ngajar kitai pasal berundingka diri empu aja, Bup Kudus nunjukka chara ti ngena rinduka diri empu.

Sapa ke patut pemadu dikerinduka kitai?

1.   Kitai patut nunjukka pengerindu kitai kelebih agi ngagai Petara. Bup Kudus ngajar, ukum ti pemadu dikemeratka iya nya, ‘Kita enda tau enda rinduka Jehovah, Petara kita.’​—Mark 12:28-​30; Ulang Adat 6:5.

2.   Ukum kedua ti patut dikemeratka kitai iya nya: “Rinduka pangan nuan, baka nuan ke rinduka diri empu.”​—Mark 12:31; Adat Lewi 19:18 19:18.

3.   Bup Kudus nadai madahka ukum enggau nyemetak pasal rinduka diri empu. Tang Bup Kudus bisi madahka kitai patut ‘rinduka orang bukai baka rinduka diri empu.’ Tu nunjukka rindu sereta bebasaka diri empu enggau penumbas iya nya patut sereta meri penguntung.

Sapa ke pemadu dikerinduka Jesus?

 Jesus ngayanka pengerindu ti betul ngagai Petara, orang bukai, enggau diri empu. Iya mega dekaka nembiak iya nitihka teladan iya.​—John 13:34, 35.

1.   Jesus pemadu rinduka Petara Jehovah lalu iya deka nyerahka diri ngereja peneka Petara. Jesus madahka, “Aku ngereja utai ti diasuh Apai, ngambika dunya nemu aku rinduka apai.”​—John 14:31.

2.   Jesus mega rinduka orang bukai. Iya nunjukka pengerindu iya enggau chara sanggup nyerahka nyawa diri ketegal mensia mayuh.​—Matthew 20:28.

3.   Jesus mega rinduka diri empu. Iya ngiga awak endur belelak, makai, begulai enggau bala murid iya sereta sida ke engka nyadi murid iya.​—Mark 6:​31, 32; Luke 5:​29; John 2:​1, 2; 12:2.

Kati kitai agi ulih ngasaika pengaga tauka bulih nama ti manah enti kitai rindu agi ke orang bukai ari diri empu?

 Au, laban kitai ditempa neladan Petara sereta pemanah Iya, iya nya pengerindu ti enda berundingka diri empu. (Pemungkal 1:​27; 1 John 4:8) Reti iya, kitai endang ditempa nunjukka pengerindu ngagai orang bukai. Taja pan rinduka diri empu nya enda salah, tang kitai deka lebih gaga agi enti kitai rinduka Petara sereta beberatka pengawa ti manah ngagai orang bukai. Bup Kudus madahka, “Beberekat agi orang ke meri, ari orang ke nerima.”​—Kereja Rasul 20:35.

 Kemayaharitu, mayuh orang berunding, sida deka gaga agi enti beberatka diri empu. Sida “rinduka agi kediri empu” ari ke “rinduka orang bukai.” Tang, mayuh peneleba udah nerangka orang ke meri nya deka lebih bepengerai sereta gaga ati enti sida nitihka prinsip Bup Kudus tu: “Anang berundingka diri empu aja, tang berunding ke orang bukai.​—1 Korint 10:24.