Jesus ngena sempama pasal “orang Samaria ti manah ati” kena nunjukka, pasal seseiku orang ke bisi penyinu deka mantu orang bukai, enda ngira bansa tauka gaya pengidup sida. Nya alai, leka jaku “orang Samaria ti manah ati” kesuah iya kena ngambarka pasal seseiku orang ti meri bantu ngagai orang ke begunaka tulung.

Ba artikel tu bisi

•  Nama reti sempama pasal orang Samaria ti manah ati?

•  Nama kebuah Jesus becherita pasal sempama tu?

•  Nama utai ke dipelajar ari sempama tu?

•  Sapa orang Samaria?

•  Kati sempama tu cherita amat?

Tu lansa jaku sempama ke dicheritaka Jesus: Seiku lelaki orang Judah, ke datai ari Jerusalem benung nuju ngagai Jeriko. Ba pejalai nya, iya dirumpak, dipalu, sereta ditejuka setengah mati.

Lebuh seiku imam orang Judah tepedaka lelaki ke bakal nya, iya enda kiruh lalu neruska pejalai iya. Pengudah nya, seiku agi tuai pengarap orang Judah mega ngereja utai ti sama. Taja pan kedua-dua lelaki nya sebansa enggau lelaki ke bakal, tang sida enggai nulung iya.

Nyau kelama, seiku lelaki ari bansa bukai mansa iya. Iya orang Samaria. (Luke 10:33; 17:16-18) Iya berasai sinu ngagai lelaki ke bakal nya, lalu ngendas telih iya. Udah nya, iya mai lelaki ke bakal nya ngagai rumah numpang, lalu ngintu iya sepemanjai malam. Hari siti, iya meri duit ngagai orang ke bempu rumah numpang nya, ngambika sida ulih terus nyaga iya. Iya mega besemaya deka mayar semua ungkus ke bukai, ke dikena lelaki nya.—Luke 10:30-35.

Jesus becherita pasal sempama tu ngagai seiku lelaki orang Judah. Laban lelaki nya berunding, iya semina patut manah enggau orang ke sebansa sereta sama agama enggau iya. (Luke 10:36, 37) Cherita tu ditulis ba Bup Kudus, kena meri penguntung ngagai semua orang ke deka ngelantangka ati Petara.—2 Timoti 3:16, 17.

Sempama tu ngajar kitai pasal seiku orang ti manah ati deka nunjukka penyinu nengah pengawa iya. Iya deka meri tulung ngagai orang ke merinsa enda ngira jaku, bansa tauka chara pengidup sida. Iya ngelayan orang bukai baka ke dikedekaka iya ari orang bukai.—Matthew 7:12.

Orang Samaria diau tunga ke utara Judea. Sida tu nyengkaum peturun ke datai ari kawin entara orang Judah enggau orang ke ukai Judah.

Ba abad keterubah Masihi, orang Samaria numbuhka seraban agama diri empu. Sida nerima lima iti bup keterubah ba bup Hebrew, tang nulak ke bukai.

Mayuh orang Judah maya jeman Jesus begedika orang Samaria, lalu enggai begulai enggau sida. (John 4:9) Indah, sekeda orang Judah ngeleseka sida lalu ngangauka sida “orang Samaria.”—John 8:48.

Bup Kudus nadai madah, sekalika sempama tu cherita amat. Taja pia, Jesus selalu madah pasal pengawa ke suah dikereja sereta endur ke dikelala mayuh orang ba ajar iya. Enggau chara tu, peninga iya senang agi faham ke ajar iya.

Ari segi sejarah, mayuh utai ke ulih ditemu ba sempama tu. Ngambika chunto:

• Takah pejalai ke nurun ari Jerusalem ngagai Jeriko lebih ari 20 kilometer. Lalu peningi entara Jerusalem enggau Jeriko, iya nya dalam 1 kilomter. Sejalai enggau utai tu, sempama Jesus pasal lelaki orang Judah endang betul, lebuh iya madah: “Orang siku nurun ari Jerusalem mansang ngagai Jeriko.”—Luke 10:30.

• Orang Lewi enggau imam ke diau ba Jeriko selalu ngena jalai nya lebuh sida ngagai Jerusalem.

• Kesuah iya, perumpak rindu belalai ba jalai ke sunyi sereta nadai mayuh orang nunjah, lalu nganti peluang ngerumpak, kelebih agi orang ke kediri aja.