Mayuh ari orang ke nanya tu ketegal sida kala ngasaika pemerinsa, tauka lenyau orang ke dikesayau. Sida begunaka pengelantang ba ati, ukai semina saut. Bisi mega orang nyangka Holocaust, iya nya munuh mayuh orang Judah maya Perang Dunya Kedua, siti ari penyai ti pemadu balat kala nyadi, nyentukka sida nadai arapka Petara agi.

 Runding orang: Kitai enda patut nanya kebuah Petara nejuka Holocaust nyadi.

 Fakta: Mayuh orang ke arapka Petara, kala nanya Petara kebuah Iya nejuka penyai nyadi. Ngambika chunto, nabi Habakuk kala nanya Petara, “Nama kebuah Nuan ngasuh aku meda penyalah enggau penusah ti baka tu? Baka ni ku Nuan tan meda penyalah ti baka tu?” (Habakuk 1:3) Petara enda nganu Habakuk, tang Petara nentuka tanya nya ditulis dalam Bup Kudus ngambi semua orang ulih macha iya.

 Runding orang: Petara enda ibuhka pemerinsa mensia.

 Fakta: Petara amat begedi meda penyai sereta pemerinsa. (Jaku Dalam 6:16-19) Maya jeman Noah, Petara berasai “balat amat ngesalka nya” maya Iya meda mayuh penyai nyadi ba dunya. (Pemungkal 6:5, 6) Amat, ati Petara anchur luluh maya Iya meda Holocaust nyadi.—Malaki 3:6.

 Runding orang: Holocaust siti chara Petara ngukum orang Judah.

 Fakta: Petara nejuka Jerusalem dirusak bala soldadu Rome kena abad keterubah. (Matthew 23:37–24:2) Tang pengudah nya, Petara enda kala nejuka sebarang bansa diberi pengawa ti spesial tauka diukum. Ba mata Petara, “orang Judah enggau orang bansa bukai sigi nadai bida ari pangan diri.”—Rome 10:12.

 Runding orang: Enti Petara nya pengerindu sereta amat bisi, Iya tentu deka nagang Holocaust nyadi.

 Fakta: Taja pan Petara enda ngasuh pemerinsa nyadi, tang Iya nejuka pemerinsa nyadi dalam sesiti timpuh.—James 1:13; 5:11.

 Kebuah ti sama Petara ngemendarka pemerinsa nyadi. Ketegal, deka mutarka tanya ti kala dipansutka Sitan beribu taun ti udah. Bup Kudus madahka, dunya tu dibaruh kuasa Sitan, ukai Petara. (Luke 4:1, 2, 6; John 12:31) Aram kitai meda dua iti fakta ti amat beguna dalam Bup Kudus, ke nerangka kebuah Petara nejuka Holocaust nyadi.

1.   Maya Petara ngaga mensia, sida diberi peluang bibas milih. Petara madahka sepasang laki bini keterubah, iya nya Adam enggau Awa pasal peneka Iya, tang Iya enda kala mejal sida ngasika Iya. Petara meri seduai iya peluang bibas milih. Tang sayau, seduai iya ngaga pemutus ti salah. Seduai iya deka nentuka kediri empu pasal utai ti betul enggau salah, lalu enda nerima iring ari Petara. Berengkah ari nya, mayuh orang ngaga pemutus ti salah, lalu ngujungka semua mensia bedosa. (Pemungkal 2:17; 3:6; Rome 5:12) Baka ke dipadahka bup Statement of Principles of Conservative Judaism: “Mayuh pemerinsa ke nyadi ba dunya tu ketegal mensia salah ngena peluang bibas milih.” Ari ke ngambi baru peluang bibas milih nya, Petara meri awak ngagai mensia merintah diri empu.

2.   Petara tentu ulih sereta deka ngetuka pengawa Holocaust. Petara besemaya deka ngidupka orang ti udah mati, nyengkaum sida ke nyadi mansa Holocaust. Iya mega deka muai pengingat ti pait ke kala diasaika bala mansa ke napi pemerinsa tu. (Isaiah 65:17; Kereja Rasul 24:15) Pengerindu Petara ti nadai banding ngagai mensia nunjukka, Iya tentu deka ngamatka semua semaya Iya.

 Mayuh mansa Holocaust ngetanka pengarap sida, lalu bulih pengidup ti bisi tuju, laban sida nemu kebuah Petara nejuka penyai nyadi, enggau baka ni Iya deka ngetuka semua pemerinsa jemah ila.