Enda. Bup Kudus udah dikupi mayuh kali pengelama beribu taun ba utai ti senang rusak. Tang, enti dibandingka enggau bemayuh macham manuskrip kelia, utai dalam Bup Kudus enda berubah.

 Beribu iti manuskrip Bup Kudus kelia udah ditemu. Sekeda ari nya, ngembuan mimit bida. Tu nunjukka bisi sekeda salah lebuh iya dikupi. Tang, bida ti mit nya enda ngubah reti teks asal. Taja pia, bisi sekeda bida ti besai udah ditemu, lalu bida tu ketegal bisi orang nguji ngubah mesej Bup Kudus. Perundingka dua iti chunto tu:

1.   Ba 1 John 5:7, sekeda salin Bup Kudus kelia ngembuan ayat baka tu: “ke ba serega nya, Apai, Jaku, sereta Roh Petara: ketiga-tiga tu seiku.” Tang, ayat nya nadai ba teks asal baka ke ulih diperatika ari sekeda manuskrip ti ulih dipechaya. Ayat nya udah ditambah lebuh iya dikupi. a Nya alai, ayat tu udah dikeluarka ari mayuh salin Bup Kudus moden.

2.   Nama Petara empu bisi ayan beribu kali ba manuskrip kelia. Tang, ba mayuh salin Bup Kudus nama nya udah diganti enggau gelar baka “Tuan” tauka “Tuhan.”

 Diatu, mayuh manuskrip udah ditemu. Nyadi, utai ti salah ulih ditemu enggau jampat. b Baka ni semua dokumen tu ke dibandingka nunjukka pengamat jaku Bup Kudus kemayaharitu?

•   Lebuh bejaku pasal Bup Kudus Hebrew (kesuah iya dikumbai “Sempekat Lama”), seiku pakar ke benama William H. Green madahka: “Nadai siti pan utai ke ditulis ari kelia udah dikupi enggau chukup manah.”

•   Bekaul enggau Bup Kudus Gerika, tauka “Sempekat Baru,” pakar Bup Kudus F. F. Bruce nulis: “Enti nadai orang berasai kakang ati pasal pengamat jaku sekeda utai ke ditulis kelia, sida mega enda tau kakang ati ngagai pengamat Sempekat Baru, laban Sempekat Baru tu disukung mayuh bukti.”

•   Frederic Kenyon, seiku pakar Bup Kudus ti tebilang madahka “seseiku orang ulih megai Bup Kudus lalu andal utai ke dipegai iya endang Jaku Petara ti bendar. Lalu utai ke bisi dalam nya enda diubah ari siti rebak ke rebak ti bukai pengelama beratus taun.”

•   Bala penyalin orang Judah enggau Kristian nulis utai ke nyadi pasal dosa ti besai ke digaga nembiak Petara. c (Penyampau 20:12; 2 Samuel 11:2-4; Galatia 2:11-14) Sida mega nulis pasal teks ke ngutuk bansa Judah ti enda ngasi. Pia mega, sida enda mansutka teks ke madahka pasal ajar mensia ti salah. (Hosea 4:2; Malaki 2:8, 9; Matthew 23:8, 9; 1 John 5:21) Ketegal bala penyalin tu nuliska utai ti nyadi enggau betul, sida nunjukka diri ulih dipechaya lalu ngembuan basa ti besai ngagai Jaku Petara ti tuchi.

•   Endang amat, Petara nya Pengarang Bup Kudus. Nya alai, Iya tentu deka nyaga jaku Iya ngambika seruran betul. d (Isaiah 40:8; 1 Peter 1:24, 25) Nambahka nya, Petara dekaka Bup Kudus mai penguntung ukai semina ngagai orang jeman kelia, tang mega ngagai orang kemayaharitu. (1 Korint 10:11) Kebendar iya, “semua utai ti udah ditulis dulu kelia endang ditulis kena ngajar kitai, ngambika ulih pengeliat ati kitai enggau ulih peransang ari Bup Kudus, kitai bisi pengadang.”—Rome 15:4.

•   Jesus enggau bala murid iya mega bisi ngena ayat ari salin Bup Kudus Hebrew, lalu sida enda berasai kakang ati sekalika teks kelia nya betul tauka enda.—Luke 4:16-21; Surat Kereja Rasul 17:1-3.