Enda, semua pengarap enda sama. Bup Kudus ngundan mayuh chunto pengarap ke enda ngelantangka ati Petara. Bisi dua kategori pengarap ke baka tu.

Kategori 1: Nyembah petara pelesu

 Bup Kudus madahka pengawa nyembah petara pelesu nya “nadai reti” sereta “nadai guna.” (Jeremiah 10:3-5; 16:19, 20) Petara Jehovah a ngasuh bansa Israel kelia: “Anang nyembah petara bukai tang semina Aku aja.” (Pemansut 20:3, 23; 23:24) Lebuh orang Israel nyembah petara bukai, ‘Jehovah ringat ngagai sida.’—Penyampau 25:3; Adat Lewi 20:2; Pengulu 2:13, 14.

 Kemayaharitu, Petara agi bisi runding ti sama ngagai sida ke nyembah petara pelesu. (1 Korint 8:5, 6; Galatia 4:8) Iya meri pesan ngagai sida ke deka nyembah Iya ngambika nadai kaul enggau orang ke nyembah petara ti pelesu. Petara madahka: “Pansut kita ari sida, lalu seraraka diri ari sida.” (2 Korint 6:14-17) Enti semua pengarap sama, lalu mai orang semak ngagai Petara, nama kebuah Petara meri pesan ti baka nya?

Kategori 2: Nyembah Petara ti bendar tang ngena chara ti enda diterima Iya

 Orang Israel kelia nyembah Petara ngena chara enggau adat ke dikena nyembah petara pelesu. Tang Jehovah nulak sembah ti baka nya laban sida nguji nyengulaika pengarap ti bendar enggau pelesu. (Pemansut 32:8; Ulang Adat 12:2-4) Jesus begedika tuai pengarap maya jeman iya ketegal chara sida nyembah Petara. Taja pan sida baka ke tegap ba pengarap, tang kebendar iya sida “pura-pura ngapa” laban sida “enggai ngereja utai ti beguna agi dalam Adat, baka pengelurus, pengasih enggau pengarap.”—Matthew 23:23.

 Kemayaharitu, semina pengarap ke bepelasarka pemendar mai orang semak ngagai Petara. Pemendar tu ulih ditemu dalam Bup Kudus. (John 4:24; 17:17; 2 Timoti 3:16, 17) Ajar pengarap ke enda sejalai enggau Bup Kudus kebendar iya ngenyauhka orang ari Petara. Mayuh orang ngumbai ajar baka—Triniti, semengat ke enda nemu mati, enggau perinsa ti belama iya—datai ari Bup Kudus, tang ajar ti baka nya kebendar iya datai ari orang ke nyembah petara ti pelesu. Pengarap ke ngajar utai ti baka nya semina “ngelebuka diri” aja laban pengarap tu nyilih ajar Petara ngena adat.—Mark 7:7, 8.

 Petara begedika orang ke ngembuan gaya pengidup ke enda sejalai enggau ajar pengarap sida. (Titus 1:16) Pengarap patut bisi empas ti manah ba pengidup sida besehari-sehari lalu ukai semina ngembuan adat tauka ngereja utai ke suah digaga pengarap aja. Enggau nya, pengarap tu ulih nulung orang semak ngagai Petara. Ambika chunto, Bup Kudus madahka: ‘Enti orang ngumbai diri orang ke bepengarap, lalu enda nagang dilah diri, tang nipu diri empu, pengarap sida nya nadai guna. Pengarap ti tuchi, ti bendar di mua Petara ti Apai nya: ngintu orang ke patu balu, ke merinsa, sereta ngintu diri tuchi ari penyai dunya.’ (James 1:26, 27) Bup Kudus Baru ngena rambai jaku “pengarap ti tuchi” kena nunjukka sembah ti bendar.