Anak nuan madahka diri dikachau ba sekula. Nama digaga nuan? Jejampat madahka pengajar ba sekula ngambika orang ke ngachau nya diukum? Ngajar anak nuan chara malas dendam? Sebedau nuan ngaga pemutus, perundingka sekeda utai ba baruh tu. a

•  Nama utai ke patut ditemu aku pasal dikachau?

•  Baka ni chara aku nulung?

 Nama reti dikachau? Dikachau reti iya pengawa ke terus dikereja seseiku orang ngagai orang bukai. Kesuah iya, pengawa sida nya ulih ngemedis orang bukai ba fisikal tauka emosi.

 Ketegal nuan apai indai, nuan patut nemu reti dikachau. Nama kebuah? Laban dikachau nya siti ari pengawa ti ulih ngemediska lalu tu nyengkaum ba pekara ti mit. Tang, enti nuan selalu masuk champur indah ba utai ti mit aja, anak nuan nadai peluang belajar chara nyaga tauka mutarka penanggul diri empu. Nemu nyaga diri amat beguna kena iya ngidupka diri nyentukka jemah ila.

 Lalau ari Bup Kudus: “Anang lengkar.”—Pengajar 7:9.

 Batang ajar: Amat, kekadang nuan patut masuk champur. Tang, bisi maya iya anak nuan mega patut belajar chara mutarka penanggul diri empu maya iya bisi charut enggau orang bukai.—Kolosi 3:13.

 Taja pia, nama patut digaga nuan enti anak nuan terus dikachau?

•   Dinga enggau sabar. Lebuh anak nuan madahka penanggul sida, uji pansik (1) nama utai ke nyadi (2) kebuah iya dikachau. Anang kelalu jampat nyimpulka semua utai sebedau nemu semua fakta. Nuan engka patut berandau enggau pengajar anak nuan tauka apai indai anak mit ke bukai ngambi nuan nemu nama utai ke nyadi.

   Lalau ari Bup Kudus: “Enti nuan enda mending dulu, nuan beli sereta enda nemu bebasaka orang.”—Jaku Dalam 18:13.

•   Enti anak nuan amat dikachau, nuan patut nerangka chara iya mutarka sesiti utai nya ulih ngaduka penanggul nya tauka ulih ngasuh penanggul nya majak nyadi. Chunto, Bup Kudus bisi madahka, “Saut ti nelap ngasuh orang badu agi ringat, tang jaku ti kasar ngasuh orang ringat.” (Jaku Dalam 15:1) Au, malas dendam ngasuh penanggul nya majak nyadi. Tu engka ngasuh anak nuan balat agi dikachau.

   Lalau ari Bup Kudus: “Anang malas penyai ngena penyai, tauka jaku kelese ngena jaku kelese.”—1 Peter 3:9.

•   Terangka ngagai anak nuan. Ukai reti iya, iya lemi enti enda malas dendam. Tang, nya nunjukka iya amat liat ati laban iya enda dilimpangka orang ke ngachau nya ngereja utai ti salah. Iya ke amat, anak nuan udah ngalahka orang ke ngachau nya enggau chara ngalahka diri.

   Nuan mega patut nangkan anak nuan, pasal dikachau nengah online. Enti anak nuan betimbal jaku enggau orang ke ngachau nya, penanggul tu enda ulih diketuka! Pia mega, tu engka ngujungka anak nuan nyau sebaka enggau orang ke ngachau nya. Nya kebuah, chara mutarka iya, enda ibuh nyaut tauka enda bebunyi aja. Tu ulih ngetuka orang ke ngachau nya, laban anak nuan enda ngelaban iya.

   Lalau ari Bup Kudus: “Api padam enti nadai kayu.”—Jaku Dalam 26:20.

•   Siti da agi chara iya nya, anak nuan ulih nyeliahka orang tauka endur ke ngujungka iya dikachau. Chunto, anak nuan nemu dini iya engka ulih dikachau, iya ulih nengah jalai bukai ngambika enda dikachau.

   Lalau ari Bup Kudus: “Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya”—Jaku Dalam 22:3.

 UJI TU: Tulung anak nuan berunding pasal penguntung enggau pengerugi iya enti . . .

•  enda pedulika orang ke ngachau?

•  terus terang ngasuh orang ke ngachau nya ngetu?

•  madah ngagai pengajar pasal orang ke ngachau nya?

•  betundi enggau orang ke ngachau nya?

 Mayuh macham chara anak nuan ulih dikachau. Chara mutarka iya pan enda sama. Nya alai, nuan enggau anak nuan ulih sama bela berundingka chara ti pemadu ngena ba iya ngambika ulih ngalahka orang ke ngachau. Padahka ngagai anak nuan, nuan seruran deka meri tulung ti patut ngagai iya.

 Lalau ari Bup Kudus: “Pangan endang seruran ngayanka pengerindu sida.”—Jaku Dalam 17:17.