Penanggul: Enti nuan orang ke malu, nuan enda ulih ngasaika kaul sereta peneleba ti manah.

 Pemanah: Malu mega bisi pemanah iya. Suah iya, orang ke malu berunding dulu sebedau mansutka jaku. Ketegal tu, nuan nyadi pemerati ti manah sereta ningaka orang bukai enggau manah.

 Berita manah: Asai ati ti malu ulih dilaban. Nuan ulih nentuka ni naka perangai tu nguasa pengidup nuan. Artikel tu ulih nulung nuan.

•  Nemu utai ke ngasuh nuan takut

•  Ngatur pelan

•  Nama ku nembiak serambau nuan

 Ketegal malu, nuan takut bejaku enggau orang bukai ari mua ke mua. Tu ngujungka nuan ngasaika diri enda dikenatika, sempama ditambit ba siti bilik ti petang. Utai ke diasaika nuan tu sigi ngenakutka ati. Tang, enti nuan nemu utai ke ngasuh nuan takut, nuan engka sedar nuan enda ibuh berasai takut. Peratika tiga chunto tu:

•   Kebuah #1: “Enda nemu nama utai ka disebut.”

   Fakta: Kesuah iya, orang ingatka chara nuan begulai enggau sida ari utai ke disebut. Nuan ulih ngelaban asai ati ti takut enggau chara ninga enggau manah. Tu nunjukka nuan ibuhka utai ti disebut orang bukai.

   Uji perunding: Kati nuan rindu agi bekaban enggau orang ke enda ngetu-ngetu bejaku, tauka orang ke ninga enggau manah?

•   Kebuah #2: “Engka orang ngasaika aku tu boring.”

   Fakta: Enda ngira nuan tu orang ke malu tauka enda, tiap iku orang bisi runding sida empu pasal seseiku orang. Nuan ulih nagang asai ati ti takut, enggau chara nulung orang bukai ngembuan runding ti manah agi pasal nuan. Lalu tejuka sida meda sapa nuan ti bendar.

   Uji perunding: Enti nuan suah ngumbai orang bukai ngembuan runding ti enda manah pasal nuan, kati nya nuan empu ke ngakim orang bukai enggau enda lurus, lalu ngumbai orang enda rinduka nuan?

•   Kebuah #3: “Malu amat enti salah sebut.”

   Fakta: Semua orang kala salah sebut. Nuan enda ibuh kelalu irau pasal utai tu. Enti nuan salah sebut, jadika nya peluang kena nunjukka nuan tu orang ke ulih enggau betundi.

   Uji perunding: Enda ke nuan mega rindu begulai enggau orang ke ngaku penyilap diri?

 Nemu nuan? Sekeda orang enda ngasaika diri malu, laban sida nadai penanggul enti bemesej. Tang, kaul ti bendar senang agi rapat enti ulih bejaku enggau betunga mua. Seiku pakar psikologi ke benama Sherry Turkle nulis: “Kitai rapat agi enggau orang ke ulih dipeda mua, lalu ningaka nyawa sida maya bejaku.” a

•   Anang mandingka diri. Anang mejal diri nyadi orang ke pengerah. Tang, juluk ati nuan nya, nguji nagang asai ati ti malu ke bisi dalam nuan. Enggau chara nya, nuan ulih ngasaika kaul sereta peneleba ti manah.

   “Ukai reti iya randau ti panjai nya manah. Pia mega, ukai reti iya nuan patut dipeda tauka ditemu orang. Nuan semina patut madahka sapa diri ngagai orang ke baru dikelala, tauka nanya sekeda tanya ti senang.”—Alicia.

   Prinsip Bup Kudus: “Genap iku kita patut meresa pengawa diri. Nya baru iya tau temegahka diri empu, ukai temegahka orang bukai.”—Galatia 6:4.

•   Nemu berati. Uji peratika chara orang ke pengerah berandau enggau orang. Baka ni chara sida? Nama utai ke ulih ditunda nuan, lalu nama utai ke patut diseliahka nuan?

   “Berati lalu belajar ari orang ke pandai ngiga kaban. Peratika perangai sida, enggau utai ke disebut sida maya keterubah iya bekelala enggau orang.”—Aaron.

   Prinsip Bup Kudus: “Orang belajar ari pangan diri nya baka besi ti ngansah besi.”—Jaku Dalam 27:17.

•   Tanya. Suah iya, orang rindu meri penemu pasal sesiti utai. Enti nuan nanya sida, tu ulih ngepunka randau. Enggau chara nya, ukai semina nuan belama ke patut ditanya, tang nuan pan ulih nanya orang bukai.

   “Enti nuan besedia, nuan kurang agi irau. Uji perundingka beberapa iti topik tauka sekeda tanya, ngambika nuan enda berasai ditekan lebuh betemu enggau orang ke enda teleba ba nuan.”—Alana.

   Prinsip Bup Kudus: “Anang semina berundingka diri empu aja, tang berunding mega ke orang bukai.”—Pilipi 2:4.