Seiku nembiak ke benama Will madah, “Amat boring macha Bup Kudus enti nuan enda nemu chara iya.”

 Kati nuan deka nemu chara iya? Topik tu ulih nulung nuan.

•  Uji ngasai enggau ngambarka ayat Bup Kudus

•  Pansik!

•  Nama ku nembiak serambau nuan

 Kati chara nuan ulih ngasaika ayat Bup Kudus nya amat idup lebuh nuan macha? Uji meh beberapa iti chara ba baruh tu:

1.   Pilih siti cherita dalam Bup Kudus kedeka dibacha nuan. Nuan ulih milih sesiti cherita dalam Bup Kudus. Chunto, cherita pasal pengidup Jesus ba dunya, tauka siti ari video Macha Bup Kudus ke bisi ba jw.org.

2.   Bacha cherita nya. Nuan ulih macha cherita nya kediri empu, tauka begulai enggau bala bakih tauka diri sebilik. Seiku ulih macha begian penyerita, lalu iya ke bukai ulih macha sapa orang ke bejaku dalam cherita nya.

3.   Uji meh beberapa iti chara ba baruh tu:

   •   Lukis gambar pasal cherita nya. Nuan enda ibuh amat pandai ngelukis. Chukup meh nuan ngelukis gambar ti ulih ditemu nuan empu nitihka ripih cherita nya. Tuliska enggau ngelansa pasal utai ke nyadi nitihka gambar nya.

   •   Lukis gambar rajah. Chunto, pengudah nuan macha cherita pasal seiku nembiak Petara, tuliska nama pemanah enggau pengawa iya ti manah. Udah nya, perundingka nama berekat ke diterima iya.

   •   Gaga cherita nya baka riput berita. Nuan ulih ngaga cherita nya enggau mayuh macham penemu, pia mega nuan ulih ngaga diri baka ke benung “interbiu” orang ke dalam Bup Kudus nya.

   •   Enti orang ke dalam Bup Kudus nya udah ngaga pemutus ti salah, uji gambarka nama pemanah iya enti iya ngaga pemutus ti betul? Chunto, gambarka pasal Peter ke benung nyakal Jesus. (Mark 14:66-72) Nama utai ke patut digaga Peter lebuh iya benung napi penguji?

   •   Enti nuan deka kreatif agi, nuan ulih ngaga jalai cherita drama nitihka utai ti dibacha nuan ari Bup Kudus. Nuan ulih nepu pasal utai ke dipelajarka ari cherita nya lalu ngaga nya baka jalai cherita drama.—Rome 15:4.

 Enti nuan mansik Bup Kudus enggau silik agi, nuan deka nemu utai ti amat berega. Kekadang, siti tauka dua iti leka jaku aja udah ulih ngasuh cherita nya amat besai reti.

 Chunto, bandingka Matthew 28:7 enggau Mark 16:7.

•    Nama kebuah Mark nyebut Jesus deka betemu enggau Peter sereta bala murid iya? Nama kebuah nama Peter disebut kediri?

•  Saut: Mark enda meda utai ke nyadi nya, tang iya bulih penerang nya ari Peter.

•  Utai ti berega ke ditemu: Nama kebuah Peter berasai lantang lebuh iya nemu Jesus deka betemu baru enggau iya? (Mark 14:66-72) Baka ni Jesus nunjukka diri ulih nyadi kaban ti rapat ngagai Peter? Baka ni nuan ulih neladan Jesus enggau nyadi kaban ti rapat ke orang bukai?

 Enti nuan belematika ayat Bup Kudus lalu mansik cherita nya enggau silik, nuan tentu rindu agi macha Bup Kudus!