Tara komuano Ombeibela mu i zira omapuriro nga.

Oviungura 24:15 ri tu raera kutja “ovandu avehe ovawa novavi mave penduka movakoke.” Imba ovawa owo mba mba ri nonḓuviro ku Mukuru ngunda ave hi ya ṱa, nu omana wawo ya tjangwa membo romuinyo. (Mal. 3:16) Nu imba ovavi owo mba mba ṱa nu mbe ha munine oruveze okurihonga ohunga na Jehova, ku nao omana wawo ka ye tjangerwe membo romuinyo.

Johanes 5:28, 29 ri hungirira kovimbumba aviyevari tji muna imbi mbya tamunwa mOviungura 24:15. Jesus wa tja: “Imba mba tjita ouwa mave penduka nave kara nomuinyo, nu imba mba tjita ouvi mave penduka nave pangurwa.” Imba ovawa va tjita oviṋa oviwa ngunda ave hi ya ṱa. Owo mave pendurwa nu ave kara nomuinyo mena rokutja omana wawo ngunda ye ri membo romuinyo. Nungwari imba ovavi va tjita oviṋa ovivi ngunda ave hi ya ṱa. Owo mave pendurwa nu ave pangurwa. Omana wawo ngunda kaya tjangwa membo romuinyo, nu owo mave pewa oruveze okupangurwa poo okutarerwa nawa. Moruveze ndwo, mave kara noruveze okurihonga ohunga na Jehova kutja omana wawo ye tjangwe membo romuinyo.

Omavandururiro 20:12, 13 ri kahurura kutja avehe mba pendurwa mave sokukara nonḓuviro koviṋa mbya “tjangwa momambo,” ovyo mbi ri omatwako omape Mukuru ngu me tu pe mouye oupe. Jehova ma kanyona imba mbe hi nonḓuviro ku ye.—Jes. 65:20.

Daniel 12:2 ra hunganeka kutja imba mba ṱa mave pendurwa nu “mave kara nenyando momuinyo waaruhe, nu tjiva mave hihamisiwa mohoṋi nga aruhe.” Ezeva ndi mari hungire ohunga nombanguriro osenina yaimba mbu mave kapendurwa. Tjiva mave kamuna ‘omuinyo waaruhe’ nu varwe “mave hihamisiwa mohoṋi nga aruhe.” Ku nao, komaandero wozombura inḓa 1 000, tjiva mave kamuna omuinyo waaruhe nu varwe mave kanyonwa nga aruhe.—Omavan. 20:15; 21:3, 4.

Tara komasasanekero nga. Ongaro yovimbumba vivari mbya pendurwa, mai yenene okusasanekwa ku na indji yovandu vozonganda mbu mave vanga okutura mehi rarwe. Imba ovawa ve ri tjimuna ovandu vozonganda, mbe pewa ombapira ndji raisa ouyara wokuungura poo wokukara mehi ndo. Nungwari imba ovavi ve ri tjimuna ovandu vozonganda, mbe pewa ombapira youyara okukara mehi ndo oruveze orusupi uriri. Ovandu mba mave hepa okutarerwa nawa ngunda ave hi ya yandjerwa okurira ovature mehi epe ndi. Momuano otjingewo, imba ovavi mba pendurwa, mave hepa okukara nonḓuviro komatwako wa Jehova nokuriraisa oveni kutja va rire ovasemba, kutja ve yenene okukara mOparadisa. Tjiva mape ya ave pewa ousemba wokurira ovature nu varwe ave yarurwa komahi wawo, nandarire kutja va pewa ombapira iṋe yousemba. Ondyero osenina mai zu komuano mbu ve ritjinda nongaro ndji ve raisa mehi epe ndi. Momuano otjingewo, ondyero osenina ku imba avehe mbu mave pendurwa, mai zu kongamburiro yawo nongaro ndji mave raisa mouye oupe.

Jehova ka Mukuru omunarusuvero uriri, nungwari wina oMukuru wousemba. (Deut. 32:4; Eps. 33:5) Eye ma raisa orusuvero rwe mokupendura ovavi novawa. Posi yokutja eye ma undjire ko kutja avehe ve kare nonḓuviro komirari vye vyouwa nouvi. Owo mba uriri mbu mave mu suvere nokukara nonḓuviro komirari vye, ombu mave yandjerwa okuhupa mouye oupe.