1-2. (a) Omomuano uṋe ozohoromende tjiva mu ze pirukira ovakarere va Mukuru, posi ya ovakarere ve ve raisa ongaro iṋe? (b) Ongwaye tji matu yenene okukara nondjoroka nandarire kutja tu ri kehi yondatumisire? (Hungirira kotjiperendero tjokombanda wina.)

 NDINO oviungura vyetu vya tjaerwa momahi wokombanda yo-30 mouye auhe. Momahi tjiva ngo, ouhonapare wa patera ovakambure ovakwetu monḓorongo. Ovikwaye mbi va tjita kutja ve paterwe monḓorongo? Jehova kamunu kutja owo va tjita otjiṋa otjivi. Oviṋa mbi ve tjita, okulesa Ombeibela, okuzuvarisa nokuyenda kozombongarero zombongo. Owo wina kave toorora omunda moviṋa vyopolotika. Nandarire kutja ve muna omapirukiro omanene, owo ve kayenda komurungu okurira ovaṱakame ku Jehova. Owo ve kara nondjoroka yokutjita nao.

² Mape ya ove wa muna oviperendero vyOvahongonone mba raisa ouvanḓe nu oomunu kutja aave meṱameṱa. Owo ve nondjoroka mena rokutja ve tjiwa kutja Jehova u nonyuṋe mu wo, orondu ve raisa ouṱakame ku ye. (1 Ekuruh. 29:17a) Jesus wa tja: “Ovaṋingandu imba mbe tatumisirwa ombango yaNdjambi . . . Nyandeye nu mu yoroke, ondjambi yeṋu tjinga ai ri onene meyuru.”—Mat. 5:10-12.

3. Otja kOviungura 4:19, 20, ovaapostele va Jesus va tjita vi indu tjaave tatumisiwa, nu ongwaye tji va tjita nao?

³ Omauzeu ovakambure ovakwetu ngu ve muna ye ri tjimuna inga ovaapostele va Jesus ngaave munu indu tjaave tatumisiwa mena rokuzuvarisa ohunga na ye. Povikando ovingi, ovapangure  votjombanguriro tjokombanda tjOvajuda ve ve tjaera kutja “ave ha roro rukwao okuhungira mena raJesus.” (Oviung. 4:18; 5:27, 28, 40) Ovaapostele va raisa ongaro iṋe? (Lesa Oviungura 4:19, 20.) Owo aave tjiwa kutja pe nomundu ngu nouvara tjinene kombanda yawo ngwe ve raera kutja ve zuvarise kovandu nokuyandja omahongononeno ohunga na Kristus. (Oviung. 10:42) Ku nao, Petrus na Johanes mbaave ve kuramene po, va hungira nouvanḓe kutja mave kara nonḓuviro ku Mukuru pendje nokukara nonḓuviro kovapangure mbo nokutja kamaave isa okuhungira ohunga na Jesus. Ya ri tjimuna aave pura ovapangure mbo kutja, ‘Mamu munu kutja ovandu mave sokukara nonḓuviro ku eṋe komeho yokukara nonḓuviro ku Ndjambi?’

4. Otja kOviungura 5:27-29, ovikwaye ovaapostele mbi va tjita, nu omomuano uṋe mu matu yenene okuhorera ku wo?

⁴ Ovaapostele va raisa otjihorera otjiwa kOvakriste avehe vatjiri, tji ve kongorera ngamba. Owo ve rimanena okukara “nonḓuviro ku Ndjambi komeho yokukara nonḓuviro kovandu.” (Lesa Oviungura 5:27-29.) Tji va za nokutonwa mena rouṱakame wawo, ovaapostele va pita motjombanguriro tjokombanda tjOvajuda amave “nyanda, orondu Ndjambi tjinga e ve vara kutja owo va pwa pokutatumisirwa mena raJesus,” nu va kayenda komurungu okuzuvarisa.—Oviung. 5:40-42.

5. Omapuriro yeṋe ngu matu hepa okuzira?

⁵ Otjihorera tjovaapostele tji tjita kutja tu kare nomapuriro. Otjotjihorera, omomuano uṋe ovaapostele maave yenene okukara nonḓuviro ku Mukuru komeho yokukara nonḓuviro kovandu ‘nokuriwisa kehi youhonapare’ wawo? (Rom. 13:1) Omomuano uṋe eṱe ndino mu matu yenene ‘okuriwisa kehi youhonapare novanauvara,’ nokurira ovaṱakame ku Mukuru ngu ri Omuhonapare wetu wokombandambanda, otja omuapostele Paulus pa hungira?—Tit. 3:1.

6. (a) ‘Ouhonapare’ mbwa tamunwa mOvaroma 13:1 u hungira ohunga na uṋe, nu eṱe tu sokuraisa ongaro iṋe ku wo? (b) Ovikeṋa mbi twe rihongo ohunga nouvara wovanane avehe wovandu?

⁶ Lesa Ovaroma 13:1. Mezeva ndi embo ndi ‘ouhonapare’ ri heya omasa ovanane wovandu  ngu ve na wo kombanda yovandu. Ovakriste ve sokuriwisa kehi yozohoromende zovandu. Ovanane mba ve tjita kutja pe kare ohange nokutjita kutja ovandu ve kare nonḓuviro kozoveta. Nu nandarire povikando tjiva ve tjevera ovakarere va Jehova. (Omavan. 12:16) Eṱe twa pewa erakiza rokutja tu sokuyandja otjitjamurongo tjohoromende, ondengero nondjozikiro ndji ve vanga. (Rom. 13:7) Posi yokutja, ozohoromende nḓo ze nouvara mena rokutja Jehova ongu ze yandjera kutja ze kare nouvara mbwo. Jesus wa kahurura epu ndi nawa indi tja pangurwa i yOmuhongore omunene wa Roma wena Pontius Pilatus. Indu Pilatus tja tja eye u nouvara wokuyama Jesus poo wokumuzepa, Jesus we mu raera kutja, “Ove kotjo kara nouvara kombanda yandje andakuzu ove ko u perwe i Ndjambi.” (Joh. 19:11) Ouvara wovanane wovandu avehe na imba mbe kongorera opolotika ndino, u na poṋa pu u yandera tjimuna ouvara Pilatus mbwa ri na wo.

7. Oruṋe tji tu ha sere okukara nonḓuviro kovanane wovandu, nu owo mave sokuzemburuka tjike?

⁷ Ovakriste ve sokuriwisa kehi youhonapare wovandu indu ozoveta zawo tji ze hi nokupirukira ozoveta za Mukuru. Posi yokutja, eṱe katu sokukara nonḓuviro kovandu indu tji mave vanga kutja tu tjite oviṋa Mukuru mbye ha yandjere poo indu tji mave tu tjaere okutjita oviṋa Mukuru mbye undjira ko ku eṱe okutjita. Otjotjihorera, owo mape ya ave undjire ko kutja ovarumendu omitanda ve karwe ovita. * Poo owo mape ya ave tu tjaere kutja atu ha ungurisa Ombeibela yetu nomambo wetu nga zikamena kOmbeibela, nu ave tu tjaere okuzuvarisa nokuyenda kozombongarero zombongo. Indu ovahonapare tji mave ungurisa ouvara wawo momuano omuvi tjimuna okutatumisa ovahongewa va Kristus, owo mave kara nomerizirira komurungu wa Mukuru. Orondu Jehova u muna oviṋa avihe.—Omuzuv. 5:8.

8. Pe nombangu yaye pokati kouvara wa Jehova nouvara wozohoromende, nu ongwaye tji matu hepa okutjiwa?

⁸ Ozohoromende ze nouvara wokombanda, posi ya kaze nouvara wokombandambanda. Jehova erike ongu nouvara wokombandambanda. Nu mOmbeibela eye u isanewa povikando pekepeke otja Ndjambi “wokOmbandambanda.”—Dan. 7:18, 22, 25, 27.

9. Ovikwaye omuprofete Daniel mbya muna movirimunikise?

⁹ Omuprofete Daniel wa muna ovirimunikise mbya vi raisa oukahu kutja Jehova u nouvara ouingi kombanda yozohoromende zovandu. Daniel rutenga wa muna ovipuka ovinene vine mbi mavi kuramene po omauhonapare omanamasa worukapitaveze tjimuna Babylon, Medo-Persia, Greece na Rome, nouhonapare ounamasa mouye ndino Britain na America. (Dan. 7:1-3, 17) Okuzambo Daniel wa muna Jehova Mukuru a haama kotjihavero tjombanguriro meyuru. (Dan. 7:9, 10) Nu imbi omuprofete omuṱakame ngo mbya muna okuzambo, erakiza kozohoromende zandino.

10. Otja ku Daniel 7:13, 14, 27, Jehova ma yandja ku uṋe ouvara wokuhonaparera po ehi, nu imbi mavi raisa tjike ohunga na ye?

¹⁰ Lesa Daniel 7:13, 14, 27. Mukuru ma yeka ozohoromende azehe zovandu ouvara na yandja ku varwe mba pwa okuhonapara nu mbe nouvara pu wo. Nu hapo ouvara mbwi mau yandjewa ku uṋe? Mau yandjewa ‘kotjiṋa tjiyatji munika tjimuna omundu,’ ngu ri Jesus Kristus na ‘kotjiwaṋa tjaNdjambi wokOmbandambanda,’ tji tji ri ovandu mba 144 000 mbu mave kahonapara “aruhe nga aruhe.” (Dan. 7:18) Oukahu kutja Jehova ongu ri ‘Ndjambi wOkombandambanda,’ mena rokutja eye ongu nouvara wokutjita avihe mbyo.

11. Otjikeṋa tjarwe Daniel tja tjanga tji matji raisa kutja Jehova u nouvara kombanda yoviwaṋa?

 ¹¹ Oviṋa Daniel mbya muna movirimunikise vi hitasana noviṋa mbya hungira. Daniel wa tja: “Ndjambi weyuru . . .  u zika ozombara nokuzeisa po.” Eye wina wa tjanga kutja “Ndjambi wokOmbandambanda u nouvara kombanda yomauhona wovandu, nokutja Eye u ye yandja ku auhe Eye ngu ma toorora.” (Dan. 2:19-21; 4:17) Hapo pe noruveze Jehova tja isa po, poo tja zika ovanane? Otjingaperi.

12. Yandja otjihorera ohunga nomuano Jehova ma isa po ozombara kovihavero vyazo morukapitaveze. (Tara kotjiperendero.)

¹² Jehova wa raisa oukahu kutja eye u nouvara kombanda “youhonapare” wovandu. Tara kovihorera vitatu. Ovaisrael va ri ovakarere va Farao moEngipte nu eye aa panḓa okuvekutura. Posi yokutja Mukuru we ve kutura na ṱomwinisa Farao mOmurongawotuu. (Eks. 14:26-28; Eps. 136:15) Ombara Belsasar wa Babilon wa tjita omukandi nu wa “sekamena Muhona weyuru” na “tanga oomukuru, mba ungurwa pongoldo nosilveri” moruveze rwokutanga Jehova. (Dan. 5:22, 23) Nungwari Mukuru wa ṱisa omurumendu omuritongamise ngo ohoṋi. “Mouṱuku tjingewo mbwo” Belsasar wa zepewa nu ouhona we wa yandjewa kOvamedi nOvapersi. (Dan. 5:28, 30, 31) Ombara Herodes Agripa I wa Palestine ongwa tjita kutja omuapostele Jakobus ma zepewe, tjazumba a patere omuapostele Petrus monḓorongo nondando yokumuzepa wina. Posi yokutja, Jehova ka yandjere Herodes okuyenenisa ondando ye. “Tjimanga omuengeli waMuhona wa tona Herodes” neye wa ṱa.—Oviung. 12:1-5, 21-23.

13. Yandja otjihorera ohunga nomuano Jehova ma taara ovanane avehe mbe rikutire kumwe.

¹³ Jehova wina wa raisa omasa we kombanda yovanane avehe mbe rikutire kumwe. Eye wa rwira Ovaisrael neve vatere kutja ve nyone ozombara zOvakanaan 31 nḓe rikuta kumwe, nu ve kambure otukondwa otunene twehi nda kwizikwa. (Jos. 11:4-6, 20; 12:1, 7, 24) Jehova wina wa vatera Ovaisrael okutaara Ombara Benhadad novanane vOvasirie 32 mba rwa ku na wo.—1 Ozomb. 20:1, 26-29.

14-15. (a) Ombara Nebukadnesar nOmbara Darius va tja vi ohunga nousemba wa Jehova wokuhonapara? (b) Omutjange wEpsalme wa tja vi ohunga na Jehova notjiwaṋa tje?

¹⁴ Povikando pekepeke Jehova wa raisa kutja ongu nouvara wOkombandambanda. Indu  Ombara Nebukadnesar wa Babilon tjee rihivi ohunga ‘nouvara, nomasa we, nongeṋangeṋeno youhona we’ moruveze rwokurisusuparisa nokuyakura kutja Jehova ongwa pwa ondangero, Mukuru wa tjita kutja ma pandjare ozondunge. Indu tja kotora ozondunge, Nebukadnesar wa “tanga Ndjambi wokOmbandambanda” na yakura kutja Jehova “ma honapara nga aruhe.” Eye wina wa tja: “Kape na ngu ma pirukire ombango ye.” (Dan. 4:30, 33-35) Ouṱakame wa Daniel ku Mukuru tji wa za nokurorwa, na indu Jehova tje mu yama motjitoto tjozongeyama, Ombara Darius wa tja: “Omundu auhe ngu ri mouhona wandje u sokutira nokuyozika Ndjambi waDaniel. Eye ongu ri Ndjambi Omunamuinyo nongu honapara nga aruhe. Ouhona we kamaau nyonwa ko, nouvara we kamaau yanda ko.”—Dan. 6:7-10, 19-22, 26, 27.

¹⁵ Omutjange wEpsalme wa tja: “Muhona u zunḓa ombango yoviwaṋa ovinavisenginina, nomeripuriro wavyo u ye ririsa oviṋa uriri.” Eye wina wa tja: “Otjiṋingandu otjiwaṋa tji tji na Muhona e ri Ndjambi watjo; omuṋingandu omuhoko mbwa toororwa u rire ouini we omuini.” (Eps. 33:10, 12) Inga omapu omawa ngu maye tu vatere okurira ovaṱakame ku Jehova.

16. Eṱe matu yenene okukara nongamburiro yaye ohunga ‘nozombamisiro ozonene tjinene,’ nu omena raye? (Tara kotjiperendero.)

¹⁶ Eṱe twa lesa ohunga na imbi Jehova mbya tjita morukapitaveze. Ovikwaye mbi matu undjire ko mbi mavi katjitwa moruyaveze rwopopezu? Eṱe matu yenene okukara nongamburiro kutja Jehova ma yama ovakarere ve ovaṱakame ‘mozombamisiro ozonene tjinene’ nḓu maze ya. (Mat. 24:21; Dan. 12:1) Eye ma katjita nao indu oviwaṋa mbi vye rikuta kumwe mbi tjiukwa otja Gog na Magog, tji vya wire imba mbe ri ovaṱakame ku Jehova mouye auhe. Nandarire kutja omerikutiro pamwe ngo maye kamburire mo ouṋepo auhe 193 wOmihoko Omikutasane, owo kamaau yenene okurwisa ingwi wOkombandambanda notjimbumba tje tjovita tjomeyuru. Jehova wa tja: “Komuhingo mbwi  Ami otji me raisire oviwaṋa avihe kutja owAmi omunene, nokutja owAmi omuyapuke. Otji mavi tjiwa kutja owAmi ngu mbi ri Muhona.”—Esek. 38:14-16, 23; Eps. 46:10.

17. Ombeibela ya hunganeka oruyaveze ndwa sana pi kozombara zouye na ku imba mbe raisa ouṱakame ku Jehova?

¹⁷ Indu Gog tja wire ovakarere va Mukuru, maku tjiti kutja Jehova ma ete ovita ovisenina vya Armagedon indu tji ma kayandeka ‘ozombara azehe zouye.’ (Omavan. 16:14, 16; 19:19-21) Nungwari “ovandu ovasemba, ovandu ovehinandjo ombu mave tura mehi retu ndi.”—Omiano 2:21.

18. Ovakriste vatjiri ovengi ve riyandjera okutjita ye, nu omena raye? (Daniel 3:28)

¹⁸ Oure wozombura ozengi, Ovakriste ovengi va twa ouyara nomiinyo vyawo moumba mena rorusuvero rwawo ku Jehova otjOmunane wawo erike. Ovakriste vatjiri mbo ve rimanena okurira ovaṱakame ku Jehova. Owo ve ri tjimuna Ovaheberi vetatu mba kayenda komurungu okuraisa ouṱakame ku ingwi wOkombandambanda, ngwe ve yama mezuko romuriro.—Lesa Daniel 3:28.

19. Jehova u pangurira ovakarere ve ku ye, neṱe twa sokutjita vi nai?

¹⁹ Omutjange wEpsalme David wa tjanga ohunga nounanḓengu wokurira omuṱakame ku Mukuru. Eye wa tja: “OOve omupangure woviwaṋa avihe. Ndji pangura, Muhona, otja kousemba wandje; Ove mo tjiwa kutja owami omuhinandjo.” (Eps. 7:8) Nu wina David wa tja: “Ousemba noupore ngau ndji yame.” (Eps. 25:21) Omuano omusemba wokuhupa, okukayenda komurungu okuraisa ouṱakame ku Jehova kainatja kutja pa tjitwa tjike. Neṱe otji matu kara noumune tjimuna womutjange wEpsalme ngwa tja: “Ovaṋingandu imba mbe ritjinda mongarero ongohoke, nu mbe panḓera pomatwako waMuhona.”—Eps. 119:1.