1. Ongwaye tji twa sokurikotamena ku Jehova erike?

EṰE matu sokurikotamena ku Jehova erike mena rokutja eye ongwe tu uta nu wetu pa omuinyo. (Omavan. 4:11) Posi yokutja, eṱe tu muna omatokero. Nandarire kutja twa suvera Jehova nokumutenga, mape ya oviṋa vyarwe mehupo retu avi rire ovinahepero tjinene nga tji mavi tu tjaere okurikotamenena ku Jehova momuano mbwe vanga. Matu hepa okuzuva nawa kutja iho mape ya atji tjitwa vi. Nungwari rutenga, ngatu tare kutja ku heya tjike okurikotamena ku Jehova erike.

2. Otja ku Eksodus 34:14, ovikwaye mbi matu tjiti indu tji twe riyandja ku Jehova nomutima auhe?

² MOmbeibela, okuriyandja ku Mukuru ku heya kutja matu sokumusuvera okuza komutima tjiri. Indu tji twa suvera Jehova nomutima auhe, eṱe matu rikotamene ku ye erike. Eṱe kamaatu yandjere omundu poo otjiṋa okurira otjinanḓengu pu Jehova.​—Lesa Eksodus 34:14.

3. Ongwaye tji tu nomapu omawa wokusuvera Jehova?

³ Tu nomapu omawa wokusuvera Jehova. Omena ra ye? Mena rokutja omapu ngo ya zikamena kouatjiri mbu twe rihonga ohunga na ye. Eṱe twe rihonga okusuvera ovikaṋena vye oviwa. Nu tu tjiwa nokuyakura oviṋa Jehova mbya suvera na mbya tonda. Eṱe tu tjiwa ondando ye kovandu nu tuipa oruvara. Tu nondangi kutja Eye we tu yandjera okurira omapanga we. (Eps. 25:14) Oviṋa avihe mbi tu rihonga ohunga nOmuute wetu vi tu yeta popezu na ye.​—Jak. 4:8.

4. (a) Omudiaboli u ungurisa tjike okutjita kutja atu ha suvere Jehova erike? (b) Morupa ndwi matu katara ku tjike?

 ⁴ Omudiaboli u honaparera po ouye mbwi, nu u ungurisa oviṋa mouye okutjita kutja vi rire ovinanḓengu tjinene mehupo rovandu nokutjita kutja i rire ouzeu okupirukira ozonḓero ozombi. (Ef. 2:1-3; 1 Joh. 5:19) Eye u vanga kutja tu suvere oviṋa vyarwe, kutja atu ha suvere Jehova erike. Ngatu tare komiano vivari Omudiaboli mu ma yenene okutjita nao. Otjitenga, eye u kondja okutjita kutja tu suvere ovimariva, nu otjitjavari, u kondja okutjita kutja tu toorore omanyando omavi.

5. Ongwaye tji twa sokutjevera kutja atu ha suvere ovimariva?

⁵ Atuhe tu vanga okukara novikurya, ozombanda ozombwa, noruveze oruwa pu matu kara. Posi yokutja, matu sokutjevera kutja atu ha suvere ovimariva. Ovandu ovengi ndino “omakorokope” nu va suvera oviṋa. (2 Tim. 3:2) Jesus aa tjiwa kutja ovemukongorere mape ya ave suvere oviṋa mbi. Jesus wa tja: “Kape nomukarere ngu ma sora okuungurira ovahona vevari tjimwe; eye ma tondo umwe na suvere ingwi omukwao; nu me riyameke ku umwe na tengurura omukwao. Eṋe kamu nokusora okukarera Ndjambi novimariva tjimwe.” (Mat. 6:24) Omundu ngu rikotamena ku Jehova ngunda ama ungurisa oruveze nomasa we omengi okuripahera outumbe, eye tjiri ma ungurire ovahona vevari. Eye ke nokurikotamena ku Jehova erike.

6. Matu rihongo tjike komambo wa Jesus nga hungira kombongo moLaodisea?

⁶ Kuṱa komaandero weserewondo etenga O.Z., ouṋepo wombongo  moLaodisea aau rihivi nomambo nga: “Eṱe twa tumba, nu twa tumba tjinene; katu notjiṋa tji twa hepa.” Posi yokutja komurungu wa Jehova na Jesus, owo va ‘ningisire ondjenda, nu aave sokuṱirwa ondjenda! Owo va ri ovasyona novapoṱu, nu va ri mutundu.’ Jesus ke ve rongere mena routumbe wawo nungwari yari mena rokutja orusuvero ndu va ri naro kovimariva aaru zunḓa oupanga wawo kuna Jehova. (Omavan. 3:14-17) Eṱe tji twa munu kutja twa utu okuripurira kovimariva tjinene, matu sokuṱuna omeripura wetu tjimanga. (1 Tim. 6:7, 8) Tji tu ha tjitire nao, eṱe matu utu okusuvera oviṋa vyarwe nu Jehova kamaa yakura omerikotameneno wetu. Eye ke ri “yandjere otjirarakaneno kuna kaaṋi.” (Deut. 4:24) Hapo ovimariva mavi yenene vi okurira ovinanḓengu tjinene mehupo retu?

7-9. Mo rihongere tjike kotjihorera tjomunene wombongo wena David?

⁷ Tara kotjihorera tjomunene wombongo ngu ungura oukukutu wena David, ngu kara moUnited States. Eye wa tja, wari omuungure ngwa ungura oukukutu. Eye wa yerwa motjihako moviungura mbyaa ungura nu aa sokusutwa ovimariva ovingi, nu nandarire aa varwa otja umwe wovandu mbaave tjiwa okuungura otjiungura ho nawa mehi ndo. David wa tja: “Moruveze ndo, ami ee munu kutja oviṋa avihe mbya vi tjitwa kwami, vyari ozondaya okuza ku Jehova.” Hapo tjiri zari ozondaya okuza Jehova?

⁸ David kouṱiṱiṱiṱi wa uta okumuna kutja oviungura vye mbi aavi zunḓa oupanga we kuna Jehova. Eye wa tja: “Ee rimunu ame ripura ohunga nomauzeu woviungura ngunda ambi ri pozombongarero zombongo nu nandarire motjiungura tjokuzuvarisa. Ami ee ungurire ovimariva ovingi posi yokutja mba ri nozongendo ozengi nu ee munu ouzeu morukupo rwandje.”

⁹ David wa muna kutja ma hepa okutoorora kutja ovikwaye mbi ri ovinahepero tjinene ku ye. Eye wa tja: “Ami mba tya kutja me  rundurura ongaro mu mbi ri.” David aa vanga okurundurura omayuva we woviungura nu wa raera omuhona we ohunga nondando ye ndjo. Kwa kongorera ye? David wa rambwa moviungura! Hapo eye wa tjita vi? Eye wa tja: “Eyuva ependukirwa ami mba tjita omaningiriro wokurira omukandjira omuvatere woruveze aruhe.” Kutja David nomukazendu we ve rihupise oveni owo va uta otjiungura tjomakohororero mozonganda ozonene. Kombunda, eye wa uta okukarera otjomukandjira omukarerere nu omukazendu we wina wa tjita nao. Ovakupasane mba va toorora okuungura otjiungura ovandu ovengi tji ve ha vanga, posi yokutja otjiungura tji ve ungura katjiṋa otjinahepero kuwo. Nandarire kutja ovimariva mbyaa ve munu vya yarukire kehi tjinene, owo omueze auhe aave munu ovimariva mbya yenene koviṋa mbi mave hepa. Owo ve vanga okutwapo Jehova poruveze orutenga mehupo rawo, nu ve rihonga kutja Jehova u tjevera ovandu mbe tjita nao.​—Mat. 6:31-33.

10. Matu yenene vi okutjevera omutima wetu?

¹⁰ Nandarire kutja tu noviṋa ovingi poo oviṱiṱi eṱe matu sokutjevera omitima vyetu. Omomuano uṋe? O utu okusuvera omauini. Nu o yandjere kutja oviungura vyoye vi rire ovinanḓengu pomerikotameneno woye ku Jehova. Hapo mo yenene vi okutjiwa kutja u ri mongaro otja indjo? Ove mo yenene okuripura omapuriro tjiva nga: ‘Hapo mbi ripura tjinene ohunga noviungura vyandje indu tji mbi ri pozombongarero zombongo poo motjiungura tjokuzuvarisa? Hapo aruhe mbi rikenda kutja mape ya e kara novimariva mbya yenene moruyaveze? Ovimariva nomauini vi ndji etera ouzeu morukupo? Hapo mape ya e ungura oviungura mbi varwa nonḓengu yokehi indu tji mavi ndji yandjere okukarera Jehova oruveze oruingi?’ (1 Tim. 6:9-12) Otja tji matu ripurire komapuriro ngo, matu sokuzemburuka kutja Jehova we tu suvera. Nu wa kwizika ku imba mbe riyandja kuye omambo nga: “Ami himee ku esa ko; nu himee ku imbirahi ko!” Nu mena ranao omuapostele Paulus wa tjanga omambo nga: “Ongarero yeṋu ngai kare nokuhinoukorokope.”​—Hebr. 13:5, 6.

11. Omanyando maye yenene okutjita vi komundu?

¹¹ Jehova u vanga kutja tu yorokere ehupo, nu omanyando maye yenene okutuvatera okutjita nao. Kunao Embo ra Mukuru ri tja: “Kape notjiṋa tjarwe otjiwa komundu posi yokurya nokunwa nokukara nohange  moviungura vye.” (Omuzuv. 2:24) Posi yokutja, omanyando omengi mouye maye yenene okutuṱuna momuano omuvi. Oyo ye yenena okutjita kutja ovandu ovengi ve ute okuyakura poo okusuvera oviṋa Jehova mbya tonda.

12. Otja 1 Ovakorinte 10:21, 22, ongwaye tji twa sokutoorora omanyando wetu nongengezero?

¹² Tji matu vanga okurikotamena ku Jehova erike, katu sokurya “potjiriro tja Muhona pamwe nokurira potjiriro tjozombepo ozombi.” (Lesa 1 Ovakorinte 10:21, 22.) Okurya eriro pu nomundu ku raisa kutja mu noupanga ouwa. Tji twa toorora omanyando nge tunduuza outwe, oundjai, oruvakiro poo ozonḓuma zonyama nozongaro zarwe ozombi, iri tjimuna matu ri eriro pu novanavita va Mukuru. Kunao, katu rihihamisa oveni uriri nungwari wina tu teya oupanga wetu kuna Jehova.

13-14. Otja ku Jakobus 1:14, 15, ongwaye tji twa sokukengeza tji matu toorora omanyando? Kahurura.

¹³ Omomuano uṋe mu matu sasaneke omanyando ku novikurya? Indu tji matu ri, tu yenena okutoorora kutja ovikwaye mbi matu vanga okurya. Posi yokutja tji twazu nokurya, eṱe kamaatu toorora kutja ovikurya mbyo mavi ṱunu orutu rwetu momuano uṋe. Ovikurya oviveruke vi yenena okuṱuna kouveruke wetu momuano omuwa, nungwari ovikurya mbi he ri oviveruke vi ṱuna kouveruke wetu momuano omuvi. Eṱe kamaatu hakahanene po okumuna omuano ovikurya mu mavi tu ṱunu, posi yokutja mavi utu okumunika kombunda yoruveze.

¹⁴ Momuano otjingewo, indu tji matu toorora omanyando wetu, eṱe tu yenena okutoorora kutja ovikwaye mbi matu twa mouripura wetu. Nu okuzambo omanyando ngu twa toorora maye yenene okuṱuna kouripura nomutima wetu. Omanyando omawa yetu etera ouwa, nungwari inga omavi yetu etara omihihamo. (Lesa Jakobus 1:14, 15.) Eṱe kamaatu hakahanene po okumuna omuano omanyando mu ma ye tu ṱunu, posi yokutja kombunda youruveze kaaṋi matu munu. Ombeibela i turakiza kutja: “Amu riwovisa oveni: Ndjambi ka nyekererwa. Ihi omundu tji ma kunu, wina otji ma kondo. Ngu ma kunu mehi rongaro ye youndu mu ro ma kondo mo omakondero wonḓiro.” (Gal. 6:7, 8) Tjiri ounahapero kweṱe okunakaura omanyando ayehe nge tunduuza oviṋa Jehova mbyaa tonda!​—Eps. 97:10.

15. Otjiyandjewa tjiṋe Jehova tje tupa okuyorokera?

¹⁵ Ovakarere va Jehova ovengi ve tarera oprograma ndji JW Broadcasting^®, ndji ri otivii yetu yomorungovi. Omukazendu omukambure wena Marilyn wa tja: “O-JW Broadcasting ye ndji vatera kutja mbi rire omundu wondjoroka, nu mbi yenena okutarera oviṋa avihe mena rokutja oyo i raisa oviṋa oviwa. Indu tji me rimunu ourike poo okuwa momuinyo, mbi paha ehungi eyanḓiparise poo etarere oprograma yomuhukomunene. Otjiṋa ho tji tjita kutja mbi kare popezu na Jehova notjira tje. O-JW Broadcasting tjiri ya rundurura ehupo randje.” Hapo ove u muna ouwa motjiyandjewa tja Jehova? O-JW Broadcasting i pitisa ovipuratenwa ovingi nozoprograma zouvidio na wina omaimburiro omayanḓiparise ngu mo yenene okutarera nokupuratena oiri ngamwa aihe.

16-17. Ongwaye tji matu sokuungurisa oruveze rwetu komanyando nongengezero, nu matu yenene vi okutjita nao?

¹⁶ Eṱe matu sokukengeza ohunga nomanyando ngu matu vanga okuyorokera na wina oruveze ndu matu ungurisa komanyando. Tji tu ha tjitire nao, eṱe mape ya atu ungurisa oruveze oruingi komanyando pendje nokuungurisa oruveze ndo okukarera Jehova. Irira ouzeu kovandu ovengi okuungurisa  oruveze rwawo nawa tji pe ya komanyando. Omukambure omutanda wena Abigail wozombura 18 wa tja: “Okutarera otivii ku ndji vatera kutja ehe ripurire koviṋa vyarwe kombunda yeyuva ezeu. Posi yokutja tji mbi hi nokukengeza, mbi ke rimuna ame tarere otivii oure wozoiri ozengi.” Omukambure wena Samuel wa tja: “Povikando tjiva mbi tarera ouvidio ouingi ousupi korungovi. Ami mbi uta nokavidio kemwe uriri, nu okuzambo mbi kamuna oiri ya i.”

¹⁷ Hapo ove mo yenene vi okuungurisa oruveze rwoye nawa komanyando? Otjiṋa otjitenga okuripura kutja u ungurisa oruveze ndu ṱa pi komanyando. Ove mape ya otjanga ozoiri nḓu moungurisa motjivike. Tjanga ozoiri nḓu wa ungurisa mokutarera otivii, okutarera oviṋa morungovi, nokunyanda omanyando nge ri mongoze yoye. Indu tji wa munu kutja u ungurisa ouruveze oruingi momanyando, kondja okurundurura oprograma yoye. Rutenga twapo oruveze koviṋa ovinanḓengu tjinene, nu okuzambo u twapo oruveze komanyando. Nu ningira Jehova okukuvatera kutja u yenenise ondando yoye. Tji wa tjiti nao mo kara noruveze nomasa okutjita omakonḓononeno woye omuini wOmbeibela, omerikotameneno weṱunḓu, okuyenda kozombongarero zombongo, nokupita motjiungura tjokuzuvarisa. Nu wina moyorokere oruveze ndu moungurisa momanyando mena rokutja wa twapo Jehova poruveze orutenga.

18-19. Eṱe matu raisa vi kutja tu rikotamena ku Jehova erike?

¹⁸ Kombunda yokutjanga ohunga nomaandero wouye wa Satan nouye oupe, omuapostele Petrus wa tja: “Vakwetu ovasuverwa, ngunda amamu undju oviṋa mbi opu mwa sokupanḓera pokurira ovakohoke novehinavipo komurungu wa Ndjambi nokukara nohange na Ye.” (2 Petr. 3:14) Indu tji twa kara nonḓuviro kerakiza ndo nokuungura oukukutu okuhupa momuano omukohoke nokurikotamena ku Jehova momuano mbwe vanga, matu raisa kutja tu rikotamena ku ye erike.

¹⁹ Satan nouye we mau kayenda komurungu okukondja kutja tu twapo oviṋa vyarwe poruveze orutenga mehupo retu pendje na Jehova. (Luk. 4:13) Nandarire kutja tu muna omauzeu, eṱe katu nokuyandjera omundu poo otjiṋa okurira otjinanḓengu pu Jehova. Eṱe twe rimanena ​—okurikotamena ku Jehova erike!