1-2. (a) Omena raye Omuapostele Paulus tja tja orusuvero otjikaṋena “tji tja kapita avihe”? (b) Matu katara komapuriro yeṋe morupa ndwi?

 INDU omuapostele Paulus tja hungirire kongamburiro, omaundjiro norusuvero, eye kamaandero wa tja: “Ihi tji tja kapita [ovikaṋena] avihe mbi orwo ndwi orusuvero.” (1 Kor. 13:13) Omena raye Paulus tja tja nao? Moruyaveze, katu nokuhepa okukara nongamburiro momakwizikiro wa Mukuru ohunga nouye oupe poo omaundjiro wokutja omakwizikiro ngo maye yenenisiwa mena rokutja tjandje ya yenenisiwa. Posi yokutja, matu kahepa okuraisa orusuvero ku Jehova na kovandu aruhe. Ku nao, orusuvero rwetu ku wo maru kurire ko nga aruhe.

² Matu katara komapuriro yetatu mena rokutja matu kahepa okuraisa orusuvero aruhe. Etenga, omena raye tji matu sokusuverasana? Oritjavari, omomuano uṋe mu tu raisasana orusuvero? Oritjatatu, omomuano uṋe mu matu tjiti kutja orusuvero rwetu ku varwe ru kurire ko?

3. Omena raye tji matu sokusuverasana?

³ Omena raye okusuverasana tje ri otjiṋa otjinanḓengu kweṱe? Orusuvero orunanḓengu okukapita omapu aihe, mena rokutja ru tjiukisa Ovakriste vatjiri. Jesus wa tja nai kovaapostele ve: “Tji mwa suverasana, indino avehe otji mave tjiwa kutja oweṋe ovahongewa vandje.” (Joh. 13:35) Wina, orusuvero  ru tjita kutja tu kare nombwaneno. Paulus wa tja: “Orusuvero ondu ri otjiwaneke tji tji mu kuta kumwe okuura.” (Kol. 3:14) Posi ya, pe nepu rwarwe enanḓengu ndi matu sokuraisasanena orusuvero. Omuapostele Johanes wa raera ovakambure ovakwao kutja: “Ingwi ngwa suvera Ndjambi nga suvere omukwao wina.” (1 Joh. 4:21) Indu tji matu raisirasana orusuvero, tu raisa kutja twa suvera Mukuru.

4-5. Sasaneka omuano orusuvero rwetu ku Mukuru mu ru hitasana norusuvero ndu tu raisa kovakambure ovakwetu?

⁴ Omomuano uṋe orusuvero rwetu ku Mukuru mu ru hitasana ku norusuvero ndu tu raisa kovakambure ovakwetu? Okusasaneka, tara komuano omutima mu u ungura kumwe ku nouṋepo warwe worutu. Indu onganga tji ya twa po omunwe pomusepa mbu ri pokuwoko kwetu okutara kutja omutima mau tono vi, i yenena okutjiwa ongaro yomutima wetu. Matu yenene okurihongera ko ye komasasanekero nga?

⁵ Indu onganga tji mai tara kutja omutima wetu mau tono vi i yenene okutjiwa kutja owo u nomasa nge ṱa pi, momuano tjingewo matu yenene okutjiwa kutja orusuvero ndu tu na ro ku Mukuru ru ṱa pi mokukonḓonona orusuvero ndu tu na ro ku varwe. Indu tji twa munu kutja katu raisa orusuvero kovakambure ovakwetu otja tjaa tu raisa rukuru, iho matji raisa kutja orusuvero rwetu ku Mukuru maru yende amaru poro. Posi ya indu tji matu raisa orusuvero kovakambure ovakwetu aruhe, iho tji raisa kutja orusuvero rwetu ku Mukuru ru nomasa.

6. Omena raye tji matu sokurikenda indu orusuvero rwetu kovakambure ovakwetu tji maru ngundipara? (11 Johanes 4:​7-9, 11)

⁶ Eṱe tu sokurikenda indu orusuvero rwetu kavakambure ovakwetu tji maru yende amaru poro. Omena raye? Mena rokutja matji raisa kutja oupanga wetu ku na Jehova wa ngundipara. Omuapostele Johanes wa kahurura otjiṋa hi indu tje tu zemburukisa kutja omundu “tje hi nokusuvera omukwao ngwe mu muna, ma sora vi okusuvera Ndjambi ngwe ha munu.” (1 Joh. 4:20) Matu rihongere ko tjike? Jehova u kara nonyuṋe mweṱe indu tji matu ‘suverasana.’—Lesa 1 Johanes 4:​7-9, 11.

7-8. Omomiano viṋe tjiva mu matu yenene okuraisasana orusuvero?

⁷ Tu muna etwako ndi “suverasaneye” mEmbo ra Mukuru povikando ovingi. (Joh. 15:​12, 17; Rom. 13:8; 1 Tes. 4:9; 1 Petr. 1:22; 1 Joh. 4:11) Posi yokutja, orusuvero otjikaṋena tji tji za moukoto womutima, omundu warwe tje ha yenene okumuna. Ku nao, omomuano uṋe mu matu yenene okuraisa kutja twa suvera ovakambure ovakwetu? Omomambo na movitjitwa vyetu.

⁸ Pe nomiano omingi mu matu yenene okuraisira ovakambure ovakwetu kutja twe ve suvera. Ovihorera tjiva ovyombi: “Serekarerasaneye ouatjiri.” (Sak. 8:16) ‘Karasaneye nohange.’ (Mar. 9:50) “Nu mu ramange okuyozikasana.” (Rom. 12:10) ‘Yakurasaneye.’ (Rom. 15:7) Aruhe kareye amamu ‘isirasana.’ (Kol. 3:13) “Vaterasaneye okutjinda omauzeu weṋu.” (Gal. 6:2) ‘Yarurasaneye pehi omitima.’ (1 Tes. 4:18) Aruhe kareye ‘pokuvaterasana.’ (1 Tes. 5:11) ‘Kumbirasaneye.’—Jak. 5:16.

9. Ongwaye okuhuhumiṋa varwe tje ri otjiraisiro tjokutja twe ve suvera? (Wina tara kotjiperendero.)

⁹ Ngatu tare komuano umwe mu matu yenene okuraisa orusuvero rwetu ku varwe otja tji pa hungirwa moparagrafa ndja kapita. Paulus wa tja: ‘Yarurasaneye pehi omitima.’  Ongwaye okuyanḓiparisa poo okuyarura pehi omitima vyavarwe tje ri omuano omusemba wokuraisa kutja twe ve suvera? Omambo nga ‘okuyarurasana pehi omitima’ Paulus nga ungurisa ye heya “okukurama posi yomundu nokumutunduuza indu tje ri mouzeu ounene.” Indu tji matu wisa omutima womukambure omukwetu pehi ngu ri mouzeu, tu mu vatera kutja ma kayende komurungu okukarera Jehova nouṱakame. Otjikando atjihe tji matu wisa omutima womukambure omukwetu pehi, tu mu raisira kutja twe mu suvera.—2 Kor. 7:​6, 7, 13.

10. Okuraisa otjari nokuhuhumiṋa vi hitasana vi?

¹⁰ Okuraisa otjari nokuyarura pehi omitima, omambo nge yenda kumwe. Omomuano uṋe? Omundu ngu ma ṱotjari na warwe ngu ri mouzeu u vanga okuyarura omutima we pehi nokumuvatera. Ku nao, indu tji matu ṱotjari, ku tjita kutja tu huhumiṋe varwe. Paulus wa raisa kutja otjari Jehova tje natjo kovandu, tji mu hinga kutja me ve vatere. Paulus wa tja Jehova “olhe younyaṋutima, nu oNdjambi womayaruriro pehi aehe womutima.” (2 Kor. 1:3) Imba Paulus wa ungurisa embo ndi ‘ounyaṋutima’ ndi ma ri raisa okuṱotjari na varwe. Ku nao Mukuru u isanewa kutja olhe younyaṋutima mena rotjari tje otjinene tje natjo kovandu. Nu otjari ho tji mu hinga okutuvatera “momauzeu wetu aehe.” (2 Kor. 1:4) Tjimuna omeva omakohoke woruharwi tji ye tarareka imba mba ṱonyota, Jehova u tarareka nokuvatera imba mbe nombamisiro momuinyo. Omomuano uṋe mu matu yenene okuhorera ku Jehova mokuṱotjari ku varwe nokuvehuhumiṋa? Omuano umwe mu matu yenene okutjita nao, omokutjita kutja tu kare novikaṋena mbi mavi tu vatere okukara notjari nokuhuhumiṋa varwe. Ovikaṋena tjiva mbi ooviṋe?

11. Otja kOvakolose 3:12 na 1 Petrus 3:​8, ovikaṋena viṋe mbi matu hepa kutja tu kare norusuvero ndu maru tu hingi okuhuhumiṋa varwe?

¹¹ Otjikeṋa tji matji tu vatere okukara norusuvero, kutja tu kayende komurungu ‘okuyarurasana pehi omitima’ eyuva arihe? Matu hepa okukara novikaṋena otja imbi, okuṱirasana ondjenda, okusuverasana otjomundu nomuṱena mongamburiro nokuraisasana ouwa. (Lesa Ovakolose 3:12; 1 Petrus 3:8.) Ovikaṋena mbi mavi tu vatere vi? Indu tji tu notjari nokurikendera ovakambure ovakwetu, matu kara nonḓero yokuvevatera indu tji ve ri mouzeu. Jesus wa tja: “Otjinyo tji hungira imbi mbye ura momutima. Omundu omusemba u isa ouwa movihuze vye oviwa.” (Mat. 12:​34, 35) Okuhuhumiṋa ovakambure ovakwetu mbe ri mouzeu tjiri omuano omunahepero mu tu raisa kutja twe ve suvera.

12. (a) Omena raye tji matu hepa okukengeza kutja atu ha pandjara orusuvero rwetu ku novakambure ovakwetu? (b) Omapuriro yeṋe ngu matu katara nai?

¹² Eṱe atuhe tu vanga okukayenda komurungu ‘okusuverasana.’ (1 Joh. 4:7) Posi ya ounanḓengu kweṱe okuzemburuka erakiza ra Jesus ndi tja: ‘Orusuvero rwovengi maru poro.’ (Mat. 24:12) Jesus kaatja otjingi tjovemukongorere mave isa okusuverasana. Posi ya, matu sokukengeza kutja atu ha yandjere ozongaro zovandu vouye mbe hi norusuvero okuṱuna komuano mbu tu tjindasana. Ku nao, ngatu katare kepuriro enanḓengu ndi: Otjikeṋa tji matji tu vatere okutjiwa kutja orusuvero ndu tu na ro kovakambure ovakwetu ru nomasa?

13. Matu yenene vi okutjiwa kutja orusuvero rwetu kovakambure ovakwetu ru nomasa?

¹³ Omuano umwe mu matu yenene okutjiwa kutja orusuvero rwetu ru ṱa pi, omokukonḓonona  omuano mbu tu ritjinda mongaro tjiva zehupo. (2 Kor. 8:8) Omuapostele Petrus wa tamuna ongaro imwe, indu tja tja: “Nu kombanda yaavihe suverasaneye nomasa tjinene, orusuvero tjinga aru vandeka omauvi omengi.” (1 Petr. 4:8) Ku nao ongaro ndji tu raisa indu ovakambure ovakwetu tji va tataiza poo tji va tjiti otjiṋa tji matji tu hihamisa, tji tu vatera okutjiwa kutja orusuvero rwetu ku wo ru ṱa pi.

14. Otja 1 Petrus 4:​8, matu hepa okukara norusuvero ndu ri vi? Sasaneka.

¹⁴ Ngatu tare nawa komambo wa Petrus. Orupa orutenga rwezeva oritjahambondatu maru tja matu sokusuverasana “nomasa tjinene.” Omambo wa Petrus ngu maye tja “nomasa tjinene” maye hee “okuvandeka poo okukutjira.” Orupa orutjavari rwezeva ndo maru hungire ohunga noviṋa mbi tu tjita indu tji twa suvera varwe nomasa tjinene. Orwo ru tu vatera okuvandeka omauvi wovakambure ovakwetu. Ripura notjitiha tji tja kururuka tjinene. Mape ya atu toora erapi natu “vandeke” naro otjitiha kutja atu ha munu omakururukiro. Momuano tjingewo, indi tji twa suvera ovakambure ovakwetu nomasa tjinene, matu yenene okuvandeka poo okuisira “omauvi omengi.”

15. Ovikwaye mbi matu yenene okutjita indu orusuvero rwetu kovakambure ovakwetu tji ru nomasa? (Ovakolose 3:13)

 ¹⁵ Orusuvero rwetu ku varwe ru sokukara nomasa nga yenene kutja tu yenene okuisira ozondataiziro zovakambure ovakwetu, nandarire kutja povikando tjiva irira ouzeu okutjita nao. (Lesa Ovakolose 3:13.) Indu tji twa isire varwe matu raisa kutja orusuvero rwetu ru nomasa nokutja tu vanga okuyorokisa Jehova. Ovikwaye vyarwe mbi mavi tu vatere okuisira varwe nokuhinokupindikisiwa i yoviṋa mbi mave tjiti?

16-17. Otjikeṋa tjarwe tji matji tu vatere kutja atu ha tara kozondataiziro zovakwetu? Sasaneka. (Wina tara kotjiperendero.)

¹⁶ Tara kovikaṋena oviwa vyovakambure ovakweṋu, nungwari o tara ku imbi ovivi. Tara komasasanekero nga. Ngatu tje u ri poṋa pu mwa worongana pu novakambure ovakweṋu. Eṋe mu nondjoroka pamwe nu komaandero ove o perende otjiperendero pu novakambure ovakweṋu. Tjazumba, o perende oviperendero vyarwe vivari kokutja u kare na vyarwe indu ihi otjitenga tji tji ha pitire nawa. Okutja nai u noviperendero vitatu. Mu tjimwe tjavyo o munu kutja omukambure omukweṋu ke nokumeṱameṱa. Mo tjiti vi kotjiperendero tjo? Ove mo isa mo otjiperendero ho, mena rokutja u noviperendero vyarwe vivari omurumendu omukambure ngo novakwao mu mave meṱameṱa.

 ¹⁷ Eṱe matu yenene okusasaneka oviperendero mbi tu pwika ku noviṋa mbi tu zemburuka. Potuingi tu zemburuka oviṋa oviwa mbi twa tjita pu novakambure ovakwetu. Posi ya ngatu tje potjitjitwa tjimwe, omukambure umwe a hungire poo a tjiti otjiṋa tji tje ku hihamisa. Matu sokutjita vi nouripura mbwo? Eṱe matu sokukondja okuzemba ouripura mbwo, tjimuna tji tu isa mo otjiperendero tji twa perende. (Omiano 19:11; Ef. 4:32) Eṱe matu yenene okuzemba ouvi ouṱiṱi womukambure omukwetu, mena rokutja tu zemburuka oviṋa oviwa ovingi mbi twa tjita pu na ye. Ingo omeripura ngu matu vanga okuṱiza nokuzemburuka.

18. Omapu yeṋe omananḓengu ohunga norusuvero ngu twa hungirire ko morupa ndwi?

¹⁸ Omena raye tji matu sokukarasana norusuvero orunamasa? Otja tji twa tara ko rukuru, eṱe tu raisa orusuvero ku Jehova indu tji matu raisa orusuvero kovakambure ovakwetu. Omomuano uṋe mu matu raisire ovakambure ovakwetu orusuvero? Omuano umwe mu matu yenene okutjita nao, omokuyarurasana pehi omitima poo okuhuhumiṋasana. Eṱe matu yenene ‘okuyarurasana pehi omitima’ indu tji matu raisire varwe otjari. Matu yenene vi okuraisasana orusuvero orunamasa? Omokuisira ovakambure ovakwetu nandarire kutja ouzeu okutjita nao.

19. Omena raye tje ri ounanḓengu ndino okuraisa orusuvero kovakambure ovakwetu?

¹⁹ Ongwaye okuraisasana orusuvero tje ri otjiṋa otjinanḓengu ndino? Tara kepu Petrus nda yandja: “Ondjandero yoviṋa avihe ya tumbuka. . . . Nu kombanda yaavihe suverasaneye nomasa tjinene.” (1 Petr. 4:​7, 8) Otjikeṋa tji matu undjire ko, otja ouye ourunde mbwi tji u ri pokuyanda? Jesus wa hunganeka nai ohunga novemukongorere: “Ovandu avehe mave mu tondo motjimbe tjandje.” (Mat. 24:9) Kokutja tu panḓere po nandarire kutja ovandu mave tu tondo, eṱe matu hepa okukara nombwaneno. Indu tji twa suvere ovakambure ovakwetu, Satan kamaa yenene okutuhaṋa mena rokutja orusuvero “otjiwaneke tji tji tu kuta kumwe okuura.”—Kol. 3:14; Fil. 2:​1, 2.