1-3. (a) Matu sokukara noumune uṋe ohunga nouatjiri wOmbeibela? Sasaneka. (Tara kotjiperendero pomautiro worupa ndwi.) (b) Matu ka tara komapuriro yeṋe morupa ndwi?

EṰE tu yenena okuyarura otjiṋa tji twa randa kostora. Omakonḓononeno ye raisa kutja momahi tjiva, ovarande ve yarura ozoperesente ape 9 zoviṋa mbi va randa kostora. Nu imbi mbi vi randwa okupitira motungovi vi kotorwa okuvaza kowingi wozoperesente 30. Ngahino ovarande ve muna kutja oviṋa mbyo ka mbi vari a mave hepa, poo opuwo kave nokuvivanga rukwao. Okutja ve muna kutja mave ka pimbisa ku notjiṋa tjarwe poo mave kambura ovimariva vyawo.

² Nandarire kutja tu yenena okuyarura oviṋa mbi twa randa kutja otjimariva tjetu tji kotoke, eṱe ka maatu vanga okuyarura poo ‘okurandisa’ ‘ondjiviro youatjiri’ wOmbeibela ndji twa “randa.” (Lesa Omiano 23:23; 1 Tim. 2:4) Otja tji twa hungirire morupa ndwa kapita, eṱe twa muna ouatjiri wOmbeibela mokuungurisa oruveze orwingi okurihonga wo. Nakombanda yanao, kutja tu rande ouatjiri, eṱe twa isa oviungura vyetu oviwa, twa kondja nomarundurukiro pokati kovazamumwe nomapnga wetu nomuano mbu  tu ripura nongaro yetu yomeritjindiro, poo nandarire twa isa ozombazu novitjitwa mbi ha zikamene komatjangwa. Posi yokutja, imbi mbi twa suta oviṱiṱi uriri tji twa sasaneke nozondaya azehe nḓu tu muna.

³ Tji pe ya kouatjiri wOmbeibela, eṱe tu kara noumune tjimuna imbwi womurumendu ngwa hungirirwe i Jesus momasasanekero. Okuraisa kutja ouatjiri wOuhona wa Mukuru otjiṋa otjihuze pu pe ṱa pi ku imba mbe u muna, Jesus wa hungira ohunga nomundu ngu ma paha omawe omawa omahuze, nu a munu rimwe. Nu tjiri ewe ndo ra ri nonḓengu yokombanda tjinene, nga tja “karandisa” oviṋa vye avihe tjimanga, kutja ma rande ewe ndo. (Mat. 13:45, 46) Momuano tjingewo mbo, ouatjiri mbu twa muna ohunga nOuhona wa Mukuru noviṋa vyarwe ovihuze mbi twe rihonga mEmbo ra Mukuru, u nonḓengu yokombanda tjinene nga tji tu rimanena okutjita omarundurukiro ngu maye heperwa po, nu tjimanga, kutja tu mune ouatjiri mbo. Indu tji matu vara ouatjiri nonḓengu yokombanda, eṱe ka maatu u “randisa” ko. Nungwari pe notjiṋa otjihihamise, ovandu va Mukuru tjiva kave munu onḓengu youatjiri mbu va muna, nu nandarire ve u randisa. Arikana eṱe atu roro okutjita nao! Okuraisa kutja eṱe tjiri tu vara ouatjiri otjotjihuze nu ka maatu u randisa ko, ngatu yandje ombakatwi kerakiza rOmbeibela ndi ma ri tja ngatu kare “nongarero ombwa youatjiri.” (Lesa 3 Johanes 2-4.) Okukaenda mouatjiri ku kamburira mo okuhupa mu wo, okuutwapo poruveze orutenga mehupo retu nokuritjinda mombwaneno nouatjiri. Indjo tu tare komapuriro nga: Omena ra tjike nu omomuano uṋe tjiva mu mape ya ave “randisa” ouatjiri? Matu tjiti vi kutja atu ha tjiti ondataiziro ohihamise otja indjo? Nu matu tjiti vi kutja tu kaende komurungu “nongarero ombwa youatjiri”?

4. Ongwaye tjiva tji va “randisa” ouatjiri meserewondo etenga?

⁴ Meserewondo etenga, tjiva mba puratenene nombango komahongero wa Jesus poutenga, kave toṋene okukaenda mouatjiri. Otjotjihorera, otjimbumba otjinene tji tja za nokuparurwa i Jesus momuano omuhimise, otjimbumba hi tje mu kongorera nga munda mbwina wOmuronga wa Galilea. Imbo, Jesus wa hungira oviṋa mbye ve temisa nu atja: “Tji mu hi nokurya onyama yOmuna wOmundu nokunwa ombinḓu ye, kamu nakukara nomuinyo mu eṋe.” Moruveze rokuningira kutja Jesus me ve kahururire oviṋa mbi ma hungire, owo va putarisiwa i omambo we nave tja: “Omahongero nga omazeu tjinene. Ngu ma sora okuyezuva nawa owaṋi?” Mena ra nao, “ovakongorere ovengi va Jesus va yarukira mbo nave ha uhara amave Mu kongorere rukwao.”​—Joh 6:53-66.

5, 6. (a) Ongwaye tjiva tji va isa okukakatera kouatjiri ndino? (b) Omundu umwe u yenena vi okuisa ouatjiri kouṱiṱiṱiṱi?

⁵ Ouhumandu, tjiva ndino wina kave kakatere kouatjiri. Tjiva va putarisiwa i omazuviro omape wOmatjangwa nga rundururwa, poo nandarire i oviṋa omurumendu omukambure womerizirira mombongo mbya hungira poo mbya tjita. Varwe va hihamisiwa i omaronga nga zikamena kOmatjangwa ngu va pewa, poo va isa ouatjiri mena rokupitasana oumune ku nOmukriste omukwao. Nu tjiva wina ve ri kuta ku novapirukire na varwe mbe hungira ovizeze ohunga nongamburiro yetu. Mena roviṋa mbi, tjiva ve uta ‘okupoka ku’ Jehova na kombongo. (Hebr. 3:12-14) Atja rira nawa tjinene andakuzu owo va ṱiza ongamburiro ya wo nu ave kambura mu Jesus tjimuna omuapostele Petrus tja tjita! Jesus tja pura ovaapostele kutja owo wina mave vanga okuyaruka, tjimanga Petrus wa zira atja: “Muhona, matu yaruka ku aṋi?  Ove u nomambo womuinyo waaruhe.”​—Joh. 6:67-69.

⁶ Tjiva va isa ouatjiri kouṱiṱiṱiṱi, ngahino ngunda ave hi nokumuna kutja mave poka ku Jehova. Nu indu omundu tji ma zu ko kouatjiri, uri tjimuna okayaha komomeva ku make zako komukuro kouṱiṱiṱiṱi. Ombeibela itja omazakero otja ingo yeri tjimuna ‘okuundurirwa kwarwe.’ (Hebr. 2:1) Pendje nomundu ngu ri pora omuini ku Jehova, omundu ngu undurirwa kware u poka ku Jehova ee hi nokutjiwa. Nungwari, omundu otja ingo u hihamisa oupanga we kuna Jehova nu uri moumba wokuupandjarisa. Eṱe matu tjiti vi kutja atu ha kara mongaro ohihamise otja indjo?

7. Omukambo uṋe omutenga mbu mau tu vatere kutja atu ha randisa ouatjiri?

⁷ Kokutja tu kaende mouatjiri, tu sokuyakura nokukara nonḓuviro komaraerero wa Jehova ayehe. Ngatu twepo ouatjiri poruveze orutenga mehupo retu nu tu hupe otja komirari vyOmbeibela. Mongumbiro ye ku Jehova, Ombara David wa tja: ‘Me ryanga mouatjiri woye.’ (Eps. 86:11) David wa ri nombango tjinene. Eṱe wina ngatu paime nu tu kare nonḓero yokukaenda mouatjiri wa Mukuru. Tji tu hi nokutjita nao, matu utu okuivaiva ohunga na imbi mbi twa suta kouatjiri nu nandarire atu utu okuvanga okukotorerwa otjisuta. Moruveze rwa nao, eṱe ngatu kakatere kouatjiri okuura. Eṱe tu tjiwa nawa kutja kamaa tu toorora kutja ouatjiri uṋe mbu matu ṱakamisa nu ouṋe mbu tu hi nokuṱakamisa. Nu kombanda yaavihe, eṱe matu sokukaenda “mouatjiri auhe.” (Joh. 16:13) Indjo tu tare koviṋa vitano mbi mape ya kutja o mbi twa suta kouatjiri. Okutjita nao mape tu vatere kutja atu ha vanga okunanukirwa i oviṋa tjiva mbi twa suta.—Mat. 6:19.

8. Okuungurisa oruveze nokuhinongengezero maku humburura vi Omukriste kokure nouatjiri? Yandja otjihorera.

⁸ Oruveze. Kokutja atu ha humburuka kokure nouatjiri, eṱe matu hepa okuungurisa oruveze rwetu nounongo. Tji tu hi nokukengeza, mape ya atu utu okuungurisa oruveze rwetu oruingi momanyando, motungovi, poo okutaarera o-tv. Nandarire kutja oviṋa mbi ovini kaviṋa ovivi, oruveze ndu tu ungurisa ku vyo ru kauta okuṋiṋikiza oruveze ndu tu ungurisa komakonḓononeno wetu oveni wOmbeibela na koviṋa vyarwe oviyapuke. Tara ku imbi mbya tjitwa komukazendu Omukriste wena Emma. * Okuza koumutanda we, Emma wa suverere oukambe. Okaruveze akehe kaa munu, aa kakavira. Kombunda yoruveze, ya rira ouzeu ku ye mena roruveze oruingi eye ndwaa ungurisa momanyando ngo. Eye wa toṋa mokutjita omarundurukiro na twapo oruveze orusemba komanyando. Eye wina wa tunduuzwa i ehungi ra Cory Wells, omukavire woukambe omukuru, okuisa okukavira. * Emma nai u yorokera oruveze oruingi rokukara norupa moviṋa oviyapuke nokukara pu neṱunḓu rOvakriste nomapanga we. Eye u noupanga wopopezu na Jehova nu u nohange, nokutja ma tjiwa kutja u ungurisa oruveze rwe nounongo.

9. Okupaha oviṋa vyoutumbe ku tjita vi kutja tjiva ave ha yandja ombango koviṋa oviyapuke?

⁹ Omawini. Kokutja tu kaenda komurungu mouatjiri, eṱe matu sokukara noumune ouwa ohunga nomawini. Indu tji twe rihongo ouatjiri, onḓero yetu momawini i rira oviṋa ovitjavari koviṋa mbi vi tjama noupanga wetu kuna Mukuru. Twa ri nondjoroka okuisa oviṋa vyomautumbe kokutja tu kaende mouatjiri. Nungwari oruveze tji maru kaenda, mape ya atu  utu okumuna varwe a mave randa oviṋa vyouye wa kandino poo a mave yorokere oviṋa vyarwe vyomautumbe. Mape ya atu utu okuhihamenwa i oviṋa mbyo. Mena rokuhinokukowa mu imbi mbi tu navyo, eṱe mape ya atu utu okuyandja ombango kokupaha omawini moruveze rokuripurira kokukarera Jehova. Ongaro ndjo mai tu zemburukisa Demas. Eye “wa yaruka okusuvera ouye mbwi” notja isa okukarera pu nomuapostele Paulus. (2 Tim. 4:10) Ongwaye Demas tja isa Paulus? Ombeibela kai raisa oukahu kutja wa suverere oviṋa vyomautumbe okukapita Jehova, poo ngahino kaa vanga okutjita ozongondjero kutja ma ungurire Jehova puna Paulus. Nu eṱe tji tu hi nokuṱakamisa, onḓero yokuvanga oviṋa vyoutumbe mai kuru mweṱe nu ai tjiti kutja atu ha suvere ouatjiri.

10. Oṋiṋikizire iṋe ndji tu sokupirukira, kokutja tu kaende mouatjiri?

¹⁰ Ouzamumwe. Kokutja tu kaenda mouatjiri, atu yumbu ohama mena roṋiṋikizire ndji mai zu komapanga novazamumwe vetu. Indu tji twa uta okuryanga mouatjiri, oupanga pokati ketu novakwetu mbe he ri Ovahongonone va Jehova wa runduruka. Tjiva aave tjaterwa i omukambo mbu twa toora; nu varwe va pindika tjinene nu aave tu pirukire. (1 Petr. 4:4) Nandarire kutja tu vanga okukara noupanga ouwa ku nomihoko vyetu nokuvetjinda nawa, ngatu ṱakamise kutja atu ha nyeṋuṋa ouatjiri mena rokuvanga okutjata ku wo. Otjiperi kutja matu kaenda komurungu okusuvera ovazamumwe ve tu nokukondja kutja pe kare ohange. Nu 1 Ovakorinte 15:33, ri tu honga kutja matu sokukara noupanga wopopezu novandu imba mba suvera Jehova uriri.

11. Matu nakaura vi ozongaro nḓe ha tjata ku Mukuru?

¹¹ Omeripura nomeritjindiro nge ha tjata ku Mukuru. Avehe mbe ryanga mouatjiri mave sokurira ovayapuke. (Jes. 35:8; lesa 1 Petrus 1:14-16.) Indu tji twe rihonga ouatjiri, eṱe atuhe twa tjita omarundurukiro kokutja tu hupe otja komirari vyOmbeibela. Nu tjiva va tjita omarundurukiro omanene nu nge ha ri omapupu. Omuano auhe mu twa kondja, eṱe ngaatu roro okurandisa oukohoke nouyapuke wetu, kondova yomeritjindiro wouye mbwi. Matu tjiti vi kutja atu ha yandjere ozongaro nḓo okuhita mweṱe? Ripura nondjambi onene Jehova ndja suta kokutja tu rire ovayapuke nombinḓu ohuze yOmuna we, Jesus Kristus. (1 Petr. 1:18, 19) Okuṱiza ongarero yetu ongohoke komurungu wa Jehova, matu hepa okukara a matu rizemburuka nonḓengu yombunguhiro ya Jesus aruhe mouripura na momitima vyetu.

12, 13. (a) Ongwaye tje ri ohepero okukara noumune wa Jehova ohunga nomazemburukiro nge tjitwa mouye? (b) Matu ka tara ku ye okuzamba?

¹² Ozombazu novitjitwa mbi ha zikamene komatjangwa. Omihoko vyetu, ovandu mbu tu ungura pamwe, novakwetu mbu tu hita pamwe oskole mape ya ave kondjo kutja tu kare norupa momikandi vyawo. Matu pirukire vi oṋiṋikizire yokukara norupa mozombazu poo momazemburukiro nge ha yozike Jehova? Matu toṋa indu tji tu noumune wa Jehova ohunga noviṋa mbyo mourizemburuka wetu aruhe. Nu ombatero yarwe matu yenene okuimuna momambo wetu nge kahurura ombutiro yomazemburukiro nge tjitwa tjinene mouye. Indu tji twe rizemburuka nomapu nga zikamena kOmatjangwa kutja ongwaye tji tu ha sokukara norupa momazemburukiro omengi nge tjitwa mouye, okutja nao handje twa tjiti “imbi mbi tjata ku Muhona.” (Ef. 5:10) Okukambura mu Jehova nEmbo re ma ku tu tjevere kutja atu ha ‘tira ovandu.’​—Omiano 29:25.

¹³ Okukaenda mouatjiri otjiṋa otjikarerere, nu omukambo mbu tu sokuṱakamisa aruhe nga aruhe. Hapo nu matu rimanene vi okukaenda mouatjiri aruhe? Indjo tu tare komiano vitatu.

14. (a) Okukaenda komurungu okuranda ouatjiri maku tu vatere vi okuhinokuurandisa? (b) Ongwaye ounongo, omavyuriro nozondunge tji vi ri ovinahepero?

¹⁴ Rutenga, kaende komurungu okurihonga ouatjiri mbu ri mEmbo ra Mukuru nokuripurira ko oukoto. Ii, randa ouatjiri mokutwapo oruveze aruhe kutja u tjiwe ouatjiri wEmbo ra Mukuru. Kunao, ove mokurisa ondangi yoye kouatjiri nu mo rimanene okuhinokuurandisa. Kombanda yokuranda ouatjiri, Omiano 23:23 ri tu raera kutja eṱe wina matu sokuranda ‘ounongo nomavyuriro nozondunge.’ Okukara nondjiviro akuyerike ka kwa yenena. Tu sokuṱakamisa imbi mbi twe rihongo mehupo retu. Nozondunge zetu, eṱe tu yenena okuzuva omambo wa Jehova aehe. Ounongo u tu vatera okutjita imbi mbi matu tjiwa. Povikando, ouatjiri utu vyura, okuturaisira kutja pe pi pu matu sokutjita omarundurukiro. Eṱe aruhe nga tu kondje okuzuva komavyuriro ngo. Onḓengu yawo ya kapita osilveri.​—Omiano 8:10.

15. Ekwamo rouatjiri ri tu tjevera vi?

¹⁵ Otjitjavari, kaende komurungu okuhupa otja komirari vyouatjiri eyuva arihe. Zara ekwamo rouatjiri pehuri. (Ef. 6:14) Moruveze rwOmbeibela, ekwamo romurwe wovita aa ri mu tjevere nokumuṱiza pehuri. Kokutja ekwamo re ri mu tjevere, oro aa ri sokupama nawa mu ye. Ekwamo tji ra harahara kaa ri yenene okutjevera omurwe nawa. Hapo ekwamo retu rouatjiri ri tu tjevera vi? Indu tjitwa ṱizire ouatjiri wOmbeibela popezu na eṱe, tjimuna ekwamo romurwe wovita, owo utu tjevera komeripuriro omavi nokutuvatera okutjita ozondando ozosemba. Indu tji tu ri kehi yomarorero poo kehi yomauzeu, ouatjiri wOmbeibela utu pa omasa okutjita imbi mbi vi ri ovisemba. Tjimuna omurwe wovita tje hi nokuyenda kovita nokuhina ekwamo re, eṱe wina katu sokuhukura poo okuyandjera kutja ekwamo retu rouatjiri ri harahare. Moruveze rwa nao, ma rire nawa tji twe ri pamisa pomahuri wetu mokuhupa otja komirari vyOmbeibela. Omurwe wovita wina aa yenene okuṱizira engaruvyo re mekwamo ndo. Ngatu ka tare kutja eṱe matu yenene vi okutjita nao.

16. Okuhaṋasana ouatjiri kuna varwe ku tu vatera vi okukaenda komurungu mouatjiri?

¹⁶ Otjitjatatu, kara norupa okuura mokuhonga ouatjiri wOmbeibela ku varwe. Momuano mbo, ove mo toora engaruvyo retu rombepo, oro ndi ri ri “Embo ra Muhona.” (Ef. 6:17) Atuhe matu yenene okupwisa ondjiviro yetu otjozomiṱiri zOmbeibela, kutja tu ‘honge nawa indi embo rouatjiri.’ (2 Tim. 2:15) Otja tji matu ungurisa Ombeibela okuvatera varwe okuranda ouatjiri nokupirukira omahongero woposyo, eṱe opu tu hitisa omambo wa Mukuru mozondunge na momitima vyetu oveni. Momuano mbo, tu kara nonḓero yokukaenda komurungu mouatjiri.

17. Ongwaye ouatjiri tji uri otjiṋa otjihuze kove?

¹⁷ Ouatjiri otjiyandjewa otjihuze okuza ku Jehova. Nu otjiyandjewa hi ootjiṋa otjihuzehuze moviṋa avihe mbi tu na vyo, tji tjiri oupanga wetu kuna Tate wetu womeyuru. Avihe mbye tu honga nga ku ndino, ovyo ngunda omautiro uriri! Mukuru wetu kwizikira okukahupa nga aruhe kokutja tu ka weze ouatjiri mbu twa randa rukuru. Kunao, raisa ondangi kouatjiri mbwi tjimuna kewe ehuze. Okutja kaende komurungu ‘okuranda ouatjiri nu o u randisa ko.’ Tjimuna David, ove mo ṱakamisa omakwizikiro nga ku Jehova: ‘Me ryanga mouatjiri woye.’​—Eps. 86:11.