KEHI yOmatwako, Jehova aa yakura ozombunguhiro zozohanda nozonguti. Ouzera auyevari mbwo aruhe aau tamunwa pamwe mOmatwako ohunga nozombunguhiro. Nu kemwe tji ke he ri po oo yenene okuungurisa karwe. (Lev. 1:14; 12:8; 14:30) Ongwaye ihi tji tja ri otjiṋa otjiwa? Epu rimwe orondi rokutja ozonguti kaaze munika oruveze aruhe. Omena raye?

Ozonguti ouzera mbu kara moIsrael momieze vyoupyu. Mokuṋi ozo ze tjindira komahi ku ku noupyu komamuho wa Israel. Nu moruteṋi ze kotoka koIsrael. (Eimb. 2:11, 12; Jer. 8:7) Ku nao moIsrael otjikuru, ya ri ouzeu kOvaisrael okuyandja ozonguti otjombunguhiro moruveze rwokupepera.

Posi yokutja, ozohanda kaze tjindi, ku nao aaze yenene okumunika oruveze aruhe moIsrael. Kombanda yanao ozohanda aaze korwa ponganda. (Sasaneka Johanes 2:14, 16.) Otja kembo ndi isanewa Bible Plants and Animals, “ozoresevate azehe novihuro vya Palestina aavi kora ozohanda pozonganda. Omunionganda auhe wa ri noviruwo poo aa topora ondovi mekuma rondjuwo ouzera paau yenene okukara.”—Sasaneka Jesaja 60:8.

Jehova wa raisa kutja eye omunarusuvero nu u tara kozongaro zovandu mokuyakura ozombunguhiro zouzera mbwaau munika oupupu moIsrael ombura aihe.